Jɔlɛ Difuɛ Mun 8 - NYANMIƐN NDƐ'N 1998

Efraim i akpasua'n su sran'm be ya falɛ

¹ Efraim i akpasua'n su sran'm be usali Zedeɔn kɛ: «?Nzu ti yɛ a yoli e sɔ-ɔ? ?Kɛ a nin Madianfuɛ'm amun ´kun alɛ'n, nzu ti yɛ a bo-man su a kle-man ye-ɔ?» Be nin i kɛnnin i kekle kpa.

² Zedeɔn tɛli be su kɛ: «?Nán amun li yɛ amun kunnin alɛ nin-ɔn? Abiezɛr i crolo'n ɔ'a ju-man sɛ'n i lika fi, sanngɛ Efraim i akpasua'n su sran'm be kpɔkpɔ'n ɔ yili sɛ'n.

³ Amún sa nun yɛ Nyanmiɛn fali Madian famiɛn'n i awlo lɔ sran dandan nga be flɛ be Orɛb nin Zeɛb'n wlali-ɔ! Junman nga n dili'n be kwla fa sunnzun-man amun liɛ'n.» Kɛ Zedeɔn kɛnnin sɔ'n, be guali be ya'n i ase.

Sikɔt nin Peniɛlfuɛ'm bé tɛ'n nga be yoli Zedeɔn nin i sran mun'n i akatua'n

⁴ Zedeɔn nin i sonja ya nsan'm be juli Zurdɛn i nuan lɛ nan b'a kpɛ. Kɛ ɔ ´yo sɔ'n, wuun b'a fɛ, sanngɛ be tɛ su be kpɔfuɛ'm be su.

⁵ Yɛ ɔ seli Sikɔtfuɛ'm be kɛ: «Amun `yaci, amun `man sran nga e nin be ba mun be kpaun. B'a fɛ, sanngɛ be tɛ fuan Zebak nin Zalmɔna bɔ be ti Madian famiɛn'n.»

⁶ Sikɔt kpɛnngbɛn'm be tɛli i su kɛ yoo: «?Zebak nin Zalmɔna be li amu'an nyan be nin yɛ e `man wɔ alɛ kunfuɛ'm be kpaun-ɔn?»

⁷ Zedeɔn kusu seli be kɛ: «Sɛ Anannganman yi Zebak nin Zalmɔna man min'n, n ´fa aawlɛ'n nun lɔ owie'n n ´fa titi amun wunnɛn kplo'n.»

⁸ Be fɛli lɛ ɔli Peniɛl. Ɔ srɛli Peniɛlfuɛ'm be like kunngba'n. Be kusu be tɛli i su kɛ Sikɔtfuɛ'm bé sa.

⁹ Yɛ ɔ seli be kɛ: «Sɛ n nyan jranwlɛ nan n sa mín sin m ba'n, n ´saci amun sasawlɛ sua'n.»

¹⁰ Zebak nin Zalmɔna be nin be alɛ kunfuɛ mun be o Karkɔr. Sonja nga be kali'n be ti sran akpi-akpi blu-nin-nnun (15.000), be kwlaa be ti wia afiliɛ lɔ sran mun. Afin be nun akpi-akpi ya ablaɔn (120.000) be tɔli atin nun.

¹¹ Zedeɔn fali tannin sua nun tranfuɛ'm be atin'n su Nɔbak nin Zɔgbea be wia afiliɛ lɔ. Madianfuɛ'm be bu i kɛ wuun b'a nyan fiawlɛ klanman. Zedeɔn ɔli nan ɔ'a kwla be.

¹² Zebak nin Zalmɔna be wanndili. Zedeɔn suli bé su nan ɔ'a tra Madian famiɛn nnyɔn sɔ mun. Alɛ kunfuɛ'm be kusu, ɔ sanngannin be nun.

¹³ Kɛ alɛ'n wieli'n, Zɔas i wa Zedeɔn sɛli i sin. Ɔ fali Erɛs kpɔlɛ'n i atin'n.

¹⁴ Ɔ trali Sikɔt gbanflɛn kun nan ɔ'a usɛ i sa. Yɛ gbanflɛn sɔ'n klɛli Sikɔt kpɛnngbɛn'm be dunman mɛnnin i-ɔ. Be ti ableso-nin-nso.

¹⁵ Zedeɔn ko toli Sikɔtfuɛ mun, ɔ seli be kɛ: «Zebak nin Zalmɔna be yɛ. Nán be ti yɛ amun srisrili min bɔ amun seli min kɛ: ‹?Ninfan li yɛ a ´nyan Zebak nin Zalmɔna bɔ i ti yɛ a se kɛ ɔ sran'm b'a fɛ nan e man be kpaun nin-ɔn?»›

¹⁶ Ɔ trali klɔ'n su kpɛnngbɛn mun nan ɔ'a fa aawlɛ nun lɔ owie ɔ'a fa tu be fɔ.

¹⁷ I sin ɔ buli Peniɛl sasawlɛ sua'n. Ɔ kunnin klɔ'n i su sran mun.

