Jean 6 - NYANMIƐN NDƐ'N 1998

Sran akpi nnun (5.000) bɔ Jésus mannin be like be dili'n

¹ Kɛ ɔ yoli sɔ'n, Jésus ɔli Galile fɛtɛ'n bɔ be flɛ i Tiberiad fɛtɛ'n i bue kun lɔ.

² Sran kpanngban kpa be suli i su, yɛlɛ kɛ be wun tukpacɛfuɛ'm b'ɔ yoli be juejue atrɛ nun'n.

³ Jésus fuli kpɔlɛ kun su nan ɔ nin i sɔnnzɔnfuɛ'm b'a tran ase lɛ.

⁴ Kɛ ɔ ´yo sɔ'n, wuun Delɛ-cɛn b'ɔ ti Zuif'm bé cɛn'n ɔ'a mantan.

⁵ Jésus mɛnnin i ti'n su, ɔ wunnin sran kpanngban kpa be su bɛ i wun lɛ, yɛ ɔ usali Filip kɛ: «?Nin yɛ e ´nyan like e to man minniɛn nga mun be ´di-ɔ?»

⁶ Ɔ kɛnnin i sɔ kɛ ɔ ´fa kɛn i nian, afin i bɔbɔ si like ng'ɔ wa yo'n.

⁷ Filip seli i kɛ: «Sɛ e fa denie ya nnyɔn to kpaun e kpɛkpɛ nun bɔ kannganngan'n, ɔ su ju-man be ngba.»

⁸ Simɔn Piɛr i niaan bian Andre b'ɔ ti i sɔnnzɔnfuɛ kun'n ɔ seli i kɛ:

⁹ «Gbanflɛn kaan kun o wa, ɔ lɛ ɔrz kpaun nnun nin kpatra nnyɔn. ?Sanngɛ sran wlawla nga, ɔ ´ju be nin?»

¹⁰ Jésus seli kɛ: «An `se be man be kwlaa be gua ase.» Ijre kpanngban o lika sɔ'n nun lɛ, nan b'a gua ase su. Be nun yasua kaklaakla'm be ju akpi nnun (5.000).

¹¹ Jésus fali kpaun'n, kɛ ɔ lali Nyanmiɛn ase'n, ɔ fa cɛcɛli be. Ɔ fali kpatra ng'ɔ ju be'n cɛcɛli be sɔ ekun.

¹² Kɛ be ku yili'n, ɔ seli i sɔnnzɔnfuɛ'm be kɛ be isɛ i sinsin b'ɔ ka lɛ'n nan i wie fi a mlin-man.

¹³ Be isali ɔrz kpaun nnun bɔ be dili'n i onga'n gbogbo blu-nin-nnyɔn.

¹⁴ Kɛ sran'm be wunnin atrɛ sɔ'n bɔ Jésus yili'n, be seli kɛ: «Nanwlɛ, bian nga yɛ ɔ ti Nyanmiɛn nuan ijɔfuɛ bɔ be kɛnnin i ndɛ kɛ ɔ ´ba mɛn'n nun wa nin-ɔn .»

¹⁵ Kɛ Jésus wunnin kɛ be su wa trɛ sie i famiɛn'n, i ngunmin sɛ i sin ɔli kpɔlɛ'n su lɔ ekun.

Jésus i nzue'n su nantilɛ

¹⁶ Kɛ aliɛ jɔli'n, i sɔnnzɔnfuɛ'm be ɔli fɛtɛ'n nuan lɔ,

¹⁷ be fuli alie kun nun be kleli bé ti Kapɛrnaɔm bue liɛ'n su fɛtɛ'n bue kun lɔ. Kɛ ɔ ´yo sɔ'n, wuun lika'n ɔ'a dun, yɛ Jésus kusu nian to-man be lɔ.

¹⁸ Aunngban'n kpɛli kekle kpa, ɔ man nzue'n kejeli dan.

¹⁹ Kɛ be ɔli be juli kilo nnun annzɛ nsiɛn, bɔ be wun kɛ Jésus su nanti nzue'n su ba alie'n wun lɛ'n, srɛ kunnin be.

²⁰ Yɛ Jésus seli be kɛ: «Min-ɔn , nán srɛ kun amun!»

²¹ Ɔ man be klun jɔli nan b'a fɛ i, kpɛkuun alie'n ɔ sili, afin be juli kan be kɔ'n.

Sran'm be kunndɛli Jésus

²² Kɛ aliɛ cɛnnin'n, sran wlawla nga be kali nzue'n sin lɔ'n, bé wla kpɛnnin su kɛ alie'n kunngba cɛ yɛ ɔ o nzue'n nuan lɛ-ɔ. Jésus kusu ɔ'a fu-mɛn i sɔnnzɔnfuɛ'm bé sin, be ngunmin yɛ be ɔli-ɔ.

²³ Sanngɛ alie wie'm be fin Tiberiad be juli kan e Min'n lali Nyanmiɛn ase bɔ be dili kpaun lɛ'n.

²⁴ Kɛ sran sɔ'm be wunnin kɛ Jésus nin i sɔnnzɔnfuɛ'm be nun-man lɛ'n, be fuli alie sɔ'm be nun ɔli Jésus kunndɛlɛ Kapɛrnaɔm.

Jésus ti aliɛ b'ɔ man nguan

²⁵ Be ko toli i fɛtɛ'n bue kun lɔ, be usɛli i kɛ: «Baba, cɛn onin yɛ a bali wa-a?»

²⁶ Jésus seli be kɛ: «Nanwlɛ, sa ti bɔ an kunndɛ min'n, nán atrɛ bɔ an wunnin be'n ti-ɔ, sanngɛ like bɔ an dili bɔ amun ku yili'n ti-ɔ.

²⁷ Nán an di junman aliɛ b'ɔ saci'n ti, sanngɛ an `di junman aliɛ ng'ɔ saci-man b'ɔ man sran nyan anannganman nguan'n ti. Aliɛ sɔ'n, m bɔ n kacili Sran'n min yɛ n ´fa man amun-ɔn, afin min yɛ n ti sran bɔ e Si Nyanmiɛn kleli weiin kɛ ɔ jin n sin nin-ɔn.»

²⁸ Be usɛli i kɛ: «Nguɛ yɛ e `yo nan y'a kwla yo like ng'ɔ ti Nyanmiɛn klun su nin-ɔn?»

²⁹ Jésus seli be kɛ: «Like nga Nyanmiɛn klo kɛ an yo'n yɛlɛ nga: i waan an `lafi sran b'ɔ sunmɛnnin i'n su.»

³⁰ Ɔ man be usɛli i ekun kɛ: «Atrɛ onin yɛ a ´yi kle ye bɔ e ´wun i nan y'a lafi ɔ su-ɔ? ?Yɛ nguɛ like yɛ a wa yo-ɔ?

³¹ E nannan'm be dili mani aawlɛ flɛnnɛn nun lɔ, afin be klɛli i kɛ: ‹Ɔ mannin be nyanmiɛn su lɔ kpaun kɛ be `di .› »

³² Jésus seli be kɛ: «Nanwlɛ, nán Moiz yɛ ɔ fali nyanmiɛn su lɔ kpaun'n mannin amun-ɔn, sanngɛ n Si yɛ ɔ fali kpaun kpa b'ɔ fin nyanmiɛn su lɔ'n mannin amun-ɔn.

³³ Afin Nyanmiɛn i kpaun'n yɛlɛ m bɔ n fin nyanmiɛn su lɔ bɔ n yo man mɛnfuɛ'm be nyan nguan'n.»

³⁴ Be seli i kɛ: «Nannan, man e kpaun sɔ'n tititi.»

³⁵ Jésus seli be kɛ: «M bɔbɔ n ti kpaun b'ɔ man nguan. Sran ng'ɔ ba ń sin'n, awe su kun-mɛn i le, yɛ sran ng'ɔ lafi n su'n, nzue we su kun-mɛn i kun.

