Zɔb I Nyrɛnnɛn Wunlɛ 15 - NYANMIƐN NDƐ'N 1998

Elifaz i ndɛ nnyɔn su b'ɔ kannin'n

¹ Elifaz b'ɔ fin Teman'n waan:

² ?Kɛ ngwlɛlɛfuɛ ijɔ kɛ nga sa? ?I ndɛ b'ɔ fin i nuan fite'n, ɔ ti fokofoko kɛ aunngban sa? ?I sa'm be su tɛlɛ ɔ ti kɛ wia afiliɛ lɔ aunngban'n sa?

³ Ɔ ti kplilɛ ndɛ'm be ti ngbɛn ngbɛn ngunmin. Ndɛ nga a kan be'n be yo-man sa fi ye.

⁴ A saci Nyanmiɛn sulɛ'n. Yalɛ nga be nin Nyanmiɛn koko'n, a nunnun i kwlakwla.

⁵ ?Sa tɛ bɔ a yo be'n, i ti yɛ man a kan ndɛ kɛ nga sa mun-ɔn? Yɛ gblɛgblɛ ndɛ mun yɛ a kpa be kan-an.

⁶ Ɔ bɔbɔ ɔ́ nuan'n yɛ ɔ bu wɔ fɔ-ɔ, nán min-ɔn. Ɔ nuan nun ndɛ mun yɛ be di ɔ́ wun lalo tɛ-ɔ.

*

⁷ ?Ɔ kpa'n, wɔ yɛ be dun mmua jrali wɔ asiɛ'n su-ɔ? ?Ɔ kpɛnngbɛn tra oka mun?

⁸ ?Kɛ Nyanmiɛn nin i mantanfuɛ mun be ´koko be yalɛ'n a trɛnnin i bo? ?Ɔ kunngba yɛ a si ngwlɛlɛ-ɔ?

⁹ ?Nguɛ sa cɛ yɛ a si i bɔ e si-mɛn i-ɔ? ?Nguɛ yɛ a wun i wlɛ bɔ e wun-mɛn wlɛ-ɔ?

¹⁰ Sran oke bɔ be tra ɔ́ si i kpɛn bɔbɔ'n be wie wo e nun, be si sa kpanngban.

¹¹ ?Nyanmiɛn ɔ'a yo man e su fɔnvɔ wɔ'n, a bu-mɛn i like? ?Ndɛ wɛtɛɛ nga e ´kan kle wɔ sa'n, ɔ ti-man ɔ nyrun like fi?

*

¹² ?Ɔ yo sɛ ti yɛ wɔ anwlɛn'n ɔ ti fufu dan sɔ-ɔ? ?Ɔ yo sɛ ti yɛ a kpɛ e kannglɛ dan sɔ-ɔ?

¹³ ?Nyanmiɛn wun yɛ a fa ya dan nga-a? ?Bɔ i ti yɛ a ijɔ beblebe kɛ nga sa-a?

¹⁴ ?Wan yɛlɛ sran b'ɔ ko di i nuan kɛ ɔ ti saun-ɔn? ?Klɔ sran kwla yo sɛsɛ?

¹⁵ Anz mun bɔbɔ Nyanmiɛn lafi-man be su, nyanmiɛn su lɔ lika'n ɔ ti-man saun i nyrun,

¹⁶ yɛ ɔ waan sran b'ɔ ti kain, bɔ ɔ'a kplɔ, bɔ sa tɛ'n ti i nzue yɛ ɔ nɔn'n yɛ ɔ lafi i su-ɔ!

*

¹⁷ Sie ɔ su man n tike sa kun su n kle wɔ. Sa nga n wunnin i'n, man n kan n kle wɔ.

¹⁸ Sa sifuɛ'm be ndɛ nga be kannin, ndɛ nga be nannan'm be kleli be'n, b'a fia-man su.

¹⁹ Be kunngba be liɛ yɛlɛ mɛn'n, aofuɛ fi sanngan-man be nun.

²⁰ Sran ng'ɔ bu-man Nyanmiɛn like fi'n, i nguan'n ɔ ti kokolɛ ngunmin. Yɛ sran ng'ɔ bli i wiengu sran'm be nun'n, i afuɛ ng'ɔ di'n, ɔ ti kaan sa.

²¹ Nganniɛn ng'ɔ ti'n, ɔ yo sro. Ɔ ti i tilɛ lɛ, kpɛkuun abɔlɛfuɛ wie ɔ'a fu i nun ɔ'a tɔ i su.

²² Ɔ ti kɛ lika yɛ ɔ'a dun i su sa, ɔ wun-man kɛ ɔ ko yo nan ɔ'a fin nun ɔ'a fite-ɔ. Ɔ si kɛ wie tɛ wulɛ yɛ ɔ'a to i-ɔ,

²³ nan ɔ'a kaci apɛtɛkuasi'm be nnɛn. Ɔ si kɛ i sacilɛ blɛ'n ɔ'a mɛntɛn i koko.

²⁴ Nyrɛnnɛn nin awlaboɛ'n be kun i srɛ. Be tɔ i su kɛ famiɛn wie b'ɔ fa alɛ fu sran nun'n sa.

²⁵ Afin sran sɔ'n ɔ kunndɛli Nyanmiɛn i utre. Ɔ wɔli Nyanmiɛn b'ɔ kwla like kwlaa yo'n i safle.

*

²⁶ Ɔ niɛn-mɛn i sin, ɔ wanndi kɔ kɛ ɔ nin Nyanmiɛn be ´ko kun. Ɔ lafi i nyrɛn dan'n su.

²⁷ Ɔ'a cɛn lele i nyrun'n ɔ'a yo mlanmlanmlan. I wunnɛn'n wo i wun.

²⁸ Klɔ ng'ɔ tran be su'm b'a saci. Sua ng'ɔ cɛ kan-an be ´tɔ bɔ sran tran-man be nun kun'n, yɛ ɔ tran nun-ɔn.

²⁹ Ɔ su nyɛn-mɛn i wun kun le, i sa nun ninnge'm be su cɛ-man, ɔ su nyan-man nyrun mɛn'n nun kun.

³⁰ Ɔ ´ka aosin tuun nun. Sɛ ɔ ti waka'n, wuun n ´se kɛ sin ɔ ´yrɛ i sama mun. Nyanmiɛn ´fitɛ i ´kɔ mmua.

*

³¹ Ɔ ´lafi ndrunmun dilɛ'n su, sanngɛ ɔ ti ngbɛn. Ndrunmun'n i nuan akatua yɛ ɔ ´nyɛn i-ɔ.

³² Sa sɔ'm be ´ju i su ka nan ɔ'a wu. Ɔ ´yo kɛ waka bɔ nzue ɔ'a wie i nun'n sa, i sama'm be su fɛfɛ-man kun.

³³ Ɔ ´yo kɛ vinyi bɔ be mma'm be nian blo-man kpɛkuun be kpɔ be gua'n sa, annzɛ kɛ olivie bɔ i nnyrɛ'n ɔ kpukpu gua'n sa.

³⁴ Sran ng'ɔ kpɔ Nyanmiɛn'n, i osufuɛ'm be klun ´yo kpan. Sin'n yaci-man sa tɛ yofuɛ'n i awlo'n i dilɛ le.

³⁵ Sɛ be wunnzɛ sa tɛ'n kɛ be fa wunnzɛ ba sa'n, wuun ba nga be ´wu i'n yɛlɛ nyrɛnnɛn'n. Sa nga be gugu be klun lɔ'n, ɔ laka be.