¹⁸ Kpɛkuun ɔ usali Zebak nin Zalmɔna kɛ: «?Sran nga amun kunnin be Tabɔr lɔ'n, be wafa ti sɛ?» Be tɛli i su kɛ: «Be ti kɛ wɔ sa cɛ! Be kwlaa be wafa ti kɛ famiɛn mma mun sa.»

¹⁹ Yɛ Zedeɔn seli kɛ: «Cuekee! Min niaan mun-ɔn, mín nin mma mun-ɔn! N kan Nyanmiɛn ti, sɛ ɔ ti kɛ amun yacili be lɛ'n, wuun n su kun-man amun.»

²⁰ Yɛ ɔ seli Zetɛr b'ɔ ti i wa kpɛnngbɛn'n kɛ: «Jaso nan kun be.» Ba'n ɔ'a kwla yi-mɛn i tokofi'n srɛ'n b'ɔ kun i'n ti. Afin ɔ tɛ yo gbanflɛn.

²¹ Yɛ Zebak nin Zalmɔna be seli i kɛ: «Ɔ bɔbɔ jaso bla wa kun ye. Kɛ sran'n fa ti'n yɛ i fanngan'n fa ti-ɔ.» Yɛ Zedeɔn ko kunnin Zebak nin Zalmɔna-a, nan ɔ'a fa be nyɔnngɔnmɛn'm be kɔmin nyanman mun.

Zedeɔn i wulɛ

²² Izraɛlfuɛ'm be seli Zedeɔn kɛ: «Delɛ nga a deli e Madianfuɛ'm be sa nun yɛ'n ti, tran é su nan yo é su kpɛnngbɛn, a nin ɔ́ wa'n ɔ nin wɔ anunman mun amun `sie ye.»

²³ Zedeɔn seli be kɛ: «N yo-man amún su kpɛnngbɛn. Mín wa'n kusu su yo-man amún su kpɛnngbɛn, san Anannganman yɛ ɔ ´yo amún su kpɛnngbɛn-ɔn.»

²⁴ Ɔ seli be kɛ: «Sanngɛ n ´srɛ amun like kun. Amun kwlaa amun `fa Madianfuɛ'm bé bo ninnge nga amun nyɛnnin i'n i nun sika ɔkwlɛ be man min.» Madianfuɛ'm be kusu be wla sika ɔkwlɛ nga'n kpa. Sran nga be tran aawlɛ flɛnnɛn nun'n be liɛ su-ɔ.

²⁵ Izraɛlfuɛ'm be tɛli i su kɛ: «Ɔ ti e klun su.» Be sɛli tralɛ dan kun, nan be kwlaa b'a to be nga'n kunngun b'a yi su.

²⁶ Sika ɔkwlɛ nga bɔ Zedeɔn nyɛnnin i'n, i nɔnnin juli kilo ablaɔn. Sanngɛ kɔmin nyanman kanngan nin asunmanndi mun, ɔ nin tralɛ ɔkwlɛ nga Madian famiɛn'm bé wla'n, ɔ nin be nyɔnngɔnmɛn'm be kɔmin nyanman mun be nun-man nun.

²⁷ Zedeɔn fali sika ɔkwlɛ'n fa yoli sika ɔkwlɛ sran. Ɔ fa sieli i klɔ lɔ, be flɛ i klɔ'n kɛ Ofra. Yɛ Izraɛlfuɛ'm be kwlaa be ko koto i bo be sɔ i-ɔ. Ɔ yoli kɛ Zedeɔn nin i awlofuɛ'm be bɔbɔ bé wun aya sa.

²⁸ Madianfuɛ'm be suli Izraɛlfuɛ mun. B'a kwla man-man be ti su kun. Blɛ bɔ Zedeɔn i nyin tɛ o su'n lele b'ɔ fa wu'n, lika'n tɔli bliin afuɛ ablanan.

²⁹ Yɛ Zɔas i wa Zedeɔn b'ɔ be tɔnnin i Zɛribaal'n, ɔ sɛli i sin ko trannin i awlo lɔ-ɔ.

³⁰ Zedeɔn bɔbɔ i klun ba'm be ti ableso afin i yi'm be sɔnnin.

³¹ I soman ng'ɔ o Sisɛm lɔ'n i kusu wuli ba yasua kun. Zedeɔn flɛli i kɛ Abimelɛk.

³² Zɔas i wa Zedeɔn ɔ wa wuli. Ɔ yoli kpɛnngbɛn kpa nan ɔ'a wu. Be sieli i si Zɔas i asieliɛ'n nun lɔ Abiezɛr akpasua'n su sran'm be lika b'ɔ suan Ofra'n nun lɛ.

³³ Kɛ Zedeɔn wuli'n, Izraɛlfuɛ'm be sali bé sin be ko sɔli Baal. Be takali Baal-Bɛrit, ɔ yoli be amuɛn yɛ be sɔ-ɔ.

³⁴ Izraɛlfuɛ'm bé wla fili Anannganman bɔ i yɛ ɔ ti be Nyanmiɛn'n, i b'ɔ deli be be kpɔfuɛ nga be bo sin yia be'n bé sa nun'n, be wla fili i.

³⁵ Kusu Zedeɔn b'ɔ suan Zɛribaal'n b'ɔ yoli be ye'n, b'a si-mɛn i awlo'n i wun ye.