Jean 13 - NYANMIƐN NDƐ'N 1998

Jésus i sɔnnzɔnfuɛ'm bé ja wunnzinlɛ

¹ Jésus sili kɛ i mɛn'n nun wa tulɛ'n nin i Si sin kɔlɛ'n ɔ'a ju, i sin nan b'a bo Delɛ-cɛn'n dilɛ'n bo. Kɛ ɔ fin i bo bolɛ nun'n, Jésus klo i fuɛ nga be o mɛn'n nun'n, ɔ klo be lele guɛ i ti nin i bo.

² Kɛ be ´di like'n, wuun mmusu'm bé si Satan'n ɔ'a dun mmua di a wla Simɔn wa Zidas Iskariɔt, kɛ ɔ `fa Jésus man sran mun.

³ Jésus bɔbɔ si weiin kɛ i Si fali like'n kwlaa wlɛli i sa nun, ɔ si kɛ ɔ fin i Si Nyanmiɛn wun lɔ, yɛ ɔ su wa kɔ lɔ ekun.

⁴ Ɔ jaoli aliɛ'n sin, ɔ yili i tralɛ dan'n, yɛ ɔ fali wunnzinnun kun cili i afiɛn.

⁵ I sin ɔ guali nzue kpongbo kun nun, yɛ ɔ tɔli i sɔnnzɔnfuɛ'm bé ja wunnzinlɛ su-ɔ. Wunnzinnun'n b'ɔ ci i afiɛn'n, ɔ fa nunnunnin.

⁶ Kɛ ɔ toli Simɔn Piɛr'n, ɔ seli i kɛ: «?Nannan, wɔ yɛ a wa wunnzin mín ja-a?»

⁷ Jésus seli i kɛ: «Like nga n ´yo i yɛ'n, a nian wun-mɛn i wlɛ, sanngɛ cɛn wie lele a ´wun i wlɛ.»

⁸ Piɛr seli i kɛ: «N liɛ'n, a su wunnzin-man n ja liɛ'n wie mlɔnmlɔn!» Yɛ Jésus seli i kɛ: «Sɛ m'an wunnzin-man wɔ'n, n liɛ nun-man ɔ liɛ nun kun.»

⁹ Simɔn Piɛr seli i kɛ: «Nannan, sɛ ɔ ti sɔ'n, nán wunnzin n ja'n ngunmin, sanngɛ wunnzin n sa'n nin n ti'n.»

¹⁰ Jésus seli i kɛ: «Sran nga ɔ'a dun mmua wunnzin'n, san i ja yɛ ɔ wunnzin-ɔn, afin i wun ti yɛiin. Amun liɛ'n, an ti yɛiin, sanngɛ nán amun ngba-a.»

¹¹ Jésus si sran ng'ɔ ´fɛ i man sran mun'n ti yɛ ɔ seli kɛ be ngba be ti-man yɛiin nin-ɔn.

¹² Kɛ ɔ wieli bé ja wunnzin b'ɔ wlɛli i tralɛ'n, ɔ trannin ase aliɛ'n sin ekun yɛ ɔ usali be kɛ: «?An wun like nga n yoli amun'n i wlɛ?»

¹³ An se kɛ n ti amun like klefuɛ nin amun min. Kɛ an se sɔ'n, ɔ ti nanwlɛ, afin kɛ n ti sɔ-ɔ.

¹⁴ Sɛ m bɔ n ti amun like klefuɛ nin amun min'n, n wunnzinnin amún ja'n, amun kusu an `wunnzin amun wiengu ja.

¹⁵ N yoli i sɔ kleli amun nan amun kusu an `nian nga n yoli amun'n su yo.

¹⁶ Nanwlɛ, sran ng'ɔ su sran'n ti-man kpa trɛ-mɛn i min'n, yɛ sran nga be sunmɛn i'n ti-man kpa tra-man sran ng'ɔ sunmɛn i'n.

¹⁷ Sɛ an si sa sɔ'n nan an fa su'n, amun liɛ su ti ye.

¹⁸ Nán amun ngba amun ndɛ yɛ n kan-an, n si be nga n fali be'n. Sanngɛ san Nyanmiɛn Ndɛ nga be klɛli'n ɔ kpɛn su. Be klɛli i kɛ: «Sran ng'ɔ nin min di like'n, ɔ'a kaci n kpɔfuɛ'n .»

¹⁹ Kɛ sa sɔ'n nian ju-man'n, n ´kan kle amun biki sa nan sɛ be ju'n, an `lafi sran wafa nga n ti'n su.

