Jean 18 - NYANMIƐN NDƐ'N 1998

Jésus i tralɛ

¹ Kɛ Jésus kannin sɔ bɔ i nuan tɔli'n, ɔ nin i sɔnnzɔnfuɛ'm be fite ɔli Sedrɔn nzue ba kan'n i sin lɔ. Fie kaan kun o lɛ, ɔ nin i sɔnnzɔnfuɛ mun be ɔli lɔ.

² Zidas b'ɔ fɛ i mannin sran mun'n, ɔ si lika sɔ'n nun, afin Jésus nin i sɔnnzɔnfuɛ'm be ta lɔ yia.

³ Ɔ man Zidas fali sonja mun nin Nyanmiɛn i sua'n nun sonja nga Nyanmiɛn nyrun jranfuɛ dandan mun nin Farizifuɛ'm be yili be'n be ɔli lɔ. Kannin, nin tɛ, nin tokofi, ɔ nin klɔnman o bé sa nun.

⁴ Jésus b'ɔ si sa nga be su wa yo i'n i kwlaa'n, ɔ wunngeli bé wun lɛ nan ɔ'a usa be kɛ: «?An su kunndɛ wan?»

⁵ Yɛ be tɛli i su kɛ: «Jésus b'ɔ fin Nazarɛt'n yɛ e kunndɛ i-ɔ.» Ɔ seli be kɛ: «Min yɛ.» Zidas b'ɔ fɛ i mannin sran mun'n, ɔ nin be yɛ be o lɛ-ɔ.

⁶ Jésus seli be kɛ: «Min yɛ.» Be cuɛn ɔli siɛn kan, kpɛkuun b'a fin ase.

⁷ Jésus usali be ekun kɛ: «?An su kunndɛ wan?» Be seli kɛ: «Jésus b'ɔ fin Nazarɛt'n yɛ e kunndɛ i-ɔ.»

⁸ Yɛ Jésus seli be kɛ: «N se amun kɛ min yɛ. Sɛ min yɛ an kunndɛ min'n, an `yaci be nga'm be nun man be wɔ.»

⁹ Ɔ kɛnnin i sɔ nan ɔ kpɛn ndɛ ng'ɔ kɛnnin i kɛ: «Be nga a fa be mannin min'n, be wie fi a mlin-man.»

¹⁰ Tokofi kun o Simɔn Piɛr sa nun, ɔ cuɛn fa finnin Nyanmiɛn nyrun jranfuɛ be su kpɛn'n i sran bɔ be flɛ i kɛ Malkis'n, ɔ kpɛli i su fama'n.

¹¹ Jésus seli Piɛr kɛ: «Wla ɔ tokofi'n i bua'n nun. ?A bu i kɛ nyrɛnnɛn nga e Si waan n wun i'n, n su wun-mɛn i?»

Jésus i Ani ja su fa kɔlɛ

¹² Sonja'm be nin bé su kpɛn'n, be nin Zuif'm be sonja mun be trali Jésus, yɛ be cili i-ɔ.

¹³ Kɛ be trɛli i'n, be dun mmua fɛ i ɔli Ani awlo lɔ, afin Ani sɔ'n ti Kaif b'ɔ ti Nyanmiɛn nyrun jranfuɛ'm be su kpɛn afuɛ sɔ'n nun'n i sia.

¹⁴ Kaif sɔ'n yɛ ɔ seli Zuif'm be kɛ: «Sɛ sran'm bé ti sran kun wu'n, ɔ ti kpa tra kɛ nvle wunmuan'n saci» nin-ɔn.

Piɛr seli kɛ ɔ si-man Jésus

¹⁵ Kɛ ɔ ´yo sɔ'n, wuun Simɔn Piɛr nin Jésus i sɔnnzɔnfuɛ kun ekun be su i su. Nyanmiɛn nyrun jranfuɛ'm be su kpɛn'n si i sɔnnzɔnfuɛ sɔ'n, kɛ be fa Jésus wlu Nyanmiɛn nyrun jranfuɛ'm be su kpɛn'n i awlo lɔ, ɔ ɔli wie.

