Jean 3 - NYANMIƐN NDƐ'N 1998

Jésus nin Nikodɛm be yalɛ kokolɛ

^1-2 Bian kun o lɛ, le kun kɔnguɛ ɔ ɔli Jésus wun lɔ. Be flɛ bian sɔ'n kɛ Nikodɛm, ɔ ti Farizifuɛ'm be nun kun, Zuif'm be kpɛnngbɛn'n kun-ɔn. Ɔ seli Jésus kɛ: «Baba, e si kɛ a ti ninnge klefuɛ kun bɔ Nyanmiɛn yɛ ɔ sunmannin wɔ-ɔ, afin sran nga Nyanmiɛn jin-mɛn i sin'n, ɔ kwla yi-man atrɛ nga a yi be'n be wie. »

³ Jésus seli i kɛ: «Nanwlɛ, sran nga b'a wu-mɛn i ekun'n, ɔ su kwla yo-man mɛn nga Nyanmiɛn sie'n i nunfuɛ mlɔnmlɔn.»

⁴ Nikodɛm kusu seli i kɛ: «?Sɛ sran kun yo kpɛnngbɛn'n ɔ ´yo sɛ yɛ be ´kwla wu i ekun-ɔn? ?Ɔ kwla sɛ i sin i nin klun nan b'a wu i ekun?»

⁵ Yɛ Jésus seli i kɛ: «Nanwlɛ, sɛ sran i awuliɛ'n fin-man nzue nin Nyanmiɛn Wawɛ'n, ɔ su kwla yo-man mɛn nga Nyanmiɛn sie'n i nunfuɛ .»

⁶ Sran nga klɔ sran wu i'n, ɔ ti klɔ sran, yɛ nga Nyanmiɛn Wawɛ'n wu i'n, ɔ ti i liɛ.

⁷ Kɛ n seli wɔ kɛ: San be ´wu amun ekun'n, nɛ́n i sɔ'n bo ɔ́ nuan.

⁸ Aunngban'n fita kan ɔ klo'n, a ti i ngan, sanngɛ a si-mɛn i finwlɛ nin i kɔwlɛ. Sran kwlaa nga Nyanmiɛn Wawɛ'n wu i'n, kɛ ɔ ti sɔ-ɔ.

⁹ Yɛ Nikodɛm usɛli i kɛ: «?Ɔ ´yo sɛ yɛ sa sɔ'n kwla yo-ɔ?»

¹⁰ Jésus seli i kɛ: «?Wɔ bɔ a ti Izraɛlfuɛ'm be ninnge klefuɛ dan'n, a wun-man sa nga wlɛ?»

¹¹ Nanwlɛ, sa nga e si i'n nin nga e wunnin i'n, yɛ e kɛn i ndɛ kle amun-ɔn, sanngɛ an fa-man e ndɛ'n su.

¹² ?Kɛ bɔ n kan sa ng'ɔ yo asiɛ'n su wa'n be ndɛ kle amun bɔ an lafi-man su'n, sɛ n kan sa ng'ɔ yo nyanmiɛn su lɔ'n be ndɛ kle amun'n, ɔ ´yo sɛ yɛ amun ´lafi su-ɔ?

¹³ Sran fi nian ɔ-man nyanmiɛn su lɔ le san m bɔ n kacili Sran'n bɔ n fin lɔ bali'n.

¹⁴ Kɛ Moiz sieli wuo kun nglo aawlɛ flɛnnɛn nun lɔ'n , i kunngba'n, san be ´man m bɔ n kacili Sran'n n su sɔ

¹⁵ nan sran kwlaa ng'ɔ lafi n su'n, ɔ `nyan Anannganman nguan.

¹⁶ Afin Nyanmiɛn kloli mɛn'n lele ɔ fɛ i Wa kunngba cɛ'n mannin nan sran kwlaa ng'ɔ lafi i su'n ɔ'a mlin-man, sanngɛ ɔ `nyan Anannganman nguan.

¹⁷ Afin Nyanmiɛn ɔ'a sunmɛn-mɛn i Wa'n mɛn'n nun kɛ ɔ wa di jɔlɛ, sanngɛ ɔ sunmɛnnin i kɛ ɔ bla nan mɛnfuɛ'm be ´nyan bé ti.

¹⁸ Sran ng'ɔ lafi i su'n, be bu-mɛn i fɔ, sanngɛ sran nga ɔ'a lafi-mɛn i su'n, Nyanmiɛn a dun mmua bu i fɔ, afin ɔ'a lafi-man m bɔ n ti i Wa kunngba cɛ'n n su.

