Jɔlɛ Difuɛ Mun 9 - NYANMIƐN NDƐ'N 1998

Abimelɛk i niaan'm be kunlɛ ɔ nin i famiɛn dilɛ

¹ Zedeɔn b'ɔ i suan dunman yɛlɛ Zɛribaal'n i wa Abimelɛk ɔli i nin niaan bian'm bé wun Sisɛm lɔ. Ɔ seli be ɔ nin i nin osufuɛ'm be kɛ:

² «Amun `fa usa Sisɛm kpɛnngbɛn mun kɛ: ‹?Zɛribaal i wa ableso mun yɛ, sran kunngba yɛ, onin yɛ ɔ ti bɔ ɔ yo amun kpɛnngbɛn nin-ɔn? Nán amún wla fi su kɛ n liɛ'n, amún wa yɛlɛ min.»›

³ Yɛ i nin niaan'm be ko kannin ndɛ sɔ'n kleli Sisɛm lɔ kpɛnngbɛn mun-ɔn. Be kusu be kunman ɔli Abimelɛk su. Nga be kannin'n yɛlɛ kɛ: «I liɛ ɔ ti e niaan.»

⁴ Yɛ be fali jɛtɛ ufue ableso Baal-Bɛrit i sua nun lɔ be fa mɛnnin i-ɔ. Abimelɛk fa mannin sran finfinfuɛ nin nzajefuɛ mun yɛ be suli i su-ɔ.

⁵ Yɛ ɔ bali i si i awlo Ofra lɛ ɔ wa kunnin i niaan mun-ɔn, be ti Zɛribaal i klun ba. Ɔ kunnin sran yasua ableso yɛbuɛ kunngba su. San Zɔtam kunngba b'ɔ ti Zɛribaal i wa'm be nun kaan'n, yɛ ɔ'a nyɛn-mɛn i ɔ'a kun-mɛn i-ɔ. Ɔ ko fiali.

⁶ Sisɛm kpɛnngbɛn'm be kwlaa be nin be nga be tran Bɛt-Milo'n be kwlaa be yiali nan b'a sie Abimelɛk famiɛn sɛni waka b'ɔ kplan Sisɛm lɔ'n i wun lɛ.

Zɔtam i nyanndra'n

⁷ Zɔtam tili ndɛ sɔ'n, yɛ ɔ ɔli ko fuli Garizim oka'n su nan ɔ'a bo ndolo ɔ'a se kɛ: «Sisɛm kpɛnngbɛn mun, amun `sie amun su bé tie ndɛ wie. Man Anannganman kusu ɔ tie amun aniɛn'n.

⁸ Le kun o! Bo nun waka'm be ɔli be famiɛn sielɛ, yɛ be seli olivie kɛ: ‹Nja olivie, yo e famiɛn.›

⁹ Olivie waan: ‹?Min mma bɔ be yi i ngo be fa manman Nyanmiɛn nin sran mun'n, n `yaci i sulɛ nan n ko wlan-wlan waka'm be ti su nglo sa ngbɛn?›

¹⁰ Yɛ waka'm be seli figie'n kɛ: ‹Nja figie, bla wa yo e famiɛn!›

¹¹ Yɛ figie kusu tɛli bé su kɛ: ‹?Min mma b'ɔ yo fɛ'n, n `yaci i lɛ nan n `ko wlan-wlan waka'm bé ti su nglo sa ngbɛn?›

¹² Yɛ waka'm be seli vinyi waka'n kɛ: ‹Ɔ liɛ bla, bla wa yo e famiɛn.›

¹³ Vinyi waka'n seli be kɛ: ‹?N `yaci min nzan b'ɔ man amuɛn mun nin sran'm be klun jɔ nan n `ko wlan-wlan waka'm bé su?›

¹⁴ Yɛ waka'm be kwlakwla be seli susrɛ kɛ: ‹Nja Susrɛ, ɔliɛ bla wa yo e famiɛn.›

¹⁵ Yɛ susrɛ seli be kɛ: ‹Sɛ sakpa yɛ amun klo kɛ amun ´kpa min kɛ n yo amun famiɛn'n, amun `bla be wa fia min fɔnvɔ'n bo. Sɛ ɔ'a yo-man sɔ-ɔ, man sin fite owie'n nun yra Liban waka dandan mun.»›

¹⁶ Zɔtam waan: «I sɔ'n ti n tu amun kpli, n ´usa amun kɛ: ?Abimelɛk i famiɛn bɔ amun sieli i'n, i su-ɔ? ?Amun sili Zɛribaal (Zedeɔn) nin i awlofuɛ'm be wun ye? ?Ng'ɔ yoli mannin amun'n, yɛ amun niannin su yoli i lɛ-ɔ?