³⁶ N kan kleli amun kɛ: an wunnin min, sanngɛ ɔ nin i sɔ'n ngba'n, an lafi-man n su.

³⁷ Sran kwlaa nga n Si fa be man min'n be ´ba ń sin, ɔ man sran ng'ɔ ba ń sin'n, n su fuɛn-mɛn i,

³⁸ afin n fin nyanmiɛn su lɔ bali, m'an ba-man m bɔbɔ n klun sa yolɛ, sanngɛ sran ng'ɔ sunmannin min'n, i klun sa yɛ n yo-ɔ.

³⁹ An `nian, sran ng'ɔ sunmannin min'n, i like nga i waan n yo'n yɛ: sran ng'ɔ fa be mannin min'n be kwlaa'n, i waan nán m mlin be nun kun sa, sanngɛ n cɛn be mɛn'n i awieliɛ.

⁴⁰ An `nian, like nga n Si waan sran'm be nyɛn i'n yɛ: i waan sran kwlaa ng'ɔ wun i Wa'n b'ɔ lafi i su'n, ɔ ´nyan Anannganman nguan. Yɛ n ´cɛn i mɛn'n i awieliɛ.»

⁴¹ Kɛ ɔ se be kɛ ɔ ti kpaun b'ɔ fin nyanmiɛn su lɔ jrali'n ti Zuif'm be kɛnnin i wun ndɛ.

⁴² Be seli kɛ: «Nán Jésus bɔ e si i si Zozɛf nin i nin nin-ɔn? ?Ɔ yo sɛ yɛ i waan ɔ fin nyanmiɛn su yɛ ɔ bali-ɔ?»

⁴³ Jésus seli be kɛ: «An `yaci amun konviabo ijɔlɛ'n.

⁴⁴ Sran fi kwla ba-man ń sin san be nga n Si b'ɔ sunmannin min'n ɔ man be ba ń sin'n, be yɛ n ´cɛn be mɛn'n i awieliɛ-ɔ.

⁴⁵ Nyanmiɛn nuan ijɔfuɛ'm be klɛli i kɛ: ‹Nyanmiɛn wa kle be kwlaa be like .› Sran kwlaa ng'ɔ ti n Si i ndɛ'n b'ɔ fa su'n, ɔ ´ba ń sin.

⁴⁶ Nán kɛ sran wie a wun n Si le ti-ɔ, san min bɔ Nyanmiɛn sunmannin min'n, min yɛ m'an wun i le-ɔ.

⁴⁷ Nanwlɛ, sran ng'ɔ lafi n su'n, ɔ lɛ Anannganman nguan.

⁴⁸ M bɔbɔ n ti kpaun b'ɔ man nguan.

⁴⁹ Amun nannan'm be dili mani aawlɛ flɛnnɛn nun lɔ, be wuli.

⁵⁰ Sanngɛ kpaun ng'ɔ fin nyanmiɛn su lɔ'n, sɛ sran di'n, ɔ su wu-man.

⁵¹ M bɔbɔ n ti kpaun b'ɔ man nguan, n fin nyanmiɛn su lɔ yɛ m bali-ɔ. Sran ng'ɔ di kpaun sɔ'n wie'n, ɔ su wu-man mlɔnmlɔn, min nnɛn'n yɛ ɔ ti kpaun sɔ'n bɔ n ´fa man nin-ɔn. N ´fa man sɔ nan mɛnmɛnfuɛ'm be `nyan nguan.»

⁵² I sɔ'n ti'n, akplowa tɔli Zuif'm be afiɛn, be seli kɛ: «Ɔ yo sɛ yɛ i li waan ɔ kwla fɛ i wun man e kɛ e di-ɔ?»

⁵³ Jésus seli be kɛ: «Nanwlɛ, sɛ amu'an di-man m bɔ n kacili Sran'n min nnɛn'n, yɛ sɛ amu'an nɔn-man min mmoja'n, an su nyan-man nguan.

⁵⁴ Sran ng'ɔ di min nnɛn'n nan ɔ nɔn min mmoja'n, ɔ lɛ Anannganman nguan, yɛ n ´cɛn i mɛn'n i awieliɛ,

⁵⁵ afin min nnɛn'n ti aliɛ kpa yɛ min mmoja'n ti like kpa bɔ be nɔn-ɔn.

⁵⁶ Sran ng'ɔ di min nnɛn'n b'ɔ nɔn min mmoja'n, wuun min nin i y'a kaci sran wunmuan, e su ti-man nun.

⁵⁷ Kɛ n Si b'ɔ lafi-man'n ɔ sunmannin min'n, bɔ i ti yɛ n wo lɛ'n, sran nga kusu b'ɔ di min nnɛn'n, n ti ɔ ´tran lɛ.

⁵⁸ Kpaun ng'ɔ fin nyanmiɛn su lɔ'n yɛ, ɔ ti-man kɛ nga amun nannan'm be dili bɔ be wuli'n sa. Sran ng'ɔ di kpaun sɔ'n, ɔ su wu-man mlɔnmlɔn.»

⁵⁹ Ndɛ nga kɛ Jésus ´kle like Kapɛrnaɔm lɔ Nyanmiɛn ndɛ suanlɛ nin i srɛlɛ sua nun'n ɔ kannin'n yɛ ɔ o lɛ-ɔ.

Anannganman nguan'n i ndɛ

⁶⁰ Kɛ be tili ndɛ sɔ'n, i sɔnnzɔnfuɛ'm be nun kpanngban be seli kɛ: «Ndɛ nga ti kekle. ?Wan yɛ ɔ kwla fa su-ɔ?»

⁶¹ Kɛ Jésus si kɛ ndɛ sɔ'n ti i sɔnnzɔnfuɛ'm be su ijɔ be konviabo'n, ɔ usali be kɛ: «Ndɛ sɔ'n bo amún wla?

⁶² ?Sɛ an wun kɛ m bɔ n kacili Sran'n n su fu kan n wo lɔ laa'n, amun ´yo amun wun sɛ?

⁶³ Nyanmiɛn Wawɛ'n yɛ ɔ man nguan nin-ɔn, be wunnɛn'n kwla yo-man like fi. Ndɛ nga n kan kleli amun'n be ti Nyanmiɛn Wawɛ'n liɛ, be man nguan.

⁶⁴ Sanngɛ sran wie'm be o amun nun bɔ be su lafi-man su. Afin kɛ ɔ fin i bo bolɛ nun'n, Jésus si be nga be su lafi-mɛn i su'n nin sran ng'ɔ ´fɛ i man sran mun'n.»

⁶⁵ Yɛ ɔ seli kɛ: «I sɔ'n ti yɛ n seli amun kɛ sran nga n Si a mɛn-mɛn i atin kɛ ɔ bla ń sin'n ɔ kwla ba-man nin-ɔn.»

⁶⁶ Kɛ ɔ fin lɛ'n, i sɔnnzɔnfuɛ'm be nun kpanngban be tili bé wun b'a su-mɛn i su kun.

⁶⁷ I sɔ'n ti'n, Jésus usɛli i sɔnnzɔnfuɛ blu-nin-nnyɔn'm be kɛ: «?Amun li, an kɔ-man wie? »

⁶⁸ Yɛ Simɔn Piɛr seli i kɛ: «Wan sin yɛ e ´kɔ-ɔ? Ɔ ndɛ'n yɛ man e nyan anannganman nguan-an.

⁶⁹ E lafi su yɛ e si kɛ a ti Nyanmiɛn i Sran.»

⁷⁰ Jésus usali be kɛ: «Amun sran blu-nin-nnyɔn'n, nán min yɛ n fali amun-ɔn? » Sanngɛ ɔ nin i sɔ'n ngba'n, kɛ min yɛ n fali amun'n, amun nun kun ti mmusu'm bé si Satan'n i sran.

⁷¹ Simɔn Iskariɔt i wa Zidas b'ɔ ti i sɔnnzɔnfuɛ blu-nin-nnyɔn'm be nun kun b'ɔ wa fɛ i man sran mun'n i ndɛ yɛ ɔ kan-an.