Zɔb I Nyrɛnnɛn Wunlɛ 13 - NYANMIƐN NDƐ'N 1998

Zɔb i Zɔfar i su tɛlɛ'n i wie ekun yɛ: i waan ɔ nin Nyanmiɛn be ´ijɔ nan be ´ti be wun aniɛn

¹ I kwlakwla sɔ'n, m bɔbɔ m'an wun i le, yɛ m'an ti i le. N wun i wlɛ.

² Nga amun si i'n, n si i wie. Min sinnzin tra-man amun

³ Min ndɛ liɛ'n, n ´kan n ´kle Nyanmiɛn b'ɔ kwla like kwla yo'n. I nyrun yɛ n ´yi min ya liɛ'n i nglo-ɔ.

⁴ Afin amun liɛ'n, ato'n yɛ amun waan be `fa man amun nan amun `bua-a. Nán ayre yofuɛ'n i kpa'n i wie yɛlɛ amun.

⁵ Sɛ kɛ ɔ yo sɔ'n yɛ amun muan amun nuan'n, wuun be ´bu amun ngwlɛlɛfuɛ.

⁶ Amun `tie sa ng'ɔ yo min ya bɔ n su kan'n. Amun `tie n klun ya bɔ n su yi'n.

⁷ ?Nyanmiɛn i sin jranlɛ dunman nun ti amun ´kan sa ng'ɔ ti-man su'n? ?Amun ´bua ato i dunman nun?

⁸ ?Nyanmiɛn sin yɛ amun su jran-an? ?I ti li yɛ amun su kpli-ɔ?

⁹ ?Sɛ ɔ nian amun anwlɛn'n nun siin'n, ɔ ´wun sa kpa lɔ? ?Amun waan amun ´lɛkɛ i kɛ be laka klɔ sran'n sa?

¹⁰ Sɛ ɔ nian nan ɔ wun i kɛ sran sin yɛ amun jran'n, kannzɛ amun fa amun akunndan sɔ'n amun fa fia sɛ, san ɔ ´wun i, yɛ ɔ ´ijɔ amun.

¹¹ ?Famiɛn dan b'ɔ ti'n, ɔ yo-man amun sro? ?I sroesroe b'ɔ ti'n, ɔ kun-man amun srɛ?

¹² Amun ndɛ'm be nun kpakpa'm be ti kɛ ndutre sa. Be ti kɛ fa talɛ sa.

¹³ Amun `muan amún nuan, amun `yaci min man n ijɔ. Sɛ sa ɔ ´nyan min'n, man ɔ nyan min.

¹⁴ ?N ´sasa min nguan'n n ´yo i sɛ? N su sɛsɛ-mɛn i.

¹⁵ Sɛ Nyanmiɛn waan ɔ ´kun min'n, man ɔ kun min. Kannzɛ ɔ yo sɛ, i su yɛ n ´fa min wla'n n ´gua-a. Sɛ i li ɔ ko yo nan n ko kpli min ti i nyrun'n,

¹⁶ i liɛ'n, n ´fite nun. Afin sran ng'ɔ si-man Nyanmiɛn'n, ɔ kwla jrɛn-mɛn i nyrun.

¹⁷ Amun `tie min ndɛ mun kpa. Amun `sie amun su tie sa bɔ n yiyi nun'n.

¹⁸ Amun `nian, n su fa min ndɛ'n n ´kɔ jɔlɛ difuɛ'm bé ja su. N si jrɛiin kɛ min ndɛ yo fɛ.

¹⁹ ?Sran onin yɛ i waan ɔ ´bu min fɔ-ɔ? N su minndɛ. Sɛ min ndɛ yo-man fɛ'n, m ´muan mín nuan kpɛkuun sɛ ɔ ti wulɛ-ɔ, n ´wu.

*

²⁰ Sanngɛ min Nyanmiɛn, n ´srɛ wɔ like nnyɔn. Sɛ a man min'n, n su fia-man ɔ nyrun kun.

²¹ Yaci min yalɛ klelɛ beblebe'n, ɔ nin min wlanwlanlɛ'n.

²² Kpɛkuun ijɔ man n tɛ wɔ su, annzɛ kusu man n ijɔ nan tɛ min su.

²³ ?Fɔnlɛ nga n fɔnnin'n i nuan'n ɔ ti nnyɛ? ?Sa tɛ nga n yoli'n, i nuan'n ɔ ti nnyɛ? Fɔnlɛ nga n fɔnnin'n, ɔ nin sa tɛ nga n yoli'n, kan man n ti .

²⁴ ?Ɔ yo sɛ ti yɛ a kaci ɔ́ sin a si min bɔ a yo kɛ ɔ kpɔfuɛ yɛlɛ min sa nin-ɔn?

²⁵ ?Nnya bɔ aunngban'n fitɛ i kɔ'n yɛ ɔ waan a ´trɛ i-ɔ? ?Nnya kee'n yɛ a su i su sɔ-ɔ?

²⁶ A klɛ mín wun fluwa tɛ. Min gbanflɛn nun sa tɛ'n nga n yoli be'n, a wlɛ i trɔ a jin mín ti su.

²⁷ A fa jrɔkɔ a wla mín ja. Lika kwlaa nga n ´kɔ lɛ'n, san a ´nian min su kpan A klɛ mín ja osu'n kwlaa.

²⁸ Kɛ ɔ ´yo sɔ'n, wuun min wunnɛn'n ɔ ´kpɛkpɛ gua kɛ tannin bɔ nvɔlɛ'm b'a di'n sa, kɛ tralɛ bɔ kakaa'm b'a di'n sa.