Zɔb I Nyrɛnnɛn Wunlɛ 1 - NYANMIƐN NDƐ'N 1998

Zɔb i sa nianlɛ klikli'n

¹ Laa Iz mɛn'n nun lɔ bian kun o lɔ be flɛ i kɛ Zɔb. Bian sɔ'n, be kwla saci-mɛn i wun bɔ kaan sa, ɔ yo sa i nuan su. I nyin yi Nyanmiɛn, ɔ klo-man kɛ ɔ `yo sa tɛ.

² Ɔ wuli ba yasua nso nin ba bla nsan.

³ Ɔ lɛ bua akpi nso (7.000), nin nyɔnngɔnmɛn akpi nsan (3.000), nin nannin nnyɔn-nnyɔn sɔ ya nnun, ɔ nin aflunmun bla ya nnun. I sa nun sran'm be sɔnnin kpa. Be nga be tran wia afiliɛ lɔ lika nun'n, i dunman'n fuli trali be kwlaa.

⁴ I mma yasua'm be kle cɛn be kɔ be nun kun awlo be ko di cɛn. Be yo i sɔ sin yia nun. Kɛ be ´yo i sɔ'n, be flɛ be niaan bla nsan mun. Be nin be yɛ be di like yɛ be nɔn nzan-an.

⁵ Kɛ be ko wie bé cɛn'n i di'n, Zɔb flɛ be yɛ ɔ yo bé saun. Kpɛkuun ɔ jaso nglɛmun ndɛ ɔ kun nnɛn yi tɛ nga be yrɛ i nnɛn'n kɔlikɔli'n. Ɔ yi tɛ sɔ'n i mma'm bé ti nun ti nun. Afin i waan: «N si-man sɛ min mma'm be yoli sa tɛ wie o! Sɛ be kannin Nyanmiɛn i ya o!» Kɛ Zɔb yo i sɔ titi-ɔ.

⁶ Le kun Nyanmiɛn i anz'm be ɔli i nyrun , kpɛkuun Satan ɔli wie.

⁷ Anannganman usali Satan kɛ: «?A fin nin?» Ɔ tɛli Anannganman su kɛ: «N fin asiɛ'n su lɔ wlan-wlanlɛ kan.»

⁸ Anannganman seli Satan kɛ: «?A wunnin min sufuɛ Zɔb i wafa ng'ɔ fa ti'n? Asiɛ'n su lɔ sran fi nin i sɛ-man. Ɔ ti sran bɔ be kwla saci-mɛn i wun bɔ kaan sa. Ɔ yo sa i nuan su. I nyin yi min. Ɔ klo-man kɛ ɔ `yo sa tɛ.»

⁹ Satan tɛli Anannganman su kɛ: «?Kɛlɛ a bu i kɛ Zɔb i nyin yi wɔ ngbɛn?

¹⁰ A sɛsɛ i, a sɛsɛ i awlo'n nin i bo ninnge'n kwlaa. Junman ng'ɔ di'n kwlaa a yo man ɔ yo ye. I nnɛn'm be tru mɛn wunmuan'n nun kpokpaa.

¹¹ Sɛ ɔ waan m bua ato'n, saci i sa nun ninnge mun nan nian, sɛ ɔ'a kan-man wɔ ndɛ tɛtɛ cɛ'n, a ko fa ko se.»

¹² Anannganman waan: «I sa nun ninnge mun yɛ be o lɛ-ɔ. N fa be n wlali ɔ́ sa nun, sanngɛ nán kɛn i bɔbɔ'n.» Yɛ Satan jasoli Anannganman nyrun lɛ ɔli-ɔ.

¹³ Le kun Zɔb i mma'm be o be niaan kpɛnngbɛn'n i awlo lɔ be su di like yɛ be su nɔn nzan.

¹⁴ Kpɛkuun sran ɔ'a a to Zɔb, i waan: «Nannin'm be o lɛ be ´tutu lika, aflunmun bla'm be o bé wun lɛ be ´didi,

¹⁵ kpɛkuun Sabefuɛ'm be wa tɔli bé su be trali be ɔli, be kunnin ɔ sufuɛ mun. N kunngba yɛ n nyannin mín ti n wanndili-ɔ, yɛ m ba ɔ kan klelɛ-ɔ!»

¹⁶ I nuan nian tɔ-man, kpɛkuun sran kun ekun ɔ'a a to Zɔb, i waan: «Nyanmiɛn i sin'n fin nyanmiɛn su lɔ, ɔ yrali bua mun, ɔ nin ɔ junman difuɛ mun. N kunngba yɛ n nyannin mín ti n wanndili-ɔ, yɛ m ba ɔ kan klelɛ-ɔ.»

¹⁷ I nuan nian tɔ-man, kpɛkuun sran kun ekun ɔ'a a to Zɔb, i waan: «Kaldefuɛ akpasua nsan be wa tɔli ɔ nyɔnngɔnmɛn'm bé su, be trali be ɔli, be kunnin ɔ sufuɛ mun. N kunngba yɛ n nyannin n ti n wanndili-ɔ, yɛ m ba ɔ kan klelɛ-ɔ.»

¹⁸ I nuan nian tɔ-man, kpɛkuun sran kun ekun ɔ'a ba, i waan: «Ɔ mma'm be o be niaan kpɛnngbɛn'n i sua lɔ, be su di like be nɔn nzan.

¹⁹ Kpɛkuun aunngban dan wie fin aawlɛ flɛnnɛn'n nun lɔ ɔ wa finnin sua'n i bue nnan'n. Sua'n bu tɔli gbanflɛn nin talua sɔ'm bé su, ɔ kunnin be. N kunngba yɛ n nyannin n ti n wanndili-ɔ, yɛ m ba ɔ kan klelɛ-ɔ.»

²⁰ Yɛ Zɔb jasoli-ɔ. Ɔ titili i wun tralɛ'm be nun. I sin, ɔ kpuli i ti'n su, yɛ ɔ bubu guali asiɛ wun gblo! Ɔ kotoli,

²¹ yɛ ɔ seli kɛ: «Kɛ n fin mín nin klun m ´ba'n, mín wun ngbɛn. N kɔlɛ su'n, mín sa ngbɛn yɛ n ´fa kɔ-ɔ. Anannganman yɛ ɔ mannin-ɔn, Anannganman yɛ ɔ'a fa-a. Man manmanlɛ'n ɔ yo i liɛ!»

²² Sa ng'ɔ o lɛ'n be kwlaa nun'n, Zɔb ɔ'a yo-man sa tɛ fi, yɛ i nuan ɔ'a to-man Nyanmiɛn.