²⁰ Nanwlɛ, sran ng'ɔ ko sɔ sran nga n sunmɛnnin i nun'n, wuun ɔ'a sɔ min nun, yɛ sran ng'ɔ sɔ min nun'n, ɔ'a sɔ sran ng'ɔ sunmannin min'n i nun.

Jésus boli su kɛ Zidas wa fɛ i man sran mun

²¹ Kɛ Jésus nuan tɔli'n, i wla'n boli, nan ɔ'a se kɛ: «Nanwlɛ, amun nun kun wa fa min man sran mun.»

²² I sɔnnzɔnfuɛ'm be nian-niannin be wiengu nyrun, be si-man sran ng'ɔ kɛn i ndɛ'n.

²³ Be nun kun bɔ Jésus klo i sa kpa'n, ɔ mɛntɛn i wun lɛ.

²⁴ Simɔn Piɛr buli i nyinma kleli i kɛ ɔ ´usɛ i sran ng'ɔ kɛn i ndɛ'n.

²⁵ Jésus sɔnnzɔnfuɛ sɔ'n kisɛ i wue nun, ɔ usɛli i kɛ: «?Nannan, wan-an?»

²⁶ Jésus seli i kɛ: «Sran nga m bo kpaun sin tro'n nun n fa mɛn i'n, wuun i-ɔ. Yɛ ɔ boli i tro'n nun fa mannin Simɔn Iskariɔt wa Zidas-ɔ.»

²⁷ Kɛ Zidas sɔli kpaun sin sɔ'n nun cɛ'n, yɛ Satan wluli i nun-ɔn. Jésus seli i kɛ: «Like nga ɔ waan a ´yo'n, yo i ndɛndɛ.»

²⁸ Sanngɛ be nga be nin i wo aliɛ'n sin'n, be nun wie fi a wun-man sa nga ti yɛ ɔ seli i sɔ'n.

²⁹ Kɛ bɔ Zidas yɛ ɔ sie be bɔlɛ'n ti, be wie'm be bu i kɛ ɔ seli i kɛ ɔ ko to like nga be ´fa di cɛn'n annzɛ ɔ `cɛ yalɛfuɛ'm be like wie.

³⁰ Kpɛkuun Zidas fa kpaun sin'n fiteli. Kɛ ɔ ´yo sɔ'n, wuun lika'n ɔ'a dun.

Mmla kun ekun

³¹ Kɛ Zidas fitɛli'n, Jésus seli kɛ: «Siɛn'n, m bɔ n kacili Sran'n, n sran wafa nga n ti'n i nglo yilɛ'n ɔ'a ju, yɛ min ti, Nyanmiɛn a yi i wun nglo.»

³² Yɛ sɛ n ti Nyanmiɛn yi i wun nglo'n, Nyanmiɛn bɔbɔ ɔ wa yi n sran wafa nga n ti'n i nglo wie, ɔ ´yo i sɔ icra'n.

³³ M mma mun, n tɛ o amún wun wa kan. Amun wa kunndɛ min. N seli Zuif'm be kɛ, « Lika nga n ´kɔ lɔ'n, be su kwla kɔ-man lɔ wie.» Ndɛ kunngba'n yɛ n ´kan kle amun yɛ.

³⁴ M ´man amun mmla kun ekun: an `klo amun wiengu. Klolɛ nga n fa kloli amun'n, amun kusu an `fa klo amun wiengu sɔ.

³⁵ Sɛ an klo amun wiengu'n, i sɔ'n nun yɛ sran'm be kwlaa be ´si kɛ an ti n sɔnnzɔnfuɛ-ɔ.

Jésus boli su kɛ Piɛr wa se kɛ ɔ si-mɛn i

³⁶ Simɔn Piɛr usɛli i kɛ: «?Nannan, nin yɛ a ´kɔ-ɔ?» Jésus seli i kɛ: «Lika nga n ´ko lɔ'n, a kwla su-man n su icra'n, sanngɛ cɛn wie lele a ´su n su.»

³⁷ Piɛr usɛli i kɛ: «?Nannan, nguɛ ti yɛ n kwla su-man ɔ su kɛ e ´se yɛ nin-ɔn? Wɔ ti'n, sɛ be waan be ´kun min'n, n ´fa min wun man.»

³⁸ Jésus usɛli i kɛ: «?N ti a ´fa ɔ wun man sakpa? Nanwlɛ, a wa se kɛ a si-man min sɔ kpɛ nsan nan akɔ nyinman'n ɔ'a bo.»