Jɔlɛ Difuɛ Mun 5 - NYANMIƐN NDƐ'N 1998

Debora i jue'n

¹ I le kun sɔ'n, Debora nin Abinɔam i wa Barak be toli jue ng'ɔ o yɛ'n:

² «Man e la Anannganman'n i ase, afin Izraɛlfuɛ'm be siesieli bé wun kɛ be ´kun alɛ. Sran'm be bali be klun klo kɛ be ´ko kun alɛ sɔ'n.

³ Famiɛn mun nin siefuɛ mun, amun `sie amún su tie. N ´to jue m ´bo n flɛ Anannganman. M ´bo n flɛ Izraɛl Nyanmiɛn'n.

⁴ Anannganman, kɛ a fin Edɔm aawlɛ'n nun bali'n, kɛ a fin Seir oka'n su jrali'n, asiɛ'n kejeli, nyanmiɛn'n mlannin yɛ nzue'n tɔli dan kpa.

⁵ Oka'm be jran Anannganman nyrun-ɔn, ɔ jran-man kun. Sinai oka'n kejeli Anannganman b'ɔ ti Izraɛl Nyanmiɛn'n i nyrun.

⁶ Anat i wa Samgar i blɛ su'n, yɛ Zaɛl i blɛ su'n, be nga be sua ninnge'm be sin'n, be kunndɛ be-ɔ, be wu-man be. Lika kɔfuɛ'm be tɔ blo yɛ be kɔ-ɔ.

⁷ Kɛ ɔ ´yo sɔ'n, wuun be nyan-man kpɛn Izraɛl mɛn'n nun. Lele san m bɔbɔ min Debora n wa jasoli nan m'an yo kɛ Izraɛlfuɛ'm bé nin sa.

⁸ Laa, kɛ Izraɛlfuɛ'm be ko sɔ amuɛn mun cɛ'n, kpɛkuun alɛ a tɔ. Sran akpi-akpi ablanan (40.000) be nyan-man be wue sasalɛ like, ɔ nin cua ba kun sa Izraɛl mɛn'n nun.

⁹ N jin Izraɛl kpɛnngbɛn mun ɔ nin be nga be ɔli alɛ kunlɛ be klun klo'n bé sin. Man e la Anannganman i ase.

¹⁰ Amun nga be fu aflunmun ufue'm bé su'n, amun nga amun tran tapi nglanman'm bé su'n, ɔ nin amun nga amun kɔ atin sin'n, amun `to jue be manman Anannganman'n.

¹¹ Be nga be jran nzue sawlɛ'm bé su bɔ be cɛ nzue'n, be `yi Anannganman i ayɛ! Ye ng'ɔ yoli kpɛnngbɛn mun'n ti, be `yi i ayɛ! Anannganman i nvlefuɛ'm b'a ko jran klɔ'n i anuan'n nun.

¹² Tinnge, tinnge, Debora. Tinnge, man jue'n su. Abinɔam i wa Barak, jaso! Ɔ sran nga be trali be lomuɛn'n, ko fa be bla.

¹³ Yɛ Izraɛlfuɛ nga be tɛ ka'n be yiali kpɛnngbɛn'm bé wun lɛ-ɔ. Anannganman i nvle'n nun sran'm be bali i wun lɛ. Be ti kɛ safunyrɛn mun sa.

¹⁴ Yɛ Efraim i akpasua su sran'm bɔ be kwlali Amalɛkfuɛ mun'n be bali-ɔ. Bɛnzamɛn i akpasua'n su sran'm be suli bé su, be nin be sanngannin nun. Makir osu nun sran'm be kpɛnngbɛn'm be bali, Zabilɔn i osu'n nun sran'm be kpɛnngbɛn'm be bali,

¹⁵ Isakar famiɛn i awlo lɔ sran dan'm be suli Debora su. Isakar i akpasua'n su sran'm b'a kpɔci-man Barak, be wanndi suli i su lika kpɛtɛkplɛɛ'n nun lɔ. Sanngɛ Ribɛn i akpasua'n su sran'm be sili akplowa ngboko.

¹⁶ ?Ɔ yo sɛ ti yɛ amun kali nnɛn'm be tuin wun lɔ-ɔ, bɔ nnɛn'm be kpanlɛ bɔ be kpan'n yɛ amun sieli amun su bé bo nin-ɔn? Ribɛn i akpasua'n su sran'm be sili akplowa ngboko!

¹⁷ Galaad i akpasua su sran'm be kusu be kali be liɛ Zurdɛn'n i bue kun lɔ. ?Dan i akpasua sufuɛ'm be kusu, sɛ nguɛ sa ti yɛ be kali be mmeli'm bé wun lɔ a o? Azɛr i akpasua su sran'm be kusu be kali jenvie nuan lɔ, b'a keje-mɛn be wun. Be kali be mmeli'm be jranwlɛ'm bé su lɔ.

¹⁸ Zabilɔn i akpasua su sran'm be liɛ'n, b'a kan-man be nguan'n i sasalɛ ndɛ. Nɛftali i akpasua su sran'm be kusu o, be ɔli alɛ kunlɛ kpɔlɛ'm bé su.

¹⁹ Famiɛn'm be bali, Kanaan famiɛn'm be wa kunnin alɛ'n Tanak ɔ nin Megido nzue ti'm bé wun lɛ lele ngbɛn. B'a nyan-man be kpɔfuɛ'm bé bo like fi mlɔnmlɔn nan se kɛ sika yɛ be ´nyɛn i-ɔ.

²⁰ Nzraama'm be fin nyanmiɛn su lɔ be nin Sizɛra be wa kunnin.

²¹ Kizɔn nzue ba'n bɔ nán andɛ sa yɛ ɔ sonji'n, ɔ fali be ɔli. Man n sin n nanti yasua su n wɔ ke!

²² Kɛ e ijɔwa-a, nnɛn kpanngɔ'm be su wanndi kɔ. Bé ja bo'n tɛ-man ngowa.

²³ Anannganman i anz waan: ‹Amun `bo Merɔz klɔ'n i sannzan. Sannzan bɔ amun bo Merɔz i su sran mun'n yɛlɛ kɛ b'a ba-man Anannganman ukalɛ. B'a ba-man Anannganman i safunyrɛn'm be ukalɛ.›

²⁴ Ebɛr b'ɔ ti Kenfuɛ'n, i yi Zaɛl i liɛ su ti ye bla'm be nun! Bla nga be tran tannin sua'm be bo'n, Zaɛl i liɛ su ti ye be nun!

²⁵ Sizɛra srɛli i nzue, ɔ mɛnnin i nɔnnɔn. Ɔ fali nɔnnɔn nyin su ngo i aofuɛ klowa'n nun ɔ mɛnnin i ɔ nɔnnin.

²⁶ Kpɛkuun ɔ fali waka piembie kun i sