Jean 12 - NYANMIƐN NDƐ'N 1998

Mari guali Jésus ja'n su parfɛn

¹ Kɛ ɔ ka le nsiɛn nan Delɛ-cɛn'n ɔ'a ju'n, Jésus ɔli Betani, lɔ yɛ Lazar b'ɔ cɛnnin i'n wo-ɔ.

² Kɛ ɔ o lɔ'n, be tɔn like mɛnnin i. Mart yɛ ɔ isali like sɔ'n mannin be-ɔ. Lazar kusu o be nga be nin Jésus di like'n be nun.

³ Mari fali nar ngo muɛn litri sin bɔ i gua'n ti kekle kpa'n guali Jésus ja'n su, ɔ fɛ i timuɛn'n nunnunnin. Parfɛn sɔ'n i fannin'n deli sua'n.

⁴ I sɔnnzɔnfuɛ'm be nun kun bɔ be flɛ i kɛ Zidas Iskariɔt'n bɔ i yɛ ɔ wa fɛ i man sran mun'n, ɔ seli kɛ:

⁵ «?Nguɛ ti yɛ b'a yo-man parfɛn sɔ'n i atɛ denie ya nsan b'a fa man-man yalɛfuɛ mun-ɔn?»

⁶ Nán kɛ yalɛfuɛ'm be ndɛ miɛn ti yɛ ɔ seli sɔ-ɔ, sanngɛ ɔ ti awiefuɛ, yɛ i yɛ ɔ sie be bɔlɛ nin-ɔn, yɛ sika nga be guɛ i nun'n, ɔ fa wie.

⁷ Sanngɛ Jésus seli i kɛ: «Yaci i lɛ! Man ɔ sie i lɛ lele fa ju cɛn nga be ´sie min'n.

⁸ Amun nin yalɛfuɛ mun yɛ amun ´ka wa titi-ɔ, sanngɛ n liɛ'n, min nin amun su tran-man wa titi .»

Lazar wun ndɛ cicilɛ

⁹ Kɛ Zuif kpanngban kpa be tili kɛ Jésus o Betani lɛ'n, be ɔli lɔ, nán kɛ Jésus ngunmin ti-ɔ, sanngɛ be ɔli kɛ be ´ko wun Lazar bɔ Jésus cɛnnin i'n.

¹⁰ Nyanmiɛn nyrun jranfuɛ dandan'm be buli Lazar i kunlɛ akunndan wie,

¹¹ afin i ti Zuif kpanngban b'a su-man be su kun, Jésus su yɛ be lafi-ɔ.

Jésus i Zerizalɛm klɔ'n nun wlulɛ

¹² Kɛ aliɛ cɛnnin'n, sran kpanngban bɔ be bali Delɛ-cɛn'n i dilɛ'n, be tili kɛ Jésus su ba Zerizalɛm lɛ.

¹³ Be fali mme nnya trali nun. Be fite ɔli i atin kpalɛ, be kpan seli kɛ: «Ozanna! Sran ng'ɔ ba e Min Nyanmiɛn dunman nun'n, Nyanmiɛn man ɔ nyan nguan. Nyanmiɛn man Izraɛl famiɛn'n nyan nguan .»

¹⁴ Jésus kunndɛli aflunmun nga ɔ'a kpɛ cro'n kun fuli su, afin be klɛli i kɛ:

¹⁵ «Siɔn wa bla, nán srɛ kun wɔ. Nian, ɔ famiɛn'n su ba, ɔ fu aflunmun nga ɔ'a kpɛ cro'n kun su .»

¹⁶ Kɛ ɔ ´yo sɔ'n, i sɔnnzɔnfuɛ'm be wun-man sa sɔ'n i wlɛ, sanngɛ kɛ Nyanmiɛn yili Jésus i sran wafa ng'ɔ ti'n i nglo'n, ɔ kpɛnnin be klun kɛ be klɛli i wun ndɛ'n nun kɛ be ´yo i sɔ, ɔ man kɛ be yoli i sɔ'n, ɔ kpɛnnin su.

¹⁷ Le kun nga kɛ Jésus ´flɛ Lazar kɛ ɔ `fin ndia'n nun fite'n b'ɔ cɛnnin i'n, sran kpanngban'n bɔ be nin i o lɛ cɛn sɔ'n nun'n, b'a yaci-man sa sɔ'n i ndɛ kanlɛ.

