Jɔlɛ Difuɛ Mun 6 - NYANMIƐN NDƐ'N 1998

Madianfuɛ'm be Izraɛlfuɛ'm be yalɛ klelɛ

¹ Izraɛlfuɛ'm be yoli like nga Anannganman klo-mɛn i ekun, nan Anannganman ɔ'a fa be a wlɛ i Madianfuɛ'm bé sa nun afuɛ nso.

² Kɛ Madianfuɛ'm be ko kle Izraɛlfuɛ'm be yalɛ'n yɛ be kleli be-ɔ. Kɛ ɔ ko yo nan Izraɛlfuɛ'm b'a nyan bé ti Madianfuɛ'm bé sa nun'n ti be fia oka'm be kɔtɔka'm be nun, nin yɛbuɛ buɛ'm be nun, ɔ nin oka be su yɛbuɛ godogodo'm be nun.

³ Kɛ Izraɛlfuɛ'm be ko lua be fie'm be su ninnge'n, wuun Madianfuɛ mun, nin Amalɛkfuɛ mun, ɔ nin be nga be tran wia afiliɛ lɔ'n b'a ba Izraɛlfuɛ'm be klunngbɔ wlalɛ.

⁴ Be wa bo be nanmue Izraɛlfuɛ'm be lika'n nun. Be saci be ninnge nga be lua be'n lele ɔ fa ju Gaza. Izraɛlfuɛ'm be fie su ninnge mun o, be bua mun o, be nannin mun o, be aflunmun mun o, b'a yaci-man kun sa lɛ!

⁵ Afin be ´ba'n, be fa be nnɛn mun, ɔ nin bé tannin sua mun yɛ be ba-a. Be kpanngban liɛ'n, a wun be sa-a, ɔ waan lalo mun-ɔn, be nin be nyɔnngɔnmɛn'm be tru lika nun sɔ trutrɛɛ yɛ be saci ninnge mun-ɔn.

⁶ Nanwlɛ, Madianfuɛ mun man Izraɛlfuɛ'm be wunnin nyrɛnnɛn. Yɛ Izraɛlfuɛ'm be kpan flɛli Anannganman-an.

⁷ Izraɛlfuɛ'm be kpan flɛli Anannganman kɛ ɔ de be Madianfuɛ'm be sa nun,

⁸ yɛ Anannganman sunmannin i nuan ijɔfuɛ kun Izraɛlfuɛ'm be wun lɔ-ɔ. Nyanmiɛn nuan ijɔfuɛ'n seli kɛ: «Anannganman b'ɔ ti Izraɛl Nyanmiɛn'n i wan yoo: ‹Min fanngan nun yɛ man amun fin Ezipt kan amun yoli kanga lɔ'n bali-ɔ.

⁹ N deli amun Eziptfuɛ mun, ɔ nin be nga be kle amun yalɛ'n bé sa nun. N fuannin be amun nyrun m mannin amun, n fali be mɛn'n m mannin amun.

¹⁰ Yɛ n seli amun kɛ: N ti Anannganman amun Nyanmiɛn. Amɔrfuɛ nga'm bé mɛn'n nun yɛ amun wo yɛ'n, nán amun sɔ be amuɛn mun. Sanngɛ, amu'an ti-man mín nuan ndɛ'n.› »

Zedeɔn i ndɛ

¹¹ Anannganman i anz'n bali, ɔ wa trannin Ofra lɔ waka nga be flɛ i terebɛnt'n bo lɛ. Waka sɔ'n ti Zɔas ng'ɔ ti Abiezɛr i osu nunfuɛ'n i liɛ. Kɛ ɔ ´yo sɔ'n, wuun i wa Zedeɔn ɔ o lɛ ɔ ´kpukpu i ble'n vinyi mma cuɛnwlɛ'n nun, nan ɔ ´fa fia Madianfuɛ'm be nyrun,

¹² kpɛkuun Anannganman i anz'n fiteli i nyrun lɛ, ɔ seli i kɛ: «Safunyrɛn, Anannganman nin wɔ be o nun.»

¹³ Zedeɔn tɛli i su kɛ: «?Ai nannan, sɛ Anannganman nin e o nun'n, yɛ wuun ɔ yo sɛ ti yɛ sa nga'm be ju e su-ɔ? ?Abonuan sa nga e si'm be kan kle e bɔ be waan: ‹Anannganman i fanngan nun yɛ e fin Ezipt lɔ e bali'n,› i sɔ abonuan sa liɛ ɔ yo sɛ ti yɛ e wun-man be kun-ɔn? Andɛ e yɛ Anannganman ɔ'a yi e blo yɛ, ɔ'a fa e ɔ'a wlɛ i Madianfuɛ'm bé sa nun.»

