Jean 21 - NYANMIƐN NDƐ'N 1998

Jésus yi i wun kleli i sɔnnzɔnfuɛ nso

¹ Kɛ ɔ yoli sɔ'n, Jésus fɛ i wun kleli i sɔnnzɔnfuɛ mun ekun Tiberiad fɛtɛ'n nuan lɔ. An `nian i wun wafa ng'ɔ yi kleli be'n yɛ:

² Simɔn Piɛr, nin Tomas bɔ be flɛ i Nda'n, nin Natanaɛl b'ɔ fin Kana, Galile mɛn nun'n, nin Zebede mma mun yɛ Jésus i sɔnnzɔnfuɛ nnyɔn ekun be o lika kun.

³ Simɔn Piɛr seli be kɛ ɔ su kɔ lala gualɛ. Be seli i kɛ: «E nin wɔ e ´kɔ.» Be fite be ko fuli alie'n nun ɔli, sanngɛ b'a nyan-man like fi kɔnguɛ sɔ'n.

⁴ Kɛ aliɛ'n wa cɛn'n, Jésus o nzue'n i nuan'n su lɛ, sanngɛ i sɔnnzɔnfuɛ'm be si-man kɛ i-ɔ.

⁵ Jésus usali be kɛ: «?Gbanflɛn mun, amu'an nyan-man kpatra'n wie?» Be waan: «Ɛɛn.»

⁶ Ɔ seli be kɛ: «An `gua lala'n alie'n i fama su, amun ´nyan wie.» Be guali, kpɛkun kpatra'n i kpanngban'n ti be kwlɛ-man lala'n i cuɛn kun.

⁷ Yɛ sɔnnzɔnfuɛ nga Jésus klo i'n ɔ seli Piɛr kɛ: «E Min nin-ɔn!» Kɛ Simɔn Piɛr tili kɛ e Min'n, ɔ fɛ i tralɛ'n blɛblɛli i bo, afin i wun ti kplɛn, nan ɔ'a tɔ nzue'n nun.

⁸ I sɔnnzɔnfuɛ kun'm be nin alie'n yɛ be ba-a. Be cuɛn lala'n, kpatra sɔnnin nun kpa yɛ be ba-a, afin be nin cenje'n mantan, be nin i i afiɛn'n ɔ ju mɛtri ya.

⁹ Kɛ be jrali'n, be ´nian-an sin yɛ, kpatra o su yɛ kpaun o lɛ.

¹⁰ Jésus seli be kɛ: «An `fa kpatra'n bɔ an fin i tralɛ'n wie bla. »

¹¹ Simɔn Piɛr fuli alie'n nun, ɔ yili lala'n guɛli i ase, kpatra dandan ya ablenun-nin-nsan o nun. Ɔ nin be sɔnlɛ sɔ'n ngba, sanngɛ lala ɔ'a ti-man.

¹² Jésus seli be kɛ: «An `bla be wa di like.» Sanngɛ i sɔnnzɔnfuɛ'm be nun kun sa a trɛ-mɛn i anwlɛn a usɛ-mɛn i kɛ: «?Ɔ waan-an?» Afin be ngba be si kɛ be Min nin-ɔn.

¹³ Jésus wunngeli lɛ nan ɔ'a fa kpaun'n nin kpatra'n ɔ'a man be.

¹⁴ Kɛ Jésus cɛnnin'n, i kpɛ nsan su b'ɔ ´fɛ i wun kle i sɔnnzɔnfuɛ mun'n yɛlɛ ng'ɔ o lɛ'n.

Jésus nin Piɛr

¹⁵ Kɛ be wieli like di'n, Jésus usali Simɔn Piɛr kɛ: «?Zan wa Simɔn, a klo min tra be nga mun?» Ɔ tɛli i su kɛ: «Ɛɛn! Nannan, a si kɛ n klo wɔ.» Yɛ Jésus seli i kɛ: «Nian m bua mma'm be lika!»

¹⁶ Ɔ usɛli i ekun kɛ: «?Zan wa Simɔn, a klo min?» Piɛr seli i kɛ: «Ɛɛn! Nannan, a si kɛ n klo wɔ.» Jésus seli i kɛ: «Nian m bua'm be lika.»

¹⁷ Ɔ usɛli i kpɛ kun ekun kɛ: «?Zan wa Simɔn, a klo min?» I kpɛ nsan su liɛ'n b'ɔ usali i'n, ɔ yoli Piɛr ya yɛ ɔ tɛli su kɛ: «Nannan, a si sa'n kwlaa, a si kɛ n klo wɔ.» Jésus seli i kɛ: «Nian m bua'm be lika.»

¹⁸ Nanwlɛ, kɛ a tɛ yo gbanflɛn'n, ɔ bɔbɔ a fa ɔ kplo'n ci ɔ bo, yɛ a kɔ lika nga a klo'n, sanngɛ a wa yo kpɛnngbɛn'n, yɛ a ´tinngɛ ɔ́ sa'n nun, sran wie yɛ ɔ ´fa ɔ kplo'n ci ɔ bo-ɔ, yɛ ɔ ´fa wɔ kɔ lika nga a klo-man'n.

¹⁹ Ɔ kɛnnin i sɔ kɛ ɔ ´fa kle wulɛ nga Piɛr wa wu b'ɔ man Nyanmiɛn ´nyan kɔmin'n. Kɛ i nuan tɔli'n, ɔ seli i kɛ: «Su n su.»

Jésus nin i sɔnnzɔnfuɛ ng'ɔ klo i kpa'n

²⁰ Piɛr kpɛli i nyin nan ɔ'a wun Jésus i sɔnnzɔnfuɛ ng'ɔ klo i kpa'n bɔ kɛ be ´di like'n ɔ kisa Jésus wue nun'n, ɔ usɛli i kɛ: «?Nannan, wan yɛ ɔ ´fa wɔ man sran mun-ɔn?»

²¹ Kɛ Piɛr wunnin i'n, ɔ usali Jésus kɛ: «?Nannan, yɛ nga li?»

²² Yɛ Jésus tɛli i su kɛ: «?Sɛ n klo kɛ ɔ tran lɛ lele man ɔ fa ju m balɛ'n, ɔ ndɛ o nun? Ɔ li, su n su.»

²³ Ɔ man ndɛ sɔ'n truli e niaan'm be afiɛn kɛ i waan i sɔnnzɔnfuɛ sɔ'n su wu-man. Sanngɛ Jésus a se-man Piɛr kɛ ɔ su wu-man, i waan, sɛ ɔ klo kɛ ɔ tran lɛ man ɔ fa ju i balɛ'n, i ndɛ nun-man nun.

²⁴ I sɔnnzɔnfuɛ kunngba sɔ'n yɛ ɔ kannin like sɔ'm be ndɛ yɛ ɔ klɛli be-ɔ. Ɔ man e si kɛ ndɛ ng'ɔ kannin'n ti nanwlɛ.

²⁵ Jésus yoli like wie mun ekun kpanngban kpa bɔ m bu i kɛ sɛ be waan be ´klɛ be kunngunngun'n, bé wun fluwa'm be su sɔn-man mɛn'n nun.