Zɔb I Nyrɛnnɛn Wunlɛ 11 - NYANMIƐN NDƐ'N 1998

Zɔfar i ndɛ klikli b'ɔ kannin be'n

¹ Yɛ Zɔfar b'ɔ fin Naama'n waan:

² ?Sran kun ´ijɔ beblebe sa nan be su tɛ-mɛn i su? N si ijɔ'n ɔ kle-man kɛ min ndɛ yo fɛ.

³ ?Ɔ ijɔlɛ beblebe'n ti man sran'm be ´muan bé nuan? ?A yo sran'm be finfin sa lele be su nyan-man sran gua-man ɔ́ nyin ase?

⁴ A ko se kɛ: «Akunndan nga m bu'n, i kwlaa ti kpakpa ngunmin. N ti saun Nyanmiɛn nyrun.»

⁵ Sɛ ɔ ti kɛ Nyanmiɛn waan ɔ ´ijɔ'n, sɛ ɔ ti kɛ i waan ɔ ´kan ndɛ kle wɔ'n,

⁶ wuun ɔ ´yi i ngwlɛlɛ b'ɔ ti fiawa'n i nglo ´kle wɔ, kpɛkuun a ´wun kɛ i ngwlɛlɛ'n ɔ tra e liɛ'n su fuun! Yɛ a ´wun kɛ fɔ ng'ɔ tu wɔ'n, ɔ ju-man sa tɛ nga a yo be'm be nun.

*

⁷ ?Ɔ kpa'n, a kwla si Nyanmiɛn i bo ndɛ mun? ?Nyanmiɛn b'ɔ kwla like kwlaa yo'n i dan'n i wafa b'ɔ ti'n, a kwla wun i wlɛ?

⁸ Sɛ i dan sɔ b'ɔ ti'n ɔ ti like bɔ be wun i nin be nyinma'n, wuun n ´se kɛ i nglo-nglo tra nyanmiɛn b'ɔ sɛ é ti su yɛ'n i su. ?Sɛ ɔ ti sɔ'n, yɛ wuun a ´yo i sɛ? I kploun tra blɔlɔ lɔ lika'n. ?Sɛ ɔ ti sɔ'n, a ´yo sɛ nan w'a wun i wlɛ?

⁹ I tɛtrɛ'n ɔ tra asiɛ'n, yɛ ɔ tra jenvie'n.

¹⁰ ?Ɔ man sɛ Nyanmiɛn waan sran kun ɔ'a yo sa, nan ɔ ´fɛ i kɔ i bɔbɔ ja su ɔ ´di i jɔlɛ nan ɔ ´wlɛ i bisua'n, wan yɛ ɔ lɛ ndɛ kan-an?

¹¹ Afin ɔ si be nga be ti sa tɛ yofuɛ'n mun. Ɔ nian-nian cɛ-man nan ɔ'a wun sa tɛ'n.

¹² Sanngɛ ngwlɛlɛ fi nun-man klɔ sran'n i ti nun. Ɔ nin blo aflunmun ba'n, ngbaciɛ fi nun-man be afiɛn.

*

¹³ Ɔ man sɛ a kpɛ ɔ nyin Nyanmiɛn su'n, sɛ a man ɔ́ sa'n su a srɛ i'n,

¹⁴ sa tɛ nga a yoli b'ɔ man fiɛn kannin wɔ'n, sɛ a yo ɔ wun saun'n, sɛ a yi sa ng'ɔ ti-mɛn i nuan su'n wɔ awlo'n nun'n,

¹⁵ b'ɔ fiɛn nun-man ɔ́ wun kun'n, i liɛ'n, sɛ a man ɔ́ ti'n su-ɔ, ɔ ´yo ye siɛn'n. Like fi ´kwla yi-man wɔ ase kun, yɛ srɛ su kun-man wɔ kun.

¹⁶ Yɛ ɔ́ wla ɔ ´fi wɔ afɛ'n, ɔ ´yo kɛ nzue bɔ ɔ'a sonji ɔ'a wɔ'n sa.

¹⁷ Siɛn'n ɔ nguan'n, sɛ ɔ ti like bɔ be wun i nin be nyinma'n, wuun n ´se kɛ ɔ ´kpaja kɛ wia jran wia'n sa. Ɔ nguan'n nun aosin'n, ɔ ´kaci kɛ nglɛmun lika b'ɔ kpaja'n sa.

¹⁸ Kpɛkuun a su koko-man kun, afin ɔ wla'n ɔ ´gua ase. Kɛ a la'n, ɔ klun su titi-man wɔ kun, yɛlɛ kɛ a ´wun kɛ like'n kwlaa b'a sin be osu'n nun.

¹⁹ Sɛ a ´lafi'n, sran fi su kle-man wɔ yalɛ. Ɔ lakalɛ yɛ be wa laka wɔ siɛn'n nin-ɔn, kɛ ɔ ´yo nan w'a uka be'n ti.

²⁰ Sanngɛ sran nga be bu-man Nyanmiɛn like fi'n be ´minndɛ ukalɛ'n lele ngbɛn. Be su nyan-man fiawlɛ. Like nga be minndɛ i'n ɔ ti kunngba, yɛlɛ wie'n.