¹⁷ Mín si kunnin amun ti alɛ, ɔ klɛnnin i wun mannin wie'n ɔ fa deli amun. Ɔ deli amun Madianfuɛ'm bé sa nun,

¹⁸ kpɛkuun amun jasoli mín si i awlo'n wun, amun kunnin i mma mun, amun kunnin sran yasua ableso yɛbuɛ kunngba su. Yɛ Abimelɛk b'ɔ ti afanniɛn bla i wa'n yɛ amun fa sieli i Sisɛm famiɛn-ɔn, kɛ b'ɔ ti amun niaan'n ti.

¹⁹ I sɔ'n ti, sɛ sa kpa yɛ amun yoli mannin Zɛribaal nin i osu'n, man Abimelɛk ɔ yo man amun klun jɔ, yɛ man amun kusu amun `yo man i liɛ'n jɔ.

²⁰ Sɛ ɔ'a yo-man sɔ'n, man sin fin Abimelɛk nun ɔ di Sisɛm nin Bɛt-Milo kpɛnngbɛn mun, yɛ man sin fin Sisɛm nin Bɛt-Milo kpɛnngbɛn'm be nun di Abimelɛk!»

²¹ Zɔtam fɛli i lɛ ɔ ko fiali. Ɔ ɔli Beɛr, ɔ ko trannin i niaan Abimelɛk wun mmua.

Abimelɛk nin Sisɛmfuɛ'm be afiɛn sacilɛ

²² Abimelɛk sieli Izraɛl nvle'n afuɛ nsan.

²³ I sin, Anannganman wa fali sannganlɛ to yili Abimelɛk nin Sisɛmfuɛ'm be afiɛn. Sisɛm kpɛnngbɛn'm bé nyin ɔ'a yi-man Abimelɛk kun.

²⁴ Anannganman yoli sɔ nan abɔlɛ nga be yoli Zɛribaal i mma ableso mun'n, be nyɛn i nuan akatua. I waan Abimelɛk b'ɔ kunnin be'n, ɔ nyɛn i liɛ, nan Sisɛm kpɛnngbɛn'm bɔ be ukɛli i'n be kusu be nyan be liɛ.

²⁵ Sisɛm kpɛnngbɛn'm be fali sran sieli i oka'm be su kɛ sran nga be sin atin su'n, be `de bé bo ninnge mun. Abimelɛk tili sa sɔ'n.

²⁶ Ebɛd nin i wa Gaal, ɔ nin i niaan mun be wa trannin Sisɛm lɛ. Sisɛm kpɛnngbɛn'm be wa lafili i su.

²⁷ Le kun be ɔli fie su be ko tili vinyi mma. Be cuɛnnin i nzue. Be fa dili cɛn su. Be fa dili cɛn be amuɛn'n i sua'n nun. I sin be boli Abimelɛk i sannzan.

²⁸ Ebɛd i wa Gaal seli kɛ: «?Wan li yɛ be flɛ i Abimelɛk nin-ɔn? ?Nzu klɔ yɛlɛ Sisɛm bɔ i ti yɛ e ko su Abimelɛk-ɔ? ?Nán Zɛribaal i wa nin-ɔn? ?Nán klɔ'n i siefuɛ'n yɛlɛ Zɛbil? Sran b'ɔ fata bɔ be su be'n yɛlɛ Amɔrfuɛ mun, afin Amɔr yɛ ɔ takali Sisɛm klɔ nin-ɔn. ?Ɔ ju sɛ ti yɛ man e bɔbɔ e ko su Abimelɛk-ɔ?

