Jean 8 - NYANMIƐN NDƐ'N 1998

Bla'n b'ɔ kunndɛli bian i wun bo'n

¹ Yɛ Jésus kusu ɔli Olivie Oka'n su lɔ-ɔ.

² Kɛ aliɛ cɛnnin nglɛmun kpa'n, ɔ sɛli i sin Nyanmiɛn i sua'n nun lɔ ekun. Sran'm be kwlaa be bɛli i wun lɛ. Ɔ trannin ase yɛ ɔ sɔli be like klelɛ'n su-ɔ.

³ Mmla klefuɛ mun nin Farizifuɛ'm be nin bla kun bɔ be wunnin i kɛ ɔ su kunndɛ bian i wun bo'n bali.

⁴ Be jrɛnnin i sran'm be afiɛn lɛ, be seli Jésus kɛ: «Nja, bla nga e ko trɛli i nin bian, ɔ su kunndɛ bian i wun bo.»

⁵ Moiz klɛli mmla'n nun kɛ bla ng'ɔ yo sa kɛ nga sa'n, e `fin i yɛbuɛ e kun i. ?Yɛ ɔ kusu, ɔ wan nzɛ ?

⁶ Be kɛnnin i sɔ kɛ be ´fa sɛ i nian nan be ´nyan sa wie jran su sɛnmɛn i. Sanngɛ Jésus kɛnnin i wun ase ɔ fɛ i sa klɛklɛ asiɛ wun.

⁷ Kɛ be tɛ usɛ i sa'n, ɔ mɛnnin i wun su, ɔ seli be kɛ: «Amun nun sran ng'ɔ nian yo-man sa tɛ kaan sa le'n, man ɔ dun mmua fin i yɛbuɛ.»

⁸ Yɛ ɔ kɛnnin i wun ase ɔ sɔ asiɛ i klɛklɛlɛ'n su ekun-ɔn.

⁹ Kɛ be tili ndɛ sɔ'n, be kpɛnngbɛn mun nga jao blɛlɛ kɔ nga jao blɛlɛ kɔ lele ɔ fa toli be kanngan mun, ɔ kali Jésus nin bla'n b'ɔ jin afiɛn lɛ'n.

¹⁰ Yɛ Jésus mɛnnin i wun su ɔ usɛli i kɛ: «?Mmo, be o nin? ?Sran fi a se-man kɛ ɔ ´kun wɔ?»

¹¹ Yɛ i waan: «Ɛɛn, Nja.» Yɛ Jésus seli i kɛ: «N kusu, n se-man kɛ be `kun wɔ. Kɔ, sanngɛ nán yo sɔ kun.»]

Jésus seli kɛ i yɛ ɔ kpaja mɛn nun-ɔn

¹² Jésus kan kleli be ekun kɛ i yɛ ɔ kpaja mɛn nun-ɔn. I waan sran ng'ɔ su i su'n, kpajalɛ sɔ'n b'ɔ man nguan'n, ɔ man ɔ ´wun ase, yɛ ɔ su nanti-man aosin'n nun le.

¹³ I sɔ'n ti, Farizifuɛ'm be seli i kɛ: «A yi ɔ bɔbɔ ɔ wun ayɛ, ɔ wun ndɛ nga a kan'n ti-man nanwlɛ.»

¹⁴ Jésus seli be kɛ: «Ɔ ti nanwlɛ kɛ n kan m bɔbɔ min wun ndɛ, kannzɛ n kɛn i sɔ'n, ɔ ti nanwlɛ, afin n si n finwlɛ nin n kɔwlɛ. Sanngɛ an si-man n finwlɛ nin n kɔwlɛ.

¹⁵ Amun liɛ'n, an kan sran wun ndɛ kɛ klɔ sran fa yo'n sa, sanngɛ n liɛ'n n kan-man sran wun ndɛ.

¹⁶ Sɛ sran nga an wun kɛ n ´kɛn i wun ndɛ'n, wuun ɔ ti nanwlɛ, afin nán n ngunmin yɛ n kan ndɛ sɔ nin-ɔn, sanngɛ sran ng'ɔ sunmannin min'n ɔ jin ń sin.

¹⁷ Be klɛli amun mmla'n nun kɛ, sɛ sran nnyɔn be kan ndɛ kun'n, ɔ ti nanwlɛ .

¹⁸ N kan m bɔbɔ min wun ndɛ, yɛ n Si b'ɔ sunmannin min'n, i kusu ti n lalofuɛ.»

¹⁹ I sɔ'n ti be usɛli i kɛ: «?Ɔ Si'n wo nin?» Jésus seli be kɛ: «An si-man min nin n Si'n. Sɛ an si min'n, wuun an si n Si kusu.»