¹⁸ I sɔ'n ti sran kpanngban be bɛli i atin kpalɛ, afin be tili i atrɛ ng'ɔ yili'n.

¹⁹ Ɔ man Farizifuɛ'm be seli be wiengu kɛ: «?An wun-mɛn i? An kwla yo-man like fi, sran'm be kwlaa be su wie i sin kɔ.»

Grɛk'm be bali Jésus wun wunlɛ

²⁰ Be nga Nyanmiɛn i sɔlɛ'n ti be bali Zerizalɛm cɛn dilɛ nun'n, be nun wie'm be ti Grɛk.

²¹ Be wa toli Filip b'ɔ fin Bɛtsaida Galile mɛn nun'n. Be seli i kɛ: «Nja, e waan e ´wun Jésus wun.»

²² Filip ko kan kleli Andre, yɛ Andre nin Filip be ko kan kleli Jésus-ɔ.

²³ Jésus seli be kɛ: «M bɔ n kacili Sran'n, n sran wafa nga n ti'n i nglo yilɛ cɛn'n ɔ'a ju.

²⁴ Nanwlɛ, sɛ ble mma kun ɔ'a tɔ-man asiɛ wun ɔ'a saci-man'n, ɔ kɛ i kunngba, sanngɛ sɛ ɔ saci'n, ɔ wlɔ yɛ ɔ yo kpanngban.

²⁵ Sran nga i waan ɔ ´sɛsɛ i wun'n, ɔ ´kpɛ i nguan'n sin, sanngɛ sran ng'ɔ bu-mɛn i nguan'n like fi mɛn nga nun'n, ɔ ´cɛ lele ɔ ´nyan anannganman nguan.

²⁶ Sran nga i waan ɔ ´su min'n, man ɔ su n su, yɛ lika nga n wo nun'n, n sran sɔ'n ɔ ´tran lɔ wie. N Si ´bu sran ng'ɔ su min'n i sran.»

Jésus i wulɛ wafa ng'ɔ wa wu'n

²⁷ «Siɛn'n, min akunndan'n ɔ'a sanngan. ?N ´se sɛ? ?N ´se kɛ: N Si, de min sa ng'ɔ wa ju yɛ'n nun? Sa sɔ'n ti yɛ m bali lele yɛ ɔ'a fa ju kɛ e ´se yɛ nin-ɔn.»

²⁸ N Si, yo man ɔ dunman'n fu. Kɛ ɔ yoli sɔ'n, be tili sran kun nɛn nyanmiɛn su lɔ, sran sɔ'n seli kɛ: «M'an dun mmua yo man n dunman'n ɔ'a fu, yɛ n yo man ɔ wa fu ekun.»

²⁹ Sran nga be jin lɛ bɔ be tili'n be waan, nyanmiɛn'n yɛ ɔ su kpla-a. Wie'm be se kɛ: «Anz wie yɛ ɔ kan ndɛ kleli i-ɔ.»

³⁰ Sanngɛ Jésus seli be kɛ: «Nán n ti yɛ an tili i nɛn sɔ nin-ɔn, amun ti-ɔ.

³¹ Siɛn'n, ɔ'a ju mɛn nga nunfuɛ'm be jɔlɛ difuɛ'n i ja su fa kɔlɛ, siɛn'n, be wa kan sran ng'ɔ sie mɛn nga'n i bo.

³² Yɛ n kusu, sɛ be man n su'n, n yo man sran'm be kwlaa be ´ba n sin.»

³³ Ɔ kɛnnin i sɔ ´fa kleli i wulɛ wafa ng'ɔ wa wu'n.

³⁴ Sran'm be usɛli i kɛ: «E kɛnngɛn i mmla'n nun kɛ Krist su wu-man mlɔnmlɔn. ?Sɛ ɔ ti sɔ'n, ɔ yo sɛ yɛ man a se kɛ san be ´man i b'ɔ kacili Sran'n i su nin-ɔn? ?Sran b'ɔ kacili sɔ'n yɛlɛ wan ?»

