Zɔb I Nyrɛnnɛn Wunlɛ 12 - NYANMIƐN NDƐ'N 1998

Zɔb tɛli Zɔfar i su

¹ Zɔb tɛli su kɛ:

² Amun yo sa-a, ɔ waan amun yɛ amun ijɔ sran'm be kwlaa bé nuan-an. Ɔ waan sɛ amun nun-man nun-ɔn, sran fi su si-man ngwlɛlɛ kun sa.

³ N si ngwlɛlɛ kɛ amun sa wie. Min sinnzin tra-man amun. ?Ndɛ nga amun ´kan be lɛ'n, wan yɛ ɔ si-man be-ɔ?

⁴ Kɛ n ´srɛ Nyanmiɛn'n, n lafi su kɛ ɔ ´tɛ min su. Kpɛkuun min yɛ min janvuɛ'm be su yo min finfin yɛ. Sran kpa bɔ be kwla saci-mɛn i wun kaan sa'n, yɛ be su yo i finfin yɛ.

⁵ Be nga sa nun-man be su'n, be ijɔlɛ yɛlɛ kɛ: «Afɛfuɛ'n ɔ nin finfin yolɛ yɛ ɔ fata-a.» I sɔ'n ti be nga bé ja kpla'n, sran sɔ'm be yo be finfin.

⁶ Sran nga be bu-man Nyanmiɛn like fi'n, be awlo'n ti fɔuun! Be bɔ be klɔklɔ Nyanmiɛn'n, be klun ti-man be. Be Nyanmiɛn liɛ'n yɛlɛ be fanngan bɔ be lɛ i'n.

*

⁷ Usa nnɛn mun nian, be ´man wɔ akunndan. Usa anunman mun, be fiti sa'm be su be ´kle wɔ.

⁸ Usa asiɛ'n, ɔ ´kle wɔ ngwlɛlɛ. Kpɛkuun usa jenvie'n nun jue mun nian, be ´kan wie kle wɔ.

⁹ ?Nnɛn'm be kwlaa nga be o lɛ'n, be nun kun wo lɛ b'ɔ si-man kɛ sa kwlaa ng'ɔ ju'n, ɔ fin Nyanmiɛn-ɔn?

¹⁰ Nyanmiɛn sa nun yɛ like kwlaa wo-ɔ. I sa nun yɛ sran'm be kwlaa be nguan'n wo-ɔ.

¹¹ Be kan ndɛ be se kɛ: «Be sukpɔ'n i junman yɛlɛ ndɛ'm be tilɛ, be taaman'n kusu i liɛ'n yɛlɛ ninnge'm bé fɛ'n i silɛ.

¹² Ngwlɛlɛ'n ɔ ti be bɔ bé ti ɔ'a bo je'n be liɛ, yɛ sa silɛ'n ɔ ti kpɛnngbɛn'm be junman.»

¹³ Sanngɛ Nyanmiɛn liɛ'n, ngwlɛlɛ'n nin kwlalɛ bɔ be kwla'n, ɔ nin sa silɛ'n i wafa'n kwlaa be ti i liɛ.

*

¹⁴ Like ng'ɔ ko bubu i'n, sran fi kwla kplɛn-mɛn i kun, sɛ ɔ to sran kun sin anuan'n, sran fi kwla tike-man.

¹⁵ Sɛ ɔ jran nzue'n, lika'n ɔ wu kee, sɛ ɔ tike nzue'n kusu'n, nzue sɔ'n ɔ fa lika wunmuan'n.

¹⁶ Fanngan'n ɔ nin sa cɛcɛ yolɛ'n ɔ ti i liɛ. Sran nga ɔ'a mlin'n, ɔ nin sran ng'ɔ mlin sran'n be o i sa nun.

¹⁷ Ɔ yo man siefuɛ'm be nanti bé ja ngbɛn, yɛ ɔ yo man jɔlɛ difuɛ'm be ngwlɛlɛ'n ɔ wie.

¹⁸ Ɔ yi famiɛn'm be cisu'n b'ɔ ti be sielɛ'n i nzɔliɛ'n, yɛ ɔ fa kanga'm be nyanman liɛ'n yɛ ɔ fa kaci i-ɔ.

¹⁹ Ɔ yo man i nyrun jranfuɛ'm be nanti bé ja ngbɛn, Ɔ yi be bɔ be sie sran'm be ase.

²⁰ Be bɔ be si ijɔ kpa'n, ɔ yo man be si-man ijɔ kun. Ɔ de be bɔ bé ti ɔ'a bo je'n be ngwlɛlɛ'n bé sa nun.

²¹ Ɔ kuakua sran dandan mun, ɔ yi kwlafuɛ'm be kwlalɛ cisu'n.

²² Kannzɛ like'n ɔ ti fiawa dan sɛ, sanngɛ ɔ yi i nglo. Kan aosin tuun'n wo lɛ'n, ɔ kpaja lɛ'n weiin.

²³ Ɔ yo man nvle'm be kɔ be nyrun, kpɛkuun ɔ yo man be nunnun. Ɔ yo man be trɛ, kpɛkuun ɔ yo man be nunfuɛ'm be yo kanga.

²⁴ Ɔ yo man nvle'm bé su kpɛnngbɛn'm be kaci sinnglinfuɛ, Ɔ yo man be wlan aawlɛ flɛnnɛn'n nun sa daan.

²⁵ Be nanti sa dududu aosin'n nun, be wun-man ase. Be nanti kɛ sran bɔ ɔ'a nɔn nzan ɔ'a bo'n sa.