Jɔlɛ Difuɛ Mun 7 - NYANMIƐN NDƐ'N 1998

Anannganman kpali alɛ kunfuɛ mun

¹ Zedeɔn b'ɔ suan Zɛribaal'n, ɔ nin sran nga be yiɛli i wun lɛ'n, be kwlaa be jasoli nglɛmun ndɛ nan b'a ko bo nanmue nzue ti nga be flɛ i kɛ Arɔd'n i wun lɔ. Madianfuɛ'm be nanmue liɛ'n ɔ o Zedeɔn i liɛ'n i ti su nglo, kɛ a fɛ i ´kɔ Mɔre kpɔlɛ i ndɛnman lɔ lika kpɛtɛkplɛɛ nun lɔ'n.

² Anannganman seli Zedeɔn kɛ: «Sran nga be o ɔ́ sa nun'n be sɔnnin ngboko. Sɛ n yi Madian m man Izraɛlfuɛ mun'n, be wa fa di bé nuan be ´se kɛ: ‹E bɔbɔ é sa kekle yɛ e fa nyannin e ti-ɔ.› Kpɛkuun be ´kpi min dunman'n i ase.

³ I sɔ'n ti, bo ndolo kan kle Izraɛlfuɛ'm be kwlaa kɛ: ‹Sran nga i klun titi i bɔ i wun usu i'n, man ɔ sɛ i sin ɔ `wɔ Galaad oka'n wun mmua.»› Sran akpi-akpi ablaɔn-nin-nnyɔn (22.000) be sali bé sin. Sran akpi-akpi blu (10.000) be kali lɛ.

⁴ Anannganman seli Zedeɔn kɛ: «Sran nga be o ɔ́ sa nun'n be tɛ sɔn. Fa be kɔ nzue nuan lɔ nan n ko kpa be nun m ´man wɔ. Sran nga n se wɔ kɛ ɔ nin wɔ be wɔ'n, ɔ nin wɔ be ´kɔ. Sran nga n se wɔ kɛ nán ɔ nin wɔ be wɔ'n, i sɔfuɛ'n ɔ nin wɔ be su kɔ-man.»

⁵ Yɛ Zedeɔn fali sonja mun ɔli nzue nuan lɔ-ɔ. Anannganman seli i kɛ: «Be kwlaa nga be ondo bé sa'n sa nzue nɔn'n, sie be ngunmin. Be nga kusu bɔ be koto be bo bé ti nzue'n nun yɛ be nɔn'n, man be sin bue kun.»

⁶ Be nga be sa nzue'n bé sa nun nɔnnin'n be ti sran ya nsan. Be onga'm be kotoli, be boli bé ti nzue'n nun yɛ be nɔnnin-ɔn.

⁷ Yɛ Anannganman seli Zedeɔn kɛ: «Sran ya nsan nga be nɔn nzue'n bé sa nun'n, be yɛ n ´fa be n de amun-ɔn, be yɛ man n ´yi Madianfuɛ mun m ´man wɔ-ɔ. Man be nga'm be kwlaa be sa bé sin be tranwlɛ'm be nun.»

⁸ Sran ya nsan yɛ Zedeɔn fali be-ɔ. Yɛ ɔ seli sonja nga'm be kɛ be wɔ be awlo. Be fali be nga be ɔli'n be like diwa nin be awɛ mun. Madianfuɛ'm be nanmue'n ɔ o Zedeɔn liɛ'n i bo ngua lika tɔnun'n nun.

Zedeɔn i fanngan wlalɛ

⁹ Kɔnguɛ'n, Anannganman seli Zedeɔn kɛ: «Jaso, ko utu Madianfuɛ'm be nanmue'n, afin m'an yi i m'an man wɔ.

¹⁰ Sɛ srɛ kun wɔ lɔ kɔlɛ nun'n, man ɔ sufuɛ Pira ko sunman wɔ.

¹¹ Ndɛ nga a wa ti i lɔ'n, ɔ wa wla wɔ fanngan. Ɔ man kɔ be nanmue nuan lɛ.» Yɛ ɔ nin i sufuɛ Pira be ɔli-ɔ. Be juli Madianfuɛ'm be nanmue nuan, be juli be nga be sasa lika'n bé wun koko lɛ.

¹² Madianfuɛ mun, nin Amalɛkfuɛ mun, ɔ nin be nga be tran wia afiliɛ lɔ'n nun be ta oka i kongo nun kɛ lalo mun sa. Be nyɔnngɔnmɛn'm be kusu be sɔnnin kɛ jenvie nuan aunnyan'n sa.

¹³ Kɛ Zedeɔn ɔ ´ju lɛ'n, wuun bian kun su kɛn i laliɛ b'ɔ cɛnnin'n kle i wiengu kun. I waan: «N ´cɛn laliɛ-ɔ, ɔrz kpaun kun su kondo e nanmue'n nun. Ɔ bali lele ɔ wa sili tannin sua'n nan ɔ'a bu i. Ɔ suli i bo, kpɛkuun tannin sua'n langali i nyin aanga.»