¹⁹ An `nian sa ti yɛ ɔ bu be fɔ sɔ'n yɛ: i b'ɔ ti kɛ wia sa'n, ɔ bali mɛn'n nun, sanngɛ sran'm be kloli aosin'n trali wia'n be nzuɛn tɛtɛ'n ti .

²⁰ Sran kwlaa ng'ɔ ti sa tɛ yofuɛ'n, ɔ klo-man wia'n mlɔnmlɔn, ɔ fite-man weiin nun, afin ɔ klo-man kɛ be wun i nyoliɛ tɛtɛ'n.

²¹ Sanngɛ sran ng'ɔ yo sa kpa'n, ɔ fite weiin nun nan be `wun kɛ sa ng'ɔ yo'n ti Nyanmiɛn klun su.

Zan batɛm yofuɛ'n i Jésus ndɛ kanlɛ ekun

²² Kɛ ɔ yoli sɔ'n, Jésus nin i sɔnnzɔnfuɛ'm be ɔli Zide mɛn'n nun, be trannin lɔ, yɛ ɔ yoli sran'm be batɛm.

²³ Zan kusu yo sran'm be batɛm lika bɔ be flɛ i Enɔn b'ɔ mantan Salim lɔ'n nun, afin nzue'n sɔnnin lɛ. Sran'm be bɛ i wun lɛ kɛ ɔ yo be batɛm.

²⁴ Kɛ ɔ ´yo sɔ'n, wuun be nian wla-man Zan bisua.

²⁵ Akplowa kun tɔli Zan sɔnnzɔnfuɛ'm be nun wie be nin Zuif kun be afiɛn wunnzinlɛ wafa nga sran'm be wunnzin'n su.

²⁶ Be ɔli Zan wun lɔ be ko seli i kɛ: «Baba, nian bian'n b'ɔ nin wɔ o Zurdɛn'n sin lɔ'n, bɔ a kɛnnin i ndɛ'n, ɔ su yo sran'm be batɛm, be kwlaa b'a wie i sin kɔ.»

²⁷ Zan seli be kɛ: «Like nga Nyanmiɛn a man-man sran kun'n, ɔ nyɛn-mɛn i.

²⁸ Sɛ amun waan amun ´di i nanwlɛ'n, wuun amun ´di. N seli amun kɛ nán min yɛ n ti Krist nin-ɔn, sanngɛ Nyanmiɛn sunmannin n kɛ n dun mmua i nyrun .

²⁹ Atɔnvlɛ bla'n ti bian b'ɔ su fa atɔnvlɛ'n i liɛ, sanngɛ bian'n i janvuɛ'n b'ɔ jin lɛ'n, ɔ tie i ndɛ ng'ɔ kan'n, kɛ ɔ ti i nɛn'n, i klun jɔ dan, n kusu kɛ n klun liɛ'n wa jɔ dan sɔ-ɔ .

³⁰ Man i dunman liɛ'n fu, yɛ man n liɛ'n kan ase .»

Sran ng'ɔ fin nyanmiɛn su lɔ'n

³¹ Sran ng'ɔ fin nglo lɔ'n, i yɛ ɔ sie like'n kwlaa-a, sran ng'ɔ fin asiɛ'n su wa'n, ɔ ti asiɛ'n su wafuɛ, yɛ ɔ kan asiɛ'n su wa ninnge'm be ndɛ. Sran ng'ɔ fin nyanmiɛn su lɔ'n, i yɛ ɔ sie like'n kwlaa-a,

³² ɔ kan like ng'ɔ wunnin be b'ɔ tili'n be be ndɛ, sanngɛ sran fi fɛ-mɛn i ndɛ'n su.

³³ Sran ng'ɔ fɛ i ndɛ'n su'n, ɔ si weiin kɛ Nyanmiɛn ti nanwlɛfuɛ,

³⁴ afin sran nga Nyanmiɛn sunmɛnnin i'n, Nyanmiɛn ndɛ'n yɛ ɔ kan-an i Wawɛ'n b'ɔ fa mɛn i b'ɔ niɛn-mɛn i sin'n ti .

³⁵ E Si Nyanmiɛn klo i Wa'n, yɛ ɔ fali like'n kwlaa wlɛli i sa nun .

³⁶ Sran ng'ɔ lafi i Wa'n su'n, ɔ lɛ Anannganman nguan, sanngɛ sran nga i nyin yi-mɛn'n, ɔ nyan-man nguan le, sanngɛ i wun ya o Nyanmiɛn klun .