²⁰ Kɛ Jésus ´kle like Nyanmiɛn i sua'n nun b'ɔ o sika guawlɛ'n i wun lɛ'n, yɛ ɔ kannin ndɛ sɔ nin-ɔn. Sran fi a trɛ-mɛn i, afin i cɛn'n nian ju-man.

Lika nga Jésus kɔ lɔ'n, be su kwla kɔ-man lɔ wie

²¹ Jésus seli be ekun kɛ: ɔ su kɔ, be wa kunndɛ i, sanngɛ bé sa tɛ'n ´ka bé wun be ´wu. I waan lika ng'ɔ kɔ lɔ'n, be su kwla kɔ-man lɔ wie.

²² Zuif'm be usali kɛ: «?Ɔ wa kun i wun ti yɛ ɔ se kɛ lika ng'ɔ kɔ lɔ'n e su kwla kɔ-man lɔ wie-ɔ?»

²³ Yɛ ɔ seli be kɛ: «An ti asiɛ'n su wafuɛ, n kusu n ti nglo lɔfuɛ, an ti mɛn nga nunfuɛ, n liɛ'n, n ti-man mɛn nga nunfuɛ.

²⁴ I sɔ'n ti yɛ n seli amun kɛ amún sa tɛ'n ´ka amun wun nan amun ´wu nin-ɔn, afin sɛ an lafi-man sran wafa nga n ti su'n, amún sa tɛ'n ´ka amun wun amun ´wu.»

²⁵ Be usɛli i kɛ: «?A ti ɔ liɛ sɛ?» Ɔ seli be kɛ: «Sran wafa nga n ti'n, yɛ n kan kleli amun i bo bolɛ nun nin-ɔn.

²⁶ Amún wun ndɛ kpanngban o lɛ bɔ n kwla kan n jran su bu amun fɔ. Sanngɛ sran ng'ɔ sunmannin min'n ti nanwlɛfuɛ ti ɔ man ndɛ ng'ɔ kan kleli min'n, i yɛ n kan-an.»

²⁷ B'a wun-mɛn i wlɛ kɛ i Si ndɛ yɛ ɔ kan kle be-ɔ.

²⁸ I sɔ'n ti ɔ seli be kɛ: «Cɛn nga an man m bɔ n kacili Sran'n n su'n, i cɛn sɔ'n nun yɛ amun ´si n wafa nga n ti nin-ɔn. I cɛn sɔ'n nun yɛ amun ´si kɛ m bɔbɔ n kpɛ-man n klun n yo-man like fi san ndɛ nga n Si kan kle min'n yɛ n kan-an.

²⁹ Sran ng'ɔ sunmannin min'n, ɔ jin ń sin. Ɔ'a jao-man ń sin, afin n yo i klun sa cɛn kwlaa.»

³⁰ Ndɛ sɔ'n bɔ Jésus kannin'n ti'n, sran kpanngban kpa be lafili i su.

Nanwlɛ'n ti amun ´nyan amún ti

³¹ Yɛ ɔ seli Zuif nga be lafi i su'n be kɛ: «Sɛ an fa min ndɛ nga n kan'n su kpa'n, wuun an ti n sɔnnzɔnfuɛ sakpa,

³² wuun amun ´si ndɛ ng'ɔ ti nanwlɛ'n, yɛ ndɛ nanwlɛ sɔ'n ti amun ´nyan amún ti.»

³³ Be seli i kɛ: «E ti Abraam anunman, e nian yo-man sran fi kanga le. ?Ɔ yo sɛ yɛ man a se kɛ, e ´nyan é ti nin-ɔn?»

³⁴ Jésus seli be kɛ: «Nanwlɛ, sɛ sa tɛ'n ti sran'n, wuun sran kwlaa ng'ɔ yo sa tɛ'n ɔ kaci i kanga.

³⁵ Kanga'n ka-man awlo kun nun titi, sanngɛ diewa ba'n ka awlo nun lɛ titi.

³⁶ Sɛ Nyanmiɛn Wa'n kpɔ amún ti'n, amun ´nyan amún ti mlɔnmlɔn.

³⁷ N si kɛ an ti Abraam anunman, sanngɛ an klo kɛ amun ´kun min, afin an fa-man ndɛ nga n kan'n su.

³⁸ Like nga n wunnin i mín Si wun lɔ'n, i ndɛ yɛ n kan-an, yɛ amun kusu, like nga amún si liɛ'n kleli amun'n, yɛ an yo-ɔ.»

Amún si yɛlɛ Satan

³⁹ Be seli i kɛ: «E si'n yɛlɛ Abraam.» Jésus seli be kɛ: «Sɛ Abraam wa yɛlɛ amun'n, wuun sa nga Abraam yoli be'n, amun ´yo wie.

⁴⁰ N kannin ndɛ nanwlɛ nga Nyanmiɛn kan kleli min'n n kleli amun, sanngɛ an klo kɛ amun ´kun min. Abraam a yo-man sa kɛ nga sa le.