¹⁶ Sanngɛ Piɛr kali anuan'n nun lɛ. Jésus i sɔnnzɔnfuɛ kun nga Nyanmiɛn nyrun jranfuɛ'm be su kpɛn'n si i'n, ɔ wa kan kleli bla ng'ɔ nian anuan'n su'n nan ɔ man Piɛr a wlu awlo lɔ.

¹⁷ Afanniɛn sɔ'n b'ɔ nian anuan'n su'n, ɔ usali Piɛr kɛ: ? «Nán bian sɔ'n i sɔnnzɔnfuɛ'n wie yɛlɛ wɔ?» Yɛ ɔ seli kɛ: «Nɛ́n i wie yɛlɛ min.»

¹⁸ Ayrɛ o nun, i sɔ'n ti kanga'm be nin sonja mun be trɔli sin be su tɔn. Piɛr kusu jin bé wun lɛ, ɔ tɔn wie.

Nyanmiɛn nyrun jranfuɛ'm be su kpɛn'n usali Jésus sa

¹⁹ Nyanmiɛn nyrun jranfuɛ'm be su kpɛn'n usali Jésus i sɔnnzɔnfuɛ'm bé wun ndɛ ɔ nin like ng'ɔ kle'n i su ndɛ.

²⁰ Jésus seli i kɛ: «N kan kleli sran'm be kwlaa nzra nun, yɛ cɛn'n kwlaa kɛ Zuif'm be yia Nyanmiɛn ndɛ suanlɛ nin i srɛlɛ sua'm be nun nin Nyanmiɛn i sua nun'n, n kle be like. M'an kan-man ndɛ fi nvialiɛ nun.

²¹ ?Nguɛ ti yɛ a usa min ekun-ɔn? Usa be nga n kan kle be bɔ be tili'n. Be bɔbɔ be si ndɛ nga n kan kleli be'n.»

²² Kɛ Jésus ´se sɔ'n, wuun sonja kun mɛntɛn i lɛ. Ɔ kpacili i nyin nun, yɛ ɔ seli i kɛ: «?Ndɛ nga a kan kle Nyanmiɛn nyrun jranfuɛ'm be su kpɛn'n yɛ?»

²³ Jésus seli i kɛ: «Sɛ ndɛ tɛ yɛ n kannin'n, kan kle min. ?Sɛ kusu ndɛ kpa yɛ n kannin'n, nguɛ ti yɛ a bo min-ɔn?»

²⁴ Yɛ Ani fɛ i nin i sa nyanman'n ko mannin Kaif, Nyanmiɛn nyrun jranfuɛ'm be su kpɛn nin-ɔn.

Piɛr seli ekun kɛ ɔ si-man Jésus

²⁵ Simɔn Piɛr jin lɛ su tɔn sin. Be usɛli i kɛ: «?Wɔ-ɔ, nán bian sɔ'n i sɔnnzɔnfuɛ'n wie yɛlɛ wɔ?» Sanngɛ ɔ sali, ɔ seli kɛ: «Nɛ́n i wie yɛlɛ min.»

²⁶ Nyanmiɛn nyrun jranfuɛ'm be su kpɛn'n i sran kun b'ɔ ti bian nga Piɛr kpɛli i su'n i niaan'n, ɔ usɛli i kɛ: «?M'an wun-man wɔ nin bian sɔ'n fie kaan'n su lɔ?»

²⁷ Piɛr seli ekun kɛ ɔ si-mɛn i. Kpɛkuun yɛ akɔ nyinman'n boli-ɔ.