²⁹ N liɛ'n, sɛ ɔ ti kɛ min yɛ n ti nvle nga i su kpɛn'n, wuun m'an fuan Abimelɛk lalaa.» Yɛ Gaal seli kɛ: «Abimelɛk, yiayia wɔ alɛ mma'm bé nuan nan e `kun.»

³⁰ Ndɛ sɔ'n bɔ Ebɛd i wa Gaal kannin'n, ɔ guali Zɛbil b'ɔ ti klɔ'n i su kpɛnngbɛn'n i su nun. Ɔ'a yo-mɛn i fɛ mlɔnmlɔn, i ti nan ɔ'a fa ya.

³¹ Ɔ sunmannin sran wie mun nvialiɛ nun Abimelɛk sin lɔ kɛ be ko se i kɛ: «Ebɛd i wa Gaal nin i niaan'm be bali Sisɛm sran'm be wlawlalɛ.

³² I sɔ'n ti, a nin ɔ sran mun amun `jaso kɔnguɛ nan amun `ko bu sa bo'n nun lɔ.

³³ Nan nglɛmun, kɛ wia'n fi cɛ'n, amun `jaso tɔ klɔ'n su. Kɛ Gaal nin i sran'm be wa jaso kɛ be nin amun be ´ko kun'n, like nga an kwla fa yo be'n, an `fa yo be!»

³⁴ Abimelɛk nin i sran'm be jasoli kɔnguɛ. Be buli bé wun nun akpasua nnan. Be ko bu sali Sisɛm wun koko lɛ.

³⁵ Kɛ Ebɛd i wa Gaal fin klɔ'n nun fiteli b'ɔ wa jrannin klɔ'n i anuan nun sa'n, wuun Abimelɛk nin i sran b'a fin be fiawlɛ'm be nun b'a fite.

³⁶ Gaal wunnin be nan ɔ'a se Zɛbil kɛ: «Nian, sran wie mun yɛ be fin oka'm be su be ´jra lɔ-ɔ.» Zɛbil tɛli i su kɛ: «Oka'm be fɔnvɔ'n yɛ ɔ ti ɔ sran nin-ɔn.»

³⁷ Gaal waan: «Sakpa, sran mun yɛ be fin nglo lika nun yɛ be ba lɔ lɛ. Be wie'm be sin kɔmiɛn'm be sɛni waka i atin'n su.»

³⁸ Zɛbil tɛli i su kɛ: «Yoo! ?A di ɔ́ nuan ngbɛn? Nán wɔ yɛ a waan: ‹?Abimelɛk'n yɛlɛ wan bɔ man e su i nin-ɔn? ?Nán sran nga a bu-man be like'n yɛ be o lɛ-ɔ? Ɔ yasua bɔ ɔ waan a ti'n, a nin be `ko kun alɛ'n man e nian.»›

³⁹ Gaal dunnin Sisɛmfuɛ'm be nyrun, be nin Abimelɛk be kunnin.

⁴⁰ Abimelɛk suli Gaal su nan Gaal ɔ'a wanndi i nyrun. Be kunnin i sran liɛ'm be sunman, be kunnin be lele be wa kunnin wie anuan kpa'n nun lɛ.

⁴¹ Abimelɛk jrannin Arima lɛ. Nan Zɛbil ɔ'a fuan Gaal nin i niaan mun, ɔ tanninnin be kɛ nán be tran Sisɛm lɛ kun.

⁴² Kɛ i aliɛ cɛnnin'n, be nga be kali klɔ'n nun lɛ'n be ɔli blo lɔ. Be kan kleli Abimelɛk.

⁴³ Ɔ fɛli i sran mun, ɔ buli be nun akpasua nsan, yɛ ɔ fali be nan ɔ nin be a ko bu a sa be nyrun, kpɛkuun sran mun yɛ be fin klɔ nun ´fite yɛ. Yɛ ɔ fiteli ɔ nin be ko kunnin, nan ɔ'a kwla be.