¹⁴ Anannganman niannin i siin, kpɛkuun ɔ seli i kɛ: «Fanngan ng'ɔ o ɔ nun lɛ'n, fa kɔ, ko de Izraɛl nvle'n Madianfuɛ'm bé sa nun. M bɔbɔ min yɛ n sunman wɔ-ɔ.»

¹⁵ Zedeɔn seli i kɛ: «?Nannan, nguɛ bɔ cɛ yɛ n ´fa de Izraɛl nvle nin-ɔn? Min awlo'n yɛ ɔ ti Manase akpasua'm be kasiɛn nin-ɔn. N kusu min yɛ n ti mín si i awlofuɛ'm be nun kaan-an.»

¹⁶ Anannganman seli i kɛ: «Ɔ nin i sɔ ngba'n, n wa jran ɔ́ sin, a wa kwla Madianfuɛ mun kɛ sran kunngba yɛ a nin i be su kun sa.»

¹⁷ Zedeɔn seli i kɛ: «Sɛ ɔ waan a ´yo min ye sakpa'n, kle min nzɔliɛ kun nan m'an wun i wlɛ kɛ wɔ yɛ a nin min su ijɔ yɛ.

¹⁸ Jran wa minndɛ min, man n wa fa sraka bɔ min waan n yi man wɔ'n n kle wɔ.» Anannganman tɛli i su kɛ: «Kɔ nan bla, m ´minndɛ wɔ.»

¹⁹ Zedeɔn ɔli i awlo lɔ, ɔ ko kunnin boli bɔ b'a kpɛ cro'n kun, ɔ tɔnnin, ɔ fɛli i nnɛn'n guɛli gbogbo kun nun, yɛ ɔ fɛ i bo tro'n guɛli i talie kun nun. Ɔ fali kpaun nzuɛn kilo ablasan fa tɔnnin kpaun bɔ kpaun ayre nun-man nun'n. Ɔ fa sieli su, ɔ fa bali waka bɔ be flɛ i terebɛnt'n i bo lɛ, nan ɔ'a fa man Anannganman i anz'n.

²⁰ Anannganman i anz'n seli i kɛ: «Nnɛn nin kpaun bɔ kpaun ayre nun-man nun'n, fa be sie i yɛbuɛ'n su, nan fa tro'n gua su.» Yɛ ɔ yoli sɔ-ɔ.

²¹ Kpɔnman kun wo Anannganman i anz'n i sa nun. Ɔ fali waka sɔ'n i ti'n kannin nnɛn nin kpaun'n bɔ kpaun ayre nun-man nun'n, kpɛkuun sin fiteli yɛbuɛ'n nun ɔ yrali nnɛn nin kpaun'n. Kpɛkuun Anannganman i anz'n mlinnin i nyrun lɛ.

²² Kɛ Zedeɔn wunnin i wlɛ kɛ Anannganman i anz'n, ɔ seli kɛ: «M'an wu o! Anannganman Nyanmiɛn Kpli! Wunlɛ nga m'an fa min nyinma m'an wun Anannganman i anz'n yɛ'n, min liɛ a wie.»

²³ Anannganman seli i kɛ: «Gua ɔ́ wla ase, nán ɔ́ klun titi wɔ, a su wu-man.»

²⁴ Zedeɔn kplannin Nyanmiɛn sɔwlɛ kun lɛ mannin Anannganman, nan ɔ'a tɔn i dunman kɛ: Anannganman Ti Aunjuɛ. Ɔ tɛ o Abiezɛr'm be lika nga be flɛ i Ofra'n i nun lɛ ndɛ.

Zedeɔn bubuli Baal i sɔwlɛ'n

²⁵ Kɔnguɛ kunngba sɔ nun'n, Anannganman seli Zedeɔn kɛ: «Fa ɔ́ si i nannin nga ɔ'a kpɛ cro'n, fa nannin tola kun ekun bɔ ɔ'a di afuɛ nso'n uka su. Bubu ɔ́ si i amuɛn nga be flɛ i kɛ Baal i sɔwlɛ'n, kpɛ waka bɔ i amuɛn nga be flɛ i Asera'n i nzɔliɛ'n wo su'n b'ɔ jin i wun lɛ'n.

²⁶ Kplan Nyanmiɛn sɔwlɛ kun yɛbuɛ sɔ'n i ti su fa man Anannganman ɔ Nyanmiɛn'n. Kpɛkuun fa nannin tola kun'n yi tɛ nga be yrɛ i nnɛn kɔlikɔli'n. Fa Asera waka nga a ´kpɛ'n yo i bo yie.»

²⁷ Yɛ Zedeɔn fɛli i sufuɛ'm be nun sran blu nan ɔ'a yo nga Anannganman kan kleli i'n, sanngɛ i si i awlofuɛ nin klɔfuɛ'm bé wun srɛ ti ɔ'a yo-mɛn i wia nun. Kɔnguɛ yɛ ɔ yoli-ɔ.

²⁸ I aliɛ b'ɔ cɛnnin'n, klɔfuɛ'm be jasoli nglɛmun ndɛ, be ´nian-an, Baal i sɔwlɛ'n yɛ b'a bubu i yɛ, b'a kpɛ waka nga Asera i nzɔliɛ'n wo su'n b'ɔ o i wun lɛ'n, b'a kplan Nyanmiɛn i sɔwlɛ, b'a fa nannin kun b'a yi tɛ nga be yrɛ i nnɛn kɔlikɔli'n Nyanmiɛn sɔwlɛ sɔ'n su.

²⁹ Be usa be wiengu kɛ: «?Wan yɛ ɔ yoli sa nga-a?» Be ´usa-usa-a, b'a wun kɛ Zɔas i wa Zedeɔn yɛ ɔ yoli i sɔ sa nin-ɔn.

³⁰ Be seli Zɔas kɛ: «Yi ɔ wa'n fite man e kun i, afin ɔ́ wa'n ɔ bubuli Baal i sɔwlɛ, ɔ kpɛli waka bɔ Asera i nzɔliɛ'n wo su'n, i ti fɛ i fa fite man e kun i.»

³¹ Zɔas tɛli be nga be seli i sɔ'n be kwlaa be su kɛ: «?Amun li yɛ amun ´tu Baal ti utre-ɔ? ?Amun yɛ amun ´ba i delɛ-ɔ? Sran kwlaa ng'ɔ tu Baal ti utre-ɔ, be ´kun i nan aliɛ'n ɔ'a cɛn. I bɔ yɛ be bubuli i sɔwlɛ'n, sɛ ɔ ti Nyanmiɛn'n, man i bɔbɔ ɔ kpli i ti e.»

³² Kɛ ɔ fɛ lɛ'n, be flɛli Zedeɔn kɛ Zɛribaal. I bo'n kle kɛ man Baal nin i be kun afin ɔ'a bubu i sɔwlɛ'n.

Zedeɔn sali Anannganman niannin

³³ Madianfuɛ'm be kwlaa be nin Amalɛkfuɛ mun, yɛ be nga be tran wia afiliɛ lɔ'n bé ti yiali. Be kpɛli Zurdɛn'n nan b'a bo be nanmue Zizreɛl kongo'n nun.

³⁴ Anannganman i Wawɛ'n jrali Zedeɔn su. Ɔ boli awɛ kɛ ɔ ´fa flɛ Abiezɛr i awlofuɛ mun kɛ be `su i su.

³⁵ Ɔ sunmannin sran Manase i akpasua'n su sran'm bé sin. Be kusu bé nuan yiali. Ɔ sunmannin sran Azɛr i akpasua'n su sran'm bé sin, ɔ nin Zabilɔn i akpasua su sran'm be sin, ɔ nin Nɛftali i akpasua su sran'm bé sin. Be kusu bé ti wa yiali i wun lɛ.

³⁶ Zedeɔn seli Nyanmiɛn kɛ: «Sɛ sakpa ɔ waan a ´wla min fanngan nan n `de Izraɛl mɛn'n,

³⁷ bua ndrɛ tannin yɛ n ´sɛ i asiɛ'n su yɛ. Sɛ bɔlɛ'n yaci asiɛ'n lɛ, nan ɔ gua tannin'n i kunngba su'n, n ´wun kɛ sakpa a klo kɛ a ´fa min de Izraɛlfuɛ mun kɛ a fa kannin'n sa.»

³⁸ Kpɛkuun ɔ yoli su sɔ sɛsɛsɛ. Zedeɔn jasoli nglɛmun ndɛ ɔ cuɛnnin tannin'n nun, kpɛkuun i nun nzue'n yili klowa kun.

³⁹ Zedeɔn seli Nyanmiɛn kɛ: «Nán fa ya mín wun o! N ´srɛ wɔ like kun ekun, yaci. Man n fa tannin'n n sa wɔ ekun, sanngɛ ndɛ liɛ'n man tannin i kunngba yɛ ɔ ka usi-usi-ɔ. Man bɔlɛ'n lua asiɛ'n.»

⁴⁰ Yɛ Nyanmiɛn man ɔ yoli sɔ kɔnguɛ sɔ nun-ɔn. Tannin'n i kunngba kali usi-usi, sanngɛ bɔlɛ luali i wun lɛ lika kwlaa.