Jésus i Pilat ja su fa kɔlɛ

²⁸ Kɛ be nin i fin Kaif awlo lɔ'n, be fɛ i ɔli Pilat awlo lɔ. Kɛ ɔ ´yo sɔ'n, wuun lika'n nian wie-man cɛn. Kɛ ɔ ´yo nan Zuif'm b'a kan-man fiɛn nan b'a kwla di Delɛ-cɛn wie'n, be bɔbɔ b'a wlu-man lɔ.

²⁹ Ɔ man Pilat fite bali bé wun lɛ, yɛ ɔ usali be kɛ: « ?Nguɛ ndɛ su yɛ an sanmannin bian nga-a?»

³⁰ Be tɛli i su kɛ: «Sɛ ɔ'a yo-man sa tɛ'n, wuun y'a fɛ-mɛn i a blɛ-man wɔ.»

³¹ Ɔ man Pilat seli be kɛ: «An bɔbɔ an `fɛ i ko yo i ng'ɔ ti amun mmla'n su'n.» Zuif'm be seli i kɛ: «E bɔbɔ e lɛ-man atin kɛ e kun sran. »

³² Be kɛn i sɔ nan Jésus i wulɛ wafa ng'ɔ kan kleli be kɛ ɔ ´wu'n, ɔ `kpɛn su.

³³ Pilat sɛli i sin i awlo lɔ, yɛ ɔ flɛ Jésus usɛli i kɛ: «?A ti Zuif'm be famiɛn? »

³⁴ Jésus usɛli i kɛ: «?Ɔ bɔbɔ yɛ a kpɛ ɔ́ ti nun kɛn i sɔ-ɔ, annzɛ sran wie yɛ ɔ kɛn i sɔ kleli wɔ-ɔ?»

³⁵ Pilat tɛli i su kɛ: «?Be waan Zuif yɛlɛ min? Ɔ bɔbɔ ɔ nvlefuɛ nin Nyanmiɛn nyrun jranfuɛ dandan mun yɛ be fa wɔ blɛli min-ɔn. ?Nguɛ sa yɛ a yoli-ɔ?»

³⁶ Jésus tɛli i su kɛ: «Nán mɛn nga nunfuɛ mun yɛ be sieli min famiɛn-ɔn. Sɛ be yɛ be sieli min'n, wuun be ´jran n sin kun mín ti alɛ, yɛ kusu wuun be su fa-man min man-man Zuif mun. Sanngɛ ɔ ti-man sɔ, nán mɛn nga nunfuɛ mun yɛ be sieli min-ɔn.»

³⁷ Ɔ man Pilat usɛli i kɛ: «?Ɔ man a ti famiɛn?» Jésus tɛli i su kɛ: «Yɛ ɔ́ nuan o su lɛ-ɔ, n ti famiɛn. Nian sa ti bɔ be wu min'n, sa ti bɔ m bali mɛn'n nun'n yɛ: m bali kɛ n ´kan ndɛ ng'ɔ ti nanwlɛ'n kle sran mun. Sran kwlaa ng'ɔ si nanwlɛ'n, ɔ ti ndɛ nga n kan'n. »

³⁸ Pilat usɛli i kɛ: «Nanwlɛ'n yɛlɛ nguɛ?» Kɛ i nuan tɔli'n, ɔ fite ɔli Zuif'm bé wun lɔ ekun, yɛ ɔ seli be kɛ: «N wun-mɛn i wun ndɛ kun bɔ n ´jran su n ´fa bu i fɔ-ɔ.

Be seli kɛ be `kun Jésus

³⁹ ?Sanngɛ ɔ ti amun nzuɛn kɛ Delɛ-cɛn dilɛ nun n `yaci bisuafuɛ kun nun man amun. An klo kɛ n yaci Zuif'm be famiɛn'n i nun man amun?»

⁴⁰ Yɛ be tɔli kpanlɛ su ekun-ɔn, be seli kɛ: «Cɛcɛ, nɛ́n i-ɔ. Barabas yɛ e waan a `yaci i nun man ye-ɔ.» Sanngɛ Barabas sɔ'n ti kakajefuɛ.