Zɔb I Nyrɛnnɛn Wunlɛ 14 - NYANMIƐN NDƐ'N 1998

Zɔb i Zɔfar i su tɛlɛ'n wie ekun yɛ: Sran'n ti nyrɛnnɛnfuɛ

¹ Klɔ sran'n bɔ bla yɛ ɔ wuli i'n i nguan'n ɔ ti tika. Kusu i nguan sɔ'n, ɔ ti afɛ ngunmin.

² Klɔ sran'n ɔ ti kɛ waka nnyrɛ b'ɔ kpuke'n sa. Kɛ ɔ cɛ kan'n, kpɛkuun waka nnyrɛ sɔ'n ɔ'a kpɔ ɔ'a tɔ. Klɔ sran'n ɔ sin ndɛndɛ kɛ fɔnvɔ sa, ɔ cɛ-man.

³ Sanngɛ ɔ́ nyin wo i su sa tititi. Kpɛkuun a fa min kɔ jɔlɛ difuɛ'm be ja su.

⁴ ?Wan cɛ yɛ ɔ kwla yo man like saun fin like fiɛn nun fite-ɔ ? Sran fi.

⁵ Wɔ yɛ a sie sran'n i cɛn ng'ɔ ´di'n i nuan-an. Wɔ yɛ a sie i anglo ng'ɔ ko di'n i nuan-an. A sieli bé nuan, sran'n ɔ tra su-ɔ ɔ yo-man ye.

⁶ Ɔ man `yaci i sasalɛ'n. Man ɔ nyɛn i ti de wunmiɛn. Man i wun jɔ i fɔun kan kɛ junman difuɛ wie bɔ ɔ'a wie i cɛn kun junman'n i di'n sa.

*

⁷ Sɛ be kpɛ waka'n su'n, ɔ fɛfɛ ekun-ɔn ɔ yo ye, ɔ fɛfɛ kpanngban ekun.

⁸ Sɛ bɔ i bo olui'n ɔ cɛ asiɛ'n nun bɔbɔ'n, sɛ i losin'n wu kee lele ju asiɛ'n i bo lɔ bɔbɔ'n,

⁹ kɛ nzue'n kɛn i'n, a ´nian-an ɔ'a tinnge. A wun i sama mun sa-a, ɔ waan blɛ li yɛ ɔ su jaso su-ɔ.

¹⁰ Sanngɛ sran'n i liɛ'n, kɛ ɔ ko wu'n, ɔ kwla keje-mɛn i wun kun. ?Kɛ ɔ ko ka nun'n, ninfan yɛ ɔ kɔ-ɔ?

¹¹ Cɛn kun'n, jenvie nun nzue'n ɔ ´wie nun. Nzue ba dandan'm be nun nzue'n ɔ ´wie, be ´wu kee.

¹² Sanngɛ sran'n i liɛ'n, sɛ ɔ wu'n, ɔ jaso-man kun. Sɛ ɔ ´tinnge ekun'n, wuun nyanmiɛn ng'ɔ wo é ti su yɛ'n ɔ'a sin. Kɛ ɔ la lɛ'n yɛ ɔ la-a.

*

¹³ Ee! Min Nyanmiɛn, sɛ ɔ ti kɛ a fa min fia blɔlɔ lɔ-ɔ yo ye'n, wuun n ´fia lɔ cɛ, wuun n ´fia lɔ lele san ɔ ya'n ɔ ´sin. I sin, a ´kle cɛn, sɛ ɔ ju'n, kpɛkuun ɔ́ wla ´kpɛn min su.

¹⁴ Sɛ ɔ ti kɛ sran wu-ɔ ɔ ba'n, wuun n ´tran m ´minndɛ kɛ junman difuɛ b'ɔ minndɛ lelee, kpɛkuun be fa sran kaci i'n sa .

¹⁵ Kpɛkuun blɛ nga a kleli kɛ sɛ ɔ ju-ɔ a ´wun min'n, sɛ ɔ ju nan a flɛ min'n n ´sro, afin n ti ɔ́ sa nuan like.

¹⁶ Sanngɛ ndɛ kɛ e ´se yɛ'n, a tɛ ka mín ja kwlaa nga n tu'n, yɛ a tɛ nian fɔnlɛ nga n fɔn'n.

¹⁷ Sɛ n kwla se'n, wuun n ´se kɛ a fa min sa tɛ mun a wla be bajɛ kun nun, a kɛtɛ i nuan, yɛ a ta be su nin laso.

*

¹⁸ Oka'm be bu be tɔ, kpɛkuun be nun kpacikpaci, kpangba'm be jaso be osu'n nun lɛ be kɔ.

¹⁹ Nzue ng'ɔ sonji'n, ɔ wiewie yɛbuɛ mun, yɛ ɔ didi asiɛ'n ɔ fa kɔ. Ɔ kusu, wɔ man sran i wla b'ɔ fa guɛ i like su'n, ɔ wie.

²⁰ A yi i ase, kpɛkuun ɔ'a ɔ mlɔnmlɔnmlɔn. A kaci i nyrun waka'n, kpɛkuun w'a kɛn i bo.

²¹ Sɛ i mma'm be ´nyan nyrun o! Ɔ si-man nun! Sɛ be ´yo be finfin o! Ɔ si-man nun.

²² San i bɔbɔ i afɛ liɛ'n kunngba yɛ ɔ si i-ɔ. San i bɔbɔ i nyrɛnnɛn liɛ'n kunngba yɛ ɔ wun i-ɔ.