³⁵ Jésus seli be kɛ: «Lika'n tɛ kpaja amún wun wa kan. Kɛ an tɛ wun ase'n, an `nanti nan lika'n ɔ'a dun-man amun. Sran ng'ɔ nanti aosin nun'n, ɔ wun-mɛn i bo.

³⁶ Kɛ lika'n tɛ kpaja amún wun wa'n, an `lafi kpajalɛ sɔ'n su nan an `kaci sran bɔ be wun ase.» Kɛ i nuan tɔli'n, ɔ ɔli mmua lɔ ko fiali be nyrun.

Jésus su bɔ Zuif'm be lafi-man'n

³⁷ Ɔ yili atrɛ kpanngban kpa be nyrun, sanngɛ ɔ nin i sɔ ngba'n, b'a lafi-mɛn i su.

³⁸ Kɛ ɔ yo nan ndɛ nga Nyanmiɛn nuan ijɔfuɛ Ezai kannin'n ɔ'a `kpɛn su ti-ɔ. Ɔ seli kɛ: «?Nannan, ndɛ nga e kan kleli be'n, wan yɛ ɔ fali su-ɔ? ?Wan yɛ e Min Nyanmiɛn'n yili i like ng'ɔ yo'n i nglo kleli i-ɔ ?»

³⁹ Be kwla fa-man su yɛlɛ kɛ Ezai kɛnnin ekun kɛ:

⁴⁰ «Nyanmiɛn kacili be anyansifuɛ, ɔ man be keteli. Ɔ yoli sɔ nan be nyinma a wun-man ase, nan b'a wun-man sa wlɛ, nan b'a sa-man bé sin min wun nan m'an yo-man be juejue.»

⁴¹ Ezai kannin sɔ yɛlɛ kɛ ɔ wunnin nyrun nga Jésus lɛ'n, kɛ ɔ wunnin i sɔ'n yɛ man ɔ kannin Jésus i ndɛ nin-ɔn .

⁴² Ɔ nin i sɔ ngba'n, Zuif kpɛnngbɛn'm be nun kpanngban be lafili Jésus su, sanngɛ Farizifuɛ'm be ti, b'a yi-man bé wun nglo. Sɛ be yoli sɔ'n, wuun be kannin be bo Nyanmiɛn ndɛ suanlɛ nin i srɛlɛ sua'n nun.

⁴³ Afin be klo dunman nga sran'm be bo be'n tra nga Nyanmiɛn bo be'n.

Ndɛ nga Jésus fa bu sran'm be fɔ'n

⁴⁴ Jésus kpan seli kɛ: «Sran ng'ɔ lafi n su'n, nán n su yɛ ɔ lafi-ɔ, sanngɛ sran ng'ɔ sunmannin min'n i su yɛ ɔ lafi-ɔ.

⁴⁵ Sran ng'ɔ wun min'n, wuun ɔ'a wun sran ng'ɔ sunmannin min'n.

⁴⁶ Min yɛ m bali mɛn'n nun kɛ n ´kpaja lika nun nan sran kwlaa ng'ɔ lafi n su'n ɔ'a tran-man aosin nun.

⁴⁷ Sran ng'ɔ ti min ndɛ'n b'ɔ fa-man su'n, nán min yɛ n ´kan-an, afin m'an ba-man kɛ m ma kan mɛnfuɛ'm be ndɛ, sanngɛ m bali be delɛ.

⁴⁸ Sran ng'ɔ sɔ-man min nun b'ɔ fa-man min ndɛ'n su'n, sran ng'ɔ nin i be ´di jɔlɛ'n wo lɛ. Ndɛ nga n kannin'n su yɛ be wa jran bu i fɔ mɛn'n i awieliɛ-ɔ.

⁴⁹ Afin ndɛ nga n kan'n, n kpɛ-man n ti nun yɛ n kan-an, sanngɛ n Si b'ɔ sunmannin min'n, i bɔbɔ yɛ ɔ kleli min ndɛ nga n kan'n nin ninnge wafa nga n kle nin-ɔn .

⁵⁰ Yɛ n si kɛ ndɛ ng'ɔ se n kɛ n kan'n, ɔ man sran nyan anannganman nguan. I sɔ'n ti, ndɛ nga n Si se n kɛ n kan'n, yɛ n kan-an.»