Jean 1 - NYANMIƐN NDƐ'N 1998

Ndɛ'n i sran kacilɛ b'ɔ kacili'n

¹ Ndɛ'n wo lɛ lalaa i sin nan Nyanmiɛn a bo ninnge'm be yilɛ bo, Ndɛ'n nin Nyanmiɛn be o lɛ, Ndɛ sɔ'n ti Nyanmiɛn.

² Ɔ nin Nyanmiɛn be o lɛ lalaa.

³ I yɛ Nyanmiɛn man ɔ yili ninnge'n kwlaa-a, like fi nun-man lɛ bɔ nɛ́n i yɛ ɔ yili-ɔ.

⁴ I sa nun yɛ nguan'n wo-ɔ, nguan sɔ'n ti kɛ wia'n sa, ɔ man sran'm be wun ase.

⁵ Yɛ i kpajalɛ'n kpaja lika'n b'ɔ ti aosin'n nun, aosin'n ɔ'a kwla nuɛn-mɛn i.

⁶ Nyanmiɛn sunmannin bian kun, be flɛ i kɛ Zan .

⁷ Ɔ bali like bɔ man sran'm be wun ase'n i ndɛ kanlɛ nan sran'm be kwlaa be lafi Nyanmiɛn su i ndɛ sɔ'n ti.

⁸ Nan i bɔbɔ yɛ ɔ ti like b'ɔ man sran'm be wun ase nin-ɔn, sanngɛ ɔ bali like sɔ'n i ndɛ kanlɛ.

⁹ Like sɔ'n yɛ man sran'm be wun ase sakpa-a. Kɛ ɔ bali mɛn nun'n, ɔ man sran'm be kwlaa be wun ase .

¹⁰ Ɔ o mɛn'n nun lalaa, i yɛ Nyanmiɛn man ɔ yili mɛn nin-ɔn, sanngɛ mɛnfuɛ'm b'a si-mɛn i.

¹¹ Ɔ bɛli i bɔbɔ nvle'n nun, b'a sɔ-mɛn i nun.

¹² Sanngɛ be kwlaa nga be sɔli i nun bɔ be lafi i su'n, ɔ man be kaci Nyanmiɛn wa .

¹³ Nyanmiɛn wa bɔ be ti'n, b'a wu-man be kɛ be fa wu ba'n sa, b'ɔ fin yasua nin bla bɔ be klo kɛ be ´nyan ba'n, sanngɛ Nyanmiɛn bɔbɔ yɛ ɔ wuli be-ɔ.

¹⁴ Ndɛ sɔ'n kacili i wun sran, ɔ nin ye wa trannin, ɔ ti aklunyefuɛ nin nanwlɛfuɛ . E niɛnnin i anyrunnyan'n, ɔ ti anyrunnyan bɔ sɛ Ba b'ɔ ti kunngba'n i Si mɛn i-ɔ ɔ ti su .

¹⁵ Zan kɛnnin i ndɛ, ɔ kpan seli kɛ : «I yɛ n kɛnnin i ndɛ kɛ sran ng'ɔ o siɛn ɔ su ba'n nan ɔ lɛ nyrun tra min nin-ɔn, afin ɔ o lɛ i sin nan b'a wu min.»

¹⁶ E kwlaa e nyɛnnin i like kpakpa'n wie, ɔ yoli e ye nan ɔ'a yo e ye ekun.

¹⁷ Moiz yɛ Nyanmiɛn man ɔ fa mmla'n mannin ye-ɔ, Jésus-Krist kusu yɛ ɔ fa ye yolɛ'n nin nanwlɛ'n bali-ɔ .

¹⁸ Sran fi nian wun-man Nyanmiɛn le san i Wa kunngba'n b'ɔ nin i ti kun b'ɔ ti i anwlɛn su ba'n i yɛ man e sili i-ɔ .

Zan batɛm yofuɛ'n i Jésus ndɛ kanlɛ

¹⁹ An `nian, i nun nga Zerizalɛm Zuif'm be yili Nyanmiɛn nyrun jranfuɛ wie mun nin Levifuɛ wie mun kɛ be ko usa Zan kɛ wan yɛlɛ i'n, ndɛ ng'ɔ kannin'n yɛ.