⁴¹ Like nga amún si yo'n, i wie yɛ an yo-ɔ.» Be seli i kɛ: «Nán tekle ba yɛlɛ ye. E si ti kunngba cɛ, é si sɔ'n yɛlɛ Nyanmiɛn.»

⁴² Jésus seli be kɛ: «Sɛ Nyanmiɛn ti amun Si sakpa'n, wuun amun ´klo ń sa, afin n fin Nyanmiɛn wun lɔ, i dunman nun yɛ n wo wa-a. Nán n tiaun yɛ m bali-ɔ, i yɛ ɔ sunmannin min-ɔn.

⁴³ ?Nguɛ ti yɛ an wun-man ndɛ nga n kan kle amun'n i wlɛ-ɔ? Afin an klo-man kɛ an ´tie.

⁴⁴ Amún si'n yɛlɛ mmusu'm bé si Satan'n, yɛ an klo kɛ amun ´yo amún si sɔ'n i klun sa. Kɛ ɔ fin i bo bolɛ nun'n, ɔ ti sran kunfuɛ, ɔ di-man nanwlɛ mlɔnmlɔn, afin ɔ si-man nanwlɛ'n. Ɔ bua ato, afin ato'n ti i nzuɛn, ato'n ti i junman, i yɛ ɔ ti ato buafuɛ'm be si nin-ɔn.

⁴⁵ N liɛ'n, kɛ n di nanwlɛ n kle amun'n ti, an lafi-man n su.

⁴⁶ ?Amun nun onin yɛ ɔ kwla si i wue nun se kɛ n yoli sa tɛ-ɔ? ?Sɛ n di nanwlɛ'n, nguɛ ti yɛ an lafi-man n su-ɔ?

⁴⁷ Sran ng'ɔ ti Nyanmiɛn liɛ'n, ɔ tie ndɛ ng'ɔ kan'n. Kɛ bɔ an ti-mɛn i liɛ'n ti yɛ ndɛ ng'ɔ kan'n an ti-man nin-ɔn.»

Jésus nin Abraam

⁴⁸ Zuif'm be seli i kɛ: «?Kɛ e se wɔ kɛ a ti Samarifuɛ nan like wie su ɔ su'n, e ndɛ'n ti-man nanwlɛ?»

⁴⁹ Jésus seli be kɛ: «Like su-man n su, sran yɛ m bu n Si-ɔ, sanngɛ an bu-man n sran.

⁵⁰ N liɛ'n, m bɔbɔ n kunndɛ-man n dunman, sran kun yɛ man n nyan dunman-an, i yɛ ɔ ´kpɛ e nun-ɔn.

⁵¹ Nanwlɛ, sran ng'ɔ fa min ndɛ'n su'n, ɔ su wu-man mlɔnmlɔn.»

⁵² Zuif'm be seli i kɛ: «Siɛn'n, y'a wun i wlɛ kpa kɛ like wie su wɔ su. Abraam wuli, yɛ Nyanmiɛn nuan ijɔfuɛ'm be wuli, sanngɛ ɔ li ɔ waan sran ng'ɔ fa ɔ ndɛ'n su'n, ɔ su wu-man mlɔnmlɔn.

⁵³ ?A ti kpa tra e nannan Abraam b'ɔ wuli'n? Nyanmiɛn nuan ijɔfuɛ'm be kusu be wuli. ?Ɔ kpa'n, a bu ɔ wun sɛ?»

⁵⁴ Jésus seli kɛ: «Sɛ m bɔbɔ n dunman yɛ n kunndɛ'n, n su nyɛn-mɛn i. N Si bɔ amun waan ɔ ti amun Nyanmiɛn'n, i yɛ man n nyan dunman-an.

⁵⁵ Sanngɛ an si-mɛn i, n liɛ'n n si i. Sɛ n se kɛ n si-mɛn i'n, wuun n ti ato buafuɛ kɛ amun sa. Sanngɛ n si i, yɛ n fɛ i ndɛ'n su.

⁵⁶ Kɛ amun nannan Abraam bu kɛ ɔ ´wun mín cɛn'n, ɔ yo i fɛ dan, ɔ wunnin cɛn sɔ'n yɛ i klun jɔli .»

⁵⁷ Yɛ Zuif'm be seli i kɛ: «?Ɔ bɔ a nian di-man afuɛ ablenun'n, a wunnin Abraam?»

⁵⁸ Jésus seli be kɛ: «Nanwlɛ, kɛ be ´wu Abraam'n, wuun n wo lɛ .»

⁵⁹ I sɔ'n ti be isali yɛbuɛ kɛ be ´fa fin i, sanngɛ ɔ fin Nyanmiɛn i sua'n nun lɛ fiteli blɛlɛlɛ.