Zɔb I Nyrɛnnɛn Wunlɛ 16 - NYANMIƐN NDƐ'N 1998

Zɔb i Elifaz i su tɛlɛ'n i wie ekun yɛ: i waan i lalofuɛ'n wo nglo lɔ

¹ Zɔb tɛli su kɛ:

² Ndɛ kunngba ng'ɔ o yɛ'n, m'an ti i wun su wie pɛ. Amun kwlakwla amun sran fɔnvɔlɛ'n ɔ ti kekle o.

³ ?Cɛn onin nan ndɛ ngbɛn-ngbɛn nga'm b'a wie? Be ti kɛ aunngban sa. ?Nzu like cɛ yɛ ɔ su ɔ bo bɔ man a tɛ su ya su-ɔ?

⁴ Sɛ amun yɛ sa ng'ɔ o min su yɛ'n wo amun su'n, wuun n ´kan ndɛ wafa nga amun ´kɛn i lɛ'n wie, wuun n ´ijɔ amun su kpanngban wie, wuun n ´keje n ti'n annvɔ bɔ amun ´yo min'n ti,

⁵ wuun n ´fa mín nuan nun ndɛ'n n ´wla amun fanngan, wuun n ´kan ndɛ ng'ɔ ko uka amun'n.

*

⁶ Sɛ min waan n ´ijɔ'n, min afɛ'n su go-man nun. Sɛ min waan m ´muan min nuan'n, ɔ su kwla tu-mɛn i bo.

⁷ Nyanmiɛn man min fanngan'n ɔ'a wie. Ɔ'a nunnun min awlofuɛ'm be kwlakwla.

⁸ Min nyrun bɔ ɔ'a tɔtɔ nun'n, ɔ nin koklo bɔ m'an yo'n, be di min wun lalo yɛ be bu min fɔ.

⁹ I ya dan b'ɔ fali'n nun'n, ɔ nin min yo kɛ nnɛn bɔ i bɔbɔ Nyanmiɛn'n i waan ɔ ´trɛ i'n sa, ɔ su min su, ɔ yi i je'n kle min. Min kpɔfuɛ'n ɔ nian min nianlɛ tɛ kpa.

¹⁰ Sran'm be kputu min kputulɛ kpa. Be kpaci min nyrun, be yo min finfin. Bé bo ɔ'a yo kun mín wun yɛ be nin min a nyɛn i .

¹¹ Nyanmiɛn ɔ'a fa min a wla wlakafuɛ'm bé sa nun, ɔ'a fa min a yi sran nga be bu-man Nyanmiɛn like fi'n be afiɛn.

*

¹² N wo n wolɛ lɛ diin, kpɛkuun ɔ wa trali min kejeli min. Ɔ trali min kɔmin, ɔ yili min ase. Mín wun yɛ ɔ to i cua'n siɛn nin-ɔn.

¹³ Cua sɔ'n wie sin wa, wie sin wa, wie sin wa. Be sran min mín wi lika, aunnvuɛ silɛ nun-man nun. Ɔ'a yi min klun ninnge mun ɔ'a gua.

¹⁴ Ɔ'a bo bo min kannin sa trutrɛɛ. Ɔ su min su kɛ alɛ kunfuɛ sa.

¹⁵ Bajɛ tralɛ'n jaso-man min wun, min nyrun'n utu ndutre'n nun.

¹⁶ Min nyinma'n ɔ'a blo kankankan sunlɛ dunman nun. Siɛn'n, min nyinma'n su dun min sɔ tuun.

¹⁷ Kusu wuun m'an yo-man sa tɛ. Kɛ n ´srɛ Nyanmiɛn'n, min akunndan nun ti weiin.

*

¹⁸ Asiɛ, n ´srɛ wɔ, nán kata min mmoja'n su, man be ti min kpanlɛ bɔ n kpan'n .

¹⁹ Afin n si kɛ n lɛ lalofuɛ kun nyanmiɛn su lɔ, sakpa min lalofuɛ'n wo nglo lɔ .

²⁰ Kɛ min janvuɛ'm be ´yo min finfin'n, wuun m'an fa nyinmuɛn nzue n su sun n flɛ Nyanmiɛn.

²¹ Ee! Man min lalofuɛ'n ɔ kpɛ e nin Nyanmiɛn ye afiɛn ndɛ'n nun kɛ be fa kpɛ sran nin sran be afiɛn ndɛ nun asiɛ'n su wa'n sa .

²² Afin afuɛ nga n ko di'n yɛ ɔ'a wie yɛ. Atin nga be fa su be sa-man be sin kun'n, yɛ m'an fɛ i yɛ.