⁴⁴ Abimelɛk nin i akpasua liɛ'n be ɔli ndɛndɛ be ko jrannin klɔ'n i anuan nun. Kɛ ɔ ´yo sɔ'n, wuun akpasua nnyɔn nga'm be nin be nga be o bo'n nun lɔ'n b'a nyɛn i. Be kwlali be nga be o bo'n nun lɔ sɔ mun.

⁴⁵ Abimelɛk fali cɛn wunmuan kun sɔ'n, ɔ nin klɔ'n su sran'm be kunnin alɛ nan ɔ'a fa klɔ'n. Ɔ kunnin sran'm be kwlaa nga be o nun'n. Ɔ nunnunnin klɔ wunmuan'n. Ɔ fali njin sanndili klɔ'n nun.

⁴⁶ Kɛ Sisɛmfuɛ'm be tili ndɛ sɔ'n, be jasoli Sisɛm sasawlɛ sua'n nun, be ɔli amuɛn nga be flɛ i Bɛrit'n i sua fleiin b'ɔ ti fiawlɛ lika'n i nun lɔ.

⁴⁷ Abimelɛk tili i kɛ Sisɛmfuɛ'm b'a yia'n,

⁴⁸ yɛ ɔ fuli Salmɔn oka'n su-ɔ, ɔ nin i alɛ mma mun. Yɛ ɔ fali kpɛliɛ kun kpɛli waka sama kun. Ɔ mannin su sieli i kɔmin su. Yɛ ɔ seli sran'm be kɛ: «Amun `kan amun wun amun yo be liɛ.»

⁴⁹ Be kwlaa be kpɛli waka sama kunngun, be suli Abimelɛk su, be fa siesieli amuɛn sua'n i wun, nan b'a wɔ nun. Migdal-Sisɛm sran'm be kwlaa be yrali nan b'a wu. Be bla nin be yasua'm bɔ be ju sran kɔe akpi kun'n be wuli.

Abimelɛk wulɛ

⁵⁰ I sin Abimelɛk ɔli Tebɛt. Ɔ kpɛli ngblaliɛ Tebɛt i wun lɛ. Ɔ nin Tebɛtfuɛ'm be kunnin yɛ ɔ fali be klɔ nin-ɔn.

⁵¹ Klɔ'n i sasawlɛ sua kun bɔ be sili i wun'n ɔ o lɛ. I bla o, i yasua o, i klɔ'n su kpɛnngbɛn o, be kwlaa be wanndi ko fiali nun. Be toli i anuan'n nun yɛ be fuli i ti su lɔ-ɔ.

⁵² Abimelɛk bali, ɔ wa juli klɔ'n i sasawlɛ sua sɔ'n i wun lɛ, yɛ ɔ tɔli i sacilɛ'n wun-ɔn. Kɛ bɔ i waan ɔ ´wunnge klɔ'n i anuan wun lɔ nan ɔ ´ko wɔ nun'n,

⁵³ bla wie toli yɛbuɛ dan kun yili i su, nan i ti awa'n ɔ'a bo kplo.

⁵⁴ Abimelɛk flɛli gbanflɛn ng'ɔ trɛ i alɛ ninnge'm be nun'n kɛ ɔ bla ndɛndɛ nan ɔ wa yi i tokofi'n nan ɔ kun i, kɛ ɔ ´yo nan b'a se-man kɛ bla yɛ ɔ kunnin i'n ti. I gbanflɛn'n fɛli i tokofi wɔli i nan ɔ'a wu.

⁵⁵ Kɛ Izraɛlfuɛ'm be wunnin kɛ Abimelɛk ɔ'a wu'n, be sali bé sin nan b'a ɔ be awlo kunngun'm be nun.

⁵⁶ Abɔlɛ nga Abimelɛk yoli i si'n, i niaan ableso b'ɔ kunnin be'n, i sɔ klunwi liɛ'n, Nyanmiɛn fa tɛkɛli i ti su.

⁵⁷ Yɛ Sisɛmfuɛ'm bé tɛ liɛ nga be yoli'n kusu, Nyanmiɛn tanninnin be kalɛ. Ɔ man Zɛribaal i wa Zɔtam i sannzan ng'ɔ boli'n i su sa'n yoli.