²⁰ Ɔ'a si-man akplowa, ɔ kɛn weiin kleli be kɛ nɛ́n i yɛ ɔ ti Krist nin-ɔn.

²¹ Yɛ be usɛli i ekun kɛ: «?Wuun, wan yɛlɛ wɔ? ?Eli yɛlɛ wɔ ?» Ɔ seli be kɛ nɛ́n i yɛlɛ i. Be usɛli i ekun kɛ: «?Nyanmiɛn nuan ijɔfuɛ'n yɛlɛ wɔ?» Ɔ seli be kɛ: «Cɛcɛ.»

²² Ɔ man be usɛli i kɛ: «?Ɔ kpa'n, wan yɛlɛ wɔ?» Bua e wie man e wun ndɛ nga e ´ko kan kle be nga be sunmannin ye'n. «?A bu ɔ wun sɛ?»

²³ Ɔ seli kɛ i yɛ ɔ ti sran b'ɔ kpan aawlɛ flɛnnɛn nun lɔ ɔ se kɛ: «An `yo e Min'n i akpɔ'n seiin nan an `treke su» nin-ɔn . Ndɛ sɔ'n yɛ Nyanmiɛn nuan ijɔfuɛ Ezai kannin nin-ɔn.

²⁴ Be nga be sunmannin be'n, be wie'm be ti Farizifuɛ,

²⁵ be usali Zan kɛ: «?Sɛ a ti-man Krist nin Eli nin Nyanmiɛn nuan ijɔfuɛ'n, nguɛ ti yɛ a yo sran'm be batɛm nin-ɔn?»

²⁶ Zan seli be kɛ: «N liɛ'n, n yo sran'm be batɛm nzue'n nun . Sran kun o amun nun bɔ an si-mɛn i,

²⁷ ɔ o siɛn ɔ su ba. Min nin i ngbabua nyanman'n i nyannjilɛ fata-man.»

²⁸ Be yoli i sɔ sa'n Betani b'ɔ o nzue ba bɔ be flɛ i Zurdɛn'n i sin lɔ, lɔ yɛ Zan yoli sran'm be batɛm nin-ɔn.

An `nian Nyanmiɛn Bua Gbanflɛn'n

²⁹ Kɛ aliɛ cɛnnin'n, Zan wunnin kɛ Jésus su bɛ i wun lɛ nan ɔ'a se kɛ: «An `nian Nyanmiɛn Bua Gbanflɛn'n bɔ wa fɛ i wun yi mɛn'n i ti tɛ'n yɛ .»

³⁰ I yɛ n kɛnnin i ndɛ kɛ sran kun o siɛn ɔ su ba nan ɔ lɛ nyrun tra min nin-ɔn, afin ɔ o lɛ i sin nan b'a wu min.

³¹ Laa n si-man sran sɔ'n, sanngɛ m bali kɛ m ma yo sran'm be batɛm nzue'n nun nan Izraɛlfuɛ'm be si i.

³² Zan kɛnnin i ndɛ ekun kɛ: «N wunnin Nyanmiɛn Wawɛ'n, ɔ fin nyanmiɛn su lɔ kɛ auble sa, ɔ wa trɛnnin i su.»

³³ Ɔ kɛnnin i ekun kɛ: «Laa n si-mɛn i, sanngɛ Nyanmiɛn b'ɔ sunmannin n kɛ m ma yo batɛm sɔ'n, ɔ seli n kɛ: ‹Sran nga a wun kɛ n Wawɛ'n ɔ jra ɔ wa trɛn i su'n, i yɛ ɔ ´fa n Wawɛ'n yo sran'm be batɛm nin-ɔn.›

³⁴ N liɛ'n n wunnin i yɛ man n se kɛ i yɛ ɔ ti Nyanmiɛn Wa nin-ɔn.»

Jésus i sɔnnzɔnfuɛ klikli mun

³⁵ Kɛ i aliɛ cɛnnin ekun'n, Zan nin i sɔnnzɔnfuɛ'm be nun nnyɔn be o lɛ ekun.

