Jean 15 - NYANMIƐN NDƐ'N 1998

Jésus yɛ ɔ ti waka'n i bo nin-ɔn

¹ «Min yɛ n ti vinyi'n i bo kpa nin-ɔn, yɛ n Si ti vinyi sɔ'n i tafuɛ.

² N sama kwlaa ng'ɔ su-man'n, ɔ kpɛ, yɛ ng'ɔ su'n, ɔ kpɛkpɛ su nan ɔ `yo kpa yɛ ɔ `su tra laa liɛ'n.

³ Ndɛ nga n kan kleli amun'n ti amu'an yo kpa.

⁴ Kɛ min nin amun y'a yo sran wunmuan'n, man e tran sɔ tititi. Waka sama'n i ngunmin kwla su-man, san ɔ ´tɛ i bo'n su, yɛ ɔ ´su-ɔ, i kunngba nin-ɔn, amun kusu sɛ amun nin min a yo-man kun'n, an su yo-man like fi ye.

⁵ Min yɛ n ti vinyi'n bo kpa nin-ɔn, an ti min sama. Sran ng'ɔ nin min a yo sran wunmuan bɔ e tran titi'n, ɔ ti kɛ waka sama b'ɔ su kpanngban sa, afin sɛ n nun-man nun'n, an kwla yo-man like fi.

⁶ Sran ng'ɔ nin min a yo kun'n, sɛ ɔ nin min a tran-man sɔ titi'n, ɔ ti kɛ waka sama b'ɔ tɛ-mɛn i bo su'n sa, be ´kpɛ yi. Ɔ wu, be isa guɛ i sin nun, ɔ yra.

⁷ Sɛ amun nin min yo sran wunmuan bɔ e tran titi'n, bɔ an fa min ndɛ'n su'n, like nga an klo i'n, an `se Nyanmiɛn, ɔ ´fa man amun.

⁸ Sɛ an yo kɛ waka sama b'ɔ su kpanngban sa'n, b'ɔ man be wun kɛ an ti n sɔnnzɔnfuɛ'n, i sɔ'n nun yɛ n Si'n ´nyan kɔmin-ɔn.

⁹ Kɛ n Si fa klo min'n, yɛ n kusu n fa klo amun-ɔn. An `yo sa nga b'ɔ man an si kɛ n klo amun tititi'n.

¹⁰ Sɛ an fa min ndɛ'n su'n, amun ´si kɛ n klo amun tititi. Kɛ n fa n Si ndɛ'n su sɔ-ɔ, ɔ man n si kɛ ɔ klo min tititi.

¹¹ N ´kɛn i sɔ kle amun nan amun klun ´jɔ kɛ n liɛ'n sa, yɛ amun klun ´jɔ lelele.

¹² Ndɛ nga n ´kan kle amun'n yɛ: an `klo amun wiengu kɛ n fa klo amun'n sa .

¹³ Sran klolɛ ng'ɔ ti dan trɛ i ngba'n yɛlɛ sran bɔ i janvuɛ ti ɔ fɛ i wun man'n.

¹⁴ Sɛ an fa min ndɛ'n su'n, an ti n janvuɛ.

¹⁵ N flɛ-man amun n sran kun, afin kanga'n si-man like nga i min'n yo'n. Sa ti bɔ n flɛ amun n janvuɛ'n yɛlɛ kɛ like nga n suɛnnin n Si sa nun'n, n kleli amun i kwlaa.

¹⁶ Nán amun yɛ an fali min-ɔn, sanngɛ min yɛ n fali amun-ɔn. N fali amun kɛ an wɔ nan an ko yo kɛ waka sama b'ɔ su'n sa. N waan mma nga an su i sɔ'n ɔ ´ka lɛ titi nan like kwlaa nga an fa n dunman srɛ e Si'n, ɔ `man amun.

¹⁷ Ndɛ nga n ´kan kle amun'n yɛlɛ kɛ an `klo amun wiengu.»

Mɛn nunfuɛ'm be kpɔ Jésus nin i sɔnnzɔnfuɛ mun

¹⁸ «Sɛ mɛn nunfuɛ'm be kpɔ amun'n, man an si kɛ min yɛ be dun mmua kpɔli min-ɔn.

¹⁹ Sɛ an ti mɛn nga nunfuɛ wie'n, wuun be klo amun yɛlɛ kɛ an ti be fuɛ. Sanngɛ kɛ n fali amun'n, n yili amun mɛn nunfuɛ'm be nun, i ti yɛ man be kpɔ amun nin-ɔn.

²⁰ An `bu ndɛ nga n kan kleli amun'n i akunndan. N seli amun kɛ: ‹Sran b'ɔ su sran'n ti-man kpa trɛ-mɛn i min'n›. Sɛ be kleli n yalɛ'n, be ´kle amun yalɛ wie, sɛ be fa min ndɛ'n su'n, be ´fa amun liɛ'n su wie.

²¹ N ti yɛ be ´yo amun sa sɔ'n kwlaa-a, afin be si-man sran b'ɔ sunmannin min'n.

²² Sɛ m'an ba-man m'an kan kle-man be'n, wuun be su bu-man be sa tɛ yofuɛ. Sanngɛ siɛn'n, be kwla yi-man bé ti bé sa tɛ'n bo kun.

²³ Sran ng'ɔ kpɔ min'n, wuun ɔ kpɔ n Si kusu.

²⁴ Sɛ m'an yo-man like nga sran fi nian yo-mɛn i le be nyrun b'a wun-mɛn i'n, wuun be su bu-man bé sa tɛ yofuɛ. Sanngɛ kɛ n wa yoli bɔ be wunnin i'n ti'n, be kpɔ min nin n Si.

²⁵ Sanngɛ sa sɔ'n yo sɔ nan ndɛ nga be klɛli be mmla fluwa'n nun kɛ: ‹Kpɔlɛ nga be kpɔ min'n lɛ-man bo'n› ɔ `kpɛn su .

²⁶ Sran ng'ɔ wa uka amun'n ɔ ´ba, yɛlɛ Nyanmiɛn Wawɛ'n b'ɔ ti nanwlɛfuɛ b'ɔ fin e Si Nyanmiɛn wun lɔ'n. N ´fɛ blɛ amun e Si dunman nun. Kɛ ɔ ko ba'n, ɔ ´kan min ndɛ kle amun.

²⁷ Amun kusu, amun ´kan min ndɛ wie, afin kɛ ɔ fin i bo bolɛ nun'n, min nin amun yɛ e wo-ɔ.»