Jean 11 - NYANMIƐN NDƐ'N 1998

Lazar i wulɛ

¹ Bian kun be flɛ i kɛ Lazar, ɔ tɔli tukpacɛ. Ɔ fin Betani kan Mari nin i niaan bla Mart be fin lɔ'n.

² Mari sɔ'n yɛ ɔ fa parfɛn guali e Min'n wun yɛ ɔ fɛli i timuɛn nunnun i ja wun nin-ɔn. Lazar sɔ'n b'ɔ tɔli tukpacɛ'n ɔ ti i niaan.

³ I niaan bla nnyɔn sɔ'm be sunmannin sran kɛ ɔ ko se be Min Jésus kɛ i sran kpa'n ɔ'a tɔ tukpacɛ.

⁴ Kɛ Jésus tili i sɔ'n, ɔ seli kɛ: «Tukpacɛ sɔ'n ti-mɛn i wie liɛ, sanngɛ ɔ tɔli tukpacɛ sɔ'n nan Nyanmiɛn dunman'n fu yɛ i ti Nyanmiɛn man i Wa'n `nyan nyrun.»

⁵ Jésus klo Mart nin i niaan bla yɛ Lazar bé sa.

⁶ Kɛ ɔ tili i kɛ Lazar a tɔ tukpacɛ'n, ɔ dili le nnyɔn lika ng'ɔ o lɔ bɔ be seli i kɛ ɔ'a tɔ tukpacɛ'n nun lɛ.

⁷ I sin, ɔ seli i sɔnnzɔnfuɛ'm be kɛ: «Man e wɔ Zide lɔ.»

⁸ I sɔnnzɔnfuɛ'm be seli i kɛ: «Baba, kɛ Zuif'm be kunndɛ kɛ be ´fin wɔ yɛbuɛ be ´kun wɔ'n ɔ nian cɛ-man. ?Yɛ a ´kɔ lɔ ekun-ɔn?»

⁹ Jésus seli be kɛ: «?Cɛn ba kun nun dɔ'n ti-man blu-nin-nnyɔn? Sɛ sran kun nanti wia nun'n, i ja kpla-man, afin ɔ wun lika'n weiin.

¹⁰ Sanngɛ sɛ sran kun nanti kɔnguɛ'n, i ja kpla, afin ɔ wun-man ase.»

¹¹ Kɛ i nuan tɔli'n, ɔ seli be kɛ: «E janvuɛ Lazar a lafi, sanngɛ n ´kɔ i tinngelɛ.»

¹² I sɔnnzɔnfuɛ'm be seli i kɛ: «Nannan, sɛ ɔ su lafi'n, wuun ɔ ´yo juejue.»

¹³ I wie ndɛ yɛ Jésus kannin-ɔn, sanngɛ be buli i kɛ lafilɛ kpakpa ndɛ yɛ ɔ kannin-ɔn.

¹⁴ Ɔ man Jésus seli be weiin kɛ: «Lazar a wu.

¹⁵ Amun ti kɛ n nun-man lɔ'n ɔ yo n fɛ, i sɔ'n nun yɛ amun ´lafi n su-ɔ. Sanngɛ man e wɔ i wun lɔ.»

¹⁶ I sɔ'n ti'n, Tomas bɔ be flɛ i kɛ Nda'n, ɔ seli i wiengu sɔnnzɔnfuɛ kun nga'm be kɛ: «Man e kusu e wɔ wie nan be kun ye ngba.»

Jésus cɛn sran, be flɛ i nguan

¹⁷ Kɛ Jésus juli lɔ'n, ɔ wunnin kɛ be sieli Lazar ɔ'a di le nnan.

¹⁸ Betani nin Zerizalɛm be afiɛn ti kilo nsan.

¹⁹ Zuif kpanngban kpa be bali Mart nin Mari be yako yolɛ be niaan'n i wie'n ti.

²⁰ Kɛ Mart tili kɛ Jésus su ba'n, ɔ ɔli i atin kpalɛ, sanngɛ Mari ti awlo lɔ.

²¹ Mart seli Jésus kɛ: «Nannan, sɛ ɔ ti kɛ a o wa sa'n, wuun n niaan'n ɔ'a wu-man.