³⁶ Kɛ ɔ wunnin Jésus b'ɔ ´sin'n, ɔ seli be kɛ: «An `nian Nyanmiɛn Bua Gbanflɛn'n yɛ.»

³⁷ Kɛ i sɔnnzɔnfuɛ nnyɔn sɔ'm be tili ndɛ sɔ'n, be suli Jésus su.

³⁸ Jésus ´kpɛ i nyin-ɔn, be su i su, yɛ ɔ usali be kɛ: «?Nguɛ yɛ an kunndɛ-ɔ?» Be usɛli i kɛ: «?Rabi, a tran nin?» (Rabi'n i bo yɛlɛ ninnge klefuɛ.)

³⁹ Ɔ seli be kɛ: «An `bla wa nian.» Be ɔli be ko sili i tranwlɛ'n, cɛn sɔ'n nun'n, be trɛnnin i wun lɔ lelele. Kɛ be ´kɔ'n, wuun lika'n ɔ'a kaci nnɔsua nun.

⁴⁰ Andre b'ɔ ti Simɔn Piɛr i niaan bian'n, ɔ ti sran nnyɔn bɔ be ti ndɛ nga Zan kannin bɔ be suli Jésus su'n be nun kun.

⁴¹ Ɔ ko toli i niaan bian Simɔn, yɛ ɔ seli i kɛ: «Y'a wun Mɛsi'n bɔ i bo yɛlɛ Krist'n.»

⁴² Ɔ fɛ i ɔli Jésus wun lɔ. Kɛ Jésus wunnin i'n, ɔ seli kɛ: «Be flɛ wɔ kɛ Simɔn, a ti Zan wa, kɛ ɔ fin ndɛ'n, be ´flɛ wɔ kɛ Sefas bɔ i bo yɛlɛ Piɛr.»

Jésus flɛli Filip nin Natanaɛl

⁴³ Kɛ i aliɛ cɛnnin ekun'n, Jésus waan ɔ ´kɔ Galile mɛn'n nun kpɛkuun ɔ wunnin Filip, yɛ ɔ seli i kɛ: «Bla wa su n su.»

⁴⁴ Filip fin Andre nin Piɛr be klɔ Bɛtsaida lɔ.

⁴⁵ Filip ko toli Natanaɛl, yɛ ɔ seli i kɛ: «Y'a wun sran nga e kɛnngɛn i ndɛ Moiz mmla fluwa'n nin Nyanmiɛn nuan ijɔfuɛ'm be liɛ'n nun'n, yɛlɛ Zozɛf i wa Jésus b'ɔ fin Nazarɛt.»

⁴⁶ Natanaɛl seli i kɛ: «?Nazarɛt olɛ ng'ɔ o lɛ'n, like kpa kun kwla fin lɔ fite?» Filip seli i kɛ: «Bla wa nian.»

⁴⁷ Kɛ Jésus wunnin Natanaɛl kɛ ɔ su bɛ i wun lɛ'n, ɔ kɛnnin i ndɛ kɛ: «An `nian, Izraɛlfuɛ kpa kun yɛ ɔ ´ba yɛ, ɔ ti-man gblɛfuɛ kaan sa.»

⁴⁸ Natanaɛl usɛli i kɛ: «?A si min nin?» Jésus seli i kɛ: «Kɛ Filip nian flɛ-man wɔ bɔ a o figie'n bo lɔ'n yɛ n wunnin wɔ-ɔ.»

⁴⁹ Yɛ Natanaɛl seli i kɛ: «Baba, wɔ yɛ a ti Nyanmiɛn Wa nin-ɔn, yɛ a ti Izraɛlfuɛ'm be famiɛn.»

⁵⁰ Jésus seli i kɛ: «Kɛ bɔ n seli wɔ kɛ n wunnin wɔ figie'n bo lɔ'n ti yɛ a lafi n su-ɔ. Sa nga a wa wun be'n, be wa bo ɔ́ nuan tra nga!

⁵¹ Nanwlɛ, an wa wun nyanmiɛn su lɔ kɛ ɔ ti tikewa, yɛ amun ´wun Nyanmiɛn i anz mun bɔ be fu be jra m bɔ n kacili Sran'n n su .»