¹⁴ Yɛ i wiengu'n seli i kɛ: «Zɔas i wa Zedeɔn b'ɔ ti Izraɛlfuɛ'n, i tokofi'n su laliɛ cɛ yɛ a cɛnnin i lɛ-ɔ. Nán like uflɛ fi-ɔ. Nyanmiɛn ɔ'a yi Madianfuɛ mun be nin be nanmue kwlaa ɔ'a mɛn i.»

¹⁵ Kɛ Zedeɔn tili laliɛ'n nin i bo tulɛ'n, ɔ kotoli Anannganman i bo nan ɔ'a lɛ i ase, yɛ ɔ sɛli i sin Izraɛl nanmue'n nun lɔ-ɔ. Ɔ seli be kɛ: «Amun `jaso! Anannganman ɔ'a yi Madianfuɛ'm be nanmue ɔ'a man amun.»

Madianfuɛ'm be nun sannganlɛ

¹⁶ Zedeɔn buli sran ya nsan'm be nun akpasua nsan. Ɔ wlali bé sa nun awɛ sɛsɛsɛ, yɛ ɔ mannin be sɛ mun. Like fi nun-man sɛ sɔ'm be nun. Ɔ fali tɛ sieli sɛ'm be nun.

¹⁷ Ɔ seli be kɛ: «Amun `nian nga n yo'n su be yo. Kɛ n wa ju nanmue i wun lɔ'n, like nga n yo'n amun `nian su be `yo.

¹⁸ Kɛ min nin min sran mun e ko bo awɛ'n, amun kusu amun `bo awɛ sin yia nanmue'n, kpɛkuun amun `kpan be se kɛ: ‹Anannganman i dunman nun, yɛ Zedeɔn dunman nun.› »

¹⁹ Zedeɔn nin i sran ya'm be juli ngblaliɛ wun lɔ. Kɛ ɔ ´yo sɔ'n, wuun blɛ li yɛ b'a siesie lika sasafuɛ mun-ɔn, wuun lika'n ɔ'a bu nun. Be fitali be awɛ'm be nun, be boli sɛ ng'ɔ o be sa nun'n.

²⁰ Be akpasua nsan'm be fitali be awɛ'm be nun, yɛ be boli sɛ mun-ɔn. Be sɔli tɛ'm be nuan, be o bé sa bɛ'm be nun. Awɛ nga be bo'n kusu o bé sa fama nun. Yɛ be kpannin-ɔn: «Anannganman i tokofi'n, nin Zedeɔn i tokofi'n!»

²¹ Be kali be osu kunngba nun lɛ nanmue'n i wun lɛ. Kɛ e ijɔwa-a, nanmue i nun sran'm be kwlaa b'a kan nun, be lɛ kpanlɛ ɔ nin wanndilɛ.

²² Yɛ sran ya nsan'm be fitali awɛ'n nun ekun-ɔn. Kpɛkuun Anannganman man Madianfuɛ nga bli i nyin wɔ i wiengu tokofi, nga bli i nyin wɔ i wiengu tokofi, kɛ ɔ ´yo sɔ'n, wuun be ´wanndi. Be wanndi lele juli Bɛt-Sita kɛ a fa kɔ Zɛrera klɔ wun lɔ'n, yɛ be juli Abɛl-Mɛɔla i nuan lɔ ekun Tabat wun lɔ.

²³ Kɛ Izraɛlfuɛ'm be tili i sɔ'n, be wie'm be fin Nɛftali i akpasua'n su, be wie'm be fin Azɛr i akpasua'n su, ɔ nin Manase i akpasua'n i asa'n kwlaa su bé ti yiali, yɛ be suli Madianfuɛ'm be su-ɔ.

²⁴ Zedeɔn kusu sunmannin sran kɛ be wɔ Efraim oka i bue'n kwlaa su be `ko se be kɛ: «Amun `jra be wa bu Madianfuɛ'm be nyrun, nan amun `jran nzue'm bé su lele ju Bɛt-Bara klɔ'n nin Zurdɛn nzue ba'n su. Nán amun man be atin man be kpɛ.»

²⁵ Yɛ be trali Madian famiɛn i awlo lɔ sran dan nnyɔn mun-ɔn: Orɛb nin Zeɛb. Kan be kunnin Orɛb'n yɛlɛ Orɛb yɛbuɛ'n su. Yɛ kan be kunnin Zeɛb'n yɛlɛ waka mma nzue cuɛnwlɛ bɔ be flɛ i Zeɛb'n su lɛ. Be suli Madianfuɛ'm be su nan b'a fa Orɛb nin Zeɛb bé ti mun a blɛ Zedeɔn Zurdɛn'n i bue kun lɔ.