Jean 2 - NYANMIƐN NDƐ'N 1998

Kana lɔ atɔnvlɛ falɛ

¹ Kɛ ɔ yoli sɔ b'ɔ dili le nsan'n, sran wie waan ɔ su fa atɔnvlɛ Kana lɔ, Galile mɛn'n nun. Jésus i nin'n wo lɛ wie.

² Be yiali Jésus nin i sɔnnzɔnfuɛ mun atɔnvlɛ sɔ'n bo wie.

³ Kɛ nzan'n wieli'n, Jésus i nin'n seli i kɛ: «Be nzan'n ɔ'a wie.»

⁴ Jésus seli i kɛ: «?Mmo, nguɛ ti yɛ a kan kle min-ɔn? Ɔ nian ju-man n like yolɛ ka .»

⁵ Yɛ i nin seli aliɛ isafuɛ'm be kɛ: «Like kwlaa ng'ɔ se amun kɛ an yo'n, an `yo.»

⁶ Yɛbuɛ sɛ nsiɛn o lɛ bɔ kun kwla ju litri ablaɔcuɛ annzɛ litri ya litri ablaɔn, be gua nun nzue yɛ Zuif'm be fa kplo be wun fiɛn-ɔn, afin ɔ ti be nzuɛn.

⁷ Jésus seli aliɛ isafuɛ'm be kɛ: «An `gua sɛ nga'm be nun nzue man be yi.» Yɛ be guali be nun lele be yili-ɔ.

⁸ Yɛ ɔ seli be ekun kɛ: «An `sa wie fa ko man sran ng'ɔ nian aliɛ'n su'n,» yɛ be sali fa ko mɛnnin i-ɔ.

⁹ Kɛ aliɛ'n i sunianfuɛ'n wɔli nzue b'ɔ kacili nzan'n su'n, ɔ si-man kan ɔ fin'n, sanngɛ aliɛ isafuɛ'm bɔ be yɛ be sali'n, be si kan ɔ fin'n.

¹⁰ Aliɛ'n i sunianfuɛ'n flɛli atɔnvlɛ fafuɛ'n, yɛ ɔ seli i kɛ: «Nian, sran kwlaa dun mmua man sran'm be nzan kpafuɛ'n. Kɛ b'a nɔn bɔ be ku a yi'n yɛ ɔ man be ng'ɔ yo-man fɛ kpa nin-ɔn. Sanngɛ ɔ liɛ'n, w'a fa nzan kpafuɛ'n w'a sie lele yɛ ɔ'a fa ju yɛ.»

¹¹ Sa sɔ'n yoli Kana lɔ. Galile mɛn'n nun. Yɛ ɔ ti atrɛ bɔ Jésus yili be'n be nun klikli nin-ɔn. Ɔ yili i wun nglo yɛ i sɔnnzɔnfuɛ'm be lafi i su-ɔ .

¹² Kɛ ɔ yoli sɔ'n, ɔ nin i nin, nin i niaan bian mun, ɔ nin i sɔnnzɔnfuɛ mun be ɔli Kapɛrnaɔm, sanngɛ b'a cɛ-man lɔ.

Aata difuɛ'm be Nyanmiɛn i sua'n nun fuanlɛ

¹³ Kɛ Zuif'm be Delɛ-cɛn'n wa ju'n, Jésus ɔli Zerizalɛm.

¹⁴ Ɔ toli be nga be su yo nannin, nin bua, ɔ nin okunmomo atɛ'n Nyanmiɛn i sua'n nun lɔ be lɛ. Ɔ toli sika kacifuɛ'm bɔ be titi lɛ'n be lɛ wie.

¹⁵ Ɔ fa nyanman wɔli ngble, yɛ ɔ fa kannin be kwlaa be nin be bua mun, nin be nannin mun be bo, yɛ ɔ guali sika kacifuɛ'm be sika'n i ase, ɔ su be tabli'm be bo guali.

¹⁶ Yɛ ɔ seli okunmomo atɛ yofuɛ'm be kɛ: «An `yi ninnge nga'm be wa! Nán an fa n Si i sua'n kaci aata diwlɛ .»

¹⁷ Kɛ ɔ yoli sɔ'n, i sɔnnzɔnfuɛ'm bé wla kpɛnnin ndɛ nga be klɛli i kɛ: «Ɔ sua'n i klolɛ'n ɔ'a kun n kpo'n» su .

¹⁸ Zuif'm be usɛli i kɛ: «?Nguɛ atrɛ yɛ a wa yi kle e ti yɛ a yo sɔ-ɔ?»

¹⁹ Yɛ Jésus seli be kɛ: «Sɛ an saci Nyanmiɛn i sua nga'n, i le nsan su'n n ´kplɛn i ekun.»

²⁰ Zuif'm be seli kɛ: «Kɛ be sɔli i kplanlɛ su'n, i afuɛ ablanan-nin-nsiɛn yɛ. ?Yɛ ɔ liɛ su a ´fa le nsan kplan-an?»

²¹ Sanngɛ i wunnɛn b'ɔ fa sunnzun Nyanmiɛn i sua'n i ndɛ yɛ ɔ kɛn i sɔ-ɔ.

²² Ɔ man kɛ ɔ cɛnnin'n, i sɔnnzɔnfuɛ'm bé wla kpɛnnin su kɛ ɔ seli be sɔ, ɔ man be lafili Nyanmiɛn Ndɛ nga be klɛli'n nin ndɛ ng'ɔ kan kleli be'n su .

Jésus si sran klun lɔ akunndan'n

²³ Kɛ Jésus o Zerizalɛm lɔ Delɛ-cɛn'n nun bɔ be wunnin atrɛ b'ɔ yili be'n, sran kpanngban be lafili i su.

²⁴ Sanngɛ ɔ'a yi-mɛn i wun ase a man-man be, yɛlɛ kɛ ɔ si be kwlaa be klun akunndan'n,

²⁵ ɔ man ɔ'a klo-man kɛ be kan sran wun ndɛ be kle i. Afin i bɔbɔ si sran klun lɔ akunndan'n ngba .