²² Sanngɛ kɛ e o yɛ'n bɔbɔ, n si kɛ like nga a se Nyanmiɛn kɛ ɔ yo man wɔ'n, ɔ ´yo.»

²³ Jésus seli i kɛ: «Ɔ niaan'n ɔ wa cɛn.»

²⁴ Yɛ Mart seli kɛ: «N si kɛ mɛn'n i awieliɛ bɔ sran'm be ´cɛn'n, ɔ ´cɛn.»

²⁵ Jésus seli i kɛ: «Min yɛ n cɛn sran mun-ɔn, m bɔbɔ min yɛ be flɛ min nguan nin-ɔn. Sran kwlaa ng'ɔ lafi n su'n, sɛ ɔ wu'n, ɔ ´nyan nguan ekun.

²⁶ Yɛ sran nga i nyin o su b'ɔ lafi n su'n, ɔ su wu-man le. ?A lafi ndɛ sɔ'n su?»

²⁷ Yɛ ɔ seli i kɛ: «Ɛɛn. Nannan, n si kɛ wɔ yɛ a ti Krist nin-ɔn. A ti Nyanmiɛn Wa bɔ be waan ɔ ´ba mɛn'n nun'n.»

Jésus sunnin

²⁸ Kɛ i nuan tɔli'n, ɔ ɔli ko flɛli i niaan bla Mari blɛlɛlɛ nan ɔ'a se i kɛ: «Nja ɔ'a ba, i waan a bla.»

²⁹ Kɛ Mari tili i sɔ'n, ɔ jao waka ɔli Jésus wun lɔ.

³⁰ Kɛ ɔ ´yo sɔ'n, wuun Jésus nian wlu-man klɔ'n nun'n, wuun ɔ tɛ o kan Mart nin i yiali lɛ'n.

³¹ Kɛ Zuif'm bɔ be o Mari wun lɛ be ´luɛluɛ i'n, be wunnin kɛ ɔ'a jao waka a fite'n, yɛ be suli i su. Be buli i kɛ ɔ su kɔ asieliɛ su lɔ ko sun.

³² Kɛ Mari juli kan Jésus o lɛ'n, yɛ kɛ ɔ wunnin i'n, ɔ kotoli i bo, yɛ ɔ seli i kɛ: «Nannan, sɛ ɔ ti kɛ a o wa sa'n, wuun n niaan'n ɔ'a wu-man.»

³³ Kɛ Jésus wunnin kɛ ɔ su sun, bɔ Zuif nga be nin i bali'n be sun wie'n, i anwlɛn'n kpɛli i klun , i wun yo i nyɛiin.

³⁴ Ɔ usali be kɛ: «?An sieli i nin?» Be seli i kɛ: «Nannan, bla wa nian.»

³⁵ Jésus sunnin.

³⁶ Ɔ man Zuif'm be seli kɛ: «Niɛn i klolɛ b'ɔ klo i-ɔ.»

³⁷ Be wie'm be seli kɛ: «?I b'ɔ tikeli anyansifuɛ'n i nyinma'n, ɔ yo sɛ yɛ ɔ yacili bian nga lɛ ɔ wuli-ɔ?»

Lazar i cɛnlɛ

³⁸ I anwlɛn'n kpɛli i klun ekun, ɔ ɔli ndia'n su lɔ. Ndia'n ti yɛbuɛ buɛ yɛ be fali yɛbuɛ kun nyinnin i anuan.

³⁹ Jésus seli kɛ: «An `yi yɛbuɛ'n.» B'ɔwuliɛ'n i niaan bla Mart seli kɛ: «Nannan, kɛ be sieli i'n, i le nnan yɛ, ɔ su kpɛ.»

⁴⁰ Jésus seli i kɛ: «?M'an se-man wɔ kɛ sɛ a lafi n su'n a ´wun kɛ Nyanmiɛn'n ti kpli?»

⁴¹ Be yili yɛbuɛ'n. Jésus mɛnnin i nyin su niannin Nyanmiɛn su lɔ, yɛ ɔ seli kɛ: «N Si, kwla o, afin ndɛ nga n kannin'n, a tili.

⁴² N si kɛ a ti min ndɛ'n titi, sanngɛ sa nga ti yɛ n se sɔ'n, n ´se sɔ nan sran nga be sin yia min yɛ'n, be `lafi su kɛ wɔ yɛ a sunmannin min-ɔn.»

⁴³ Kɛ i nuan tɔli'n, ɔ kpannin kekle kpa kɛ: «Lazar, fite!»

⁴⁴ B'ɔwuliɛ'n fiteli, tannin tanmue'm be cici i sa nin i ja, yɛ tannin kun kɛtɛ i ti. Jésus seli be kɛ: «An `nyannji i man ɔ wɔ.»

Jɔlɛ difuɛ dandan'm bé bo yoli kun kɛ be `kun Jésus

⁴⁵ Zuif'm bɔ be bali Mari wun lɛ'n bɔ be wunnin sa nga Jésus yoli'n, be nun kpanngban be lafili i su.

⁴⁶ Sanngɛ be nun wie'm be ko toli Farizifuɛ mun be kannin sa nga Jésus yoli'n kleli be.

⁴⁷ Yɛ Nyanmiɛn nyrun jranfuɛ dandan mun nin Farizifuɛ'm be nin jɔlɛ difuɛ dandan mun be seli be kɛ: «E yo bian nga sɛ? Afin ɔ yi atrɛ kpanngban.

⁴⁸ Sɛ e yaci i lɛ nan ɔ yo sɔ'n, sran'm be kwlaa be ´lafi i su yɛ Rɔmfuɛ'm be wa saci e Nyanmiɛn'n sua'n nin e nvle'n.»

⁴⁹ Be nun kun bɔ be flɛ i kɛ Kaif'n b'ɔ ti Nyanmiɛn nyrun jranfuɛ'm be su kpɛn afuɛ sɔ nun'n, ɔ seli be kɛ: «An wun-man sa fi wlɛ.

⁵⁰ ?An bu-mɛn i akunndan kɛ sɛ sran'm be ti sran kun wu'n, ɔ ti kpa tra kɛ nvle wunmuan'n saci'n?»

⁵¹ Nán kɛ i bɔbɔ yɛ ɔ kpɛli i ti nun kannin-ɔn, sanngɛ kɛ i yɛ afuɛ sɔ'n nun ɔ ti Nyanmiɛn nyrun jranfuɛ'm be su kpɛn'n, yɛ man Nyanmiɛn fa wlɛli i nuan kɛ ɔ ´se kɛ san Jésus ´wu man nvle'n .

⁵² Nán kɛ nvle sɔ'n ngunmin ti-ɔ, sanngɛ ɔ ´yo sɔ nan Nyanmiɛn `kɛn i mma'm bɔ be sanndili'n be kwlaa bo nun.

⁵³ Ɔ man kɛ ɔ fin cɛn sɔ'n nun'n, i kunlɛ akunndan yɛ be bu-ɔ.

⁵⁴ I sɔ'n ti'n, Jésus ɔ'a wlan-wlan-man nzra'n nun Zuif'm be afiɛn kun, sanngɛ ɔ tuli i bo lɛ ɔli aawlɛ flɛnnɛn i bue liɛ'n su klɔ kaan bɔ be flɛ i Efraim'n su, ɔ nin i sɔnnzɔnfuɛ'm be trannin lɔ.

⁵⁵ Kɛ Zuif'm bé cɛn bɔ be flɛ i Delɛ-cɛn'n ɔ wa ju'n, sran kpanngban be fin klɔklɔ'm be su be dun mmua kɔ Zerizalɛm be ko yo bé wun saun nan Delɛ-cɛn'n sɔ'n ɔ'a ju.

⁵⁶ Be kunndɛli Jésus, kɛ be o Nyanmiɛn i sua'n nun lɛ'n, be usali be wiengu kɛ: «?An bu i sɛ, ɔ su ba-man cɛn'n bo wie?»

⁵⁷ Kɛ ɔ ´yo sɔ'n, wuun Nyanmiɛn nyrun jranfuɛ dandan mun nin Farizifuɛ mun b'a dun mmua b'a kan kle sran mun kɛ sɛ sran wie si kan Jésus wo'n, ɔ kan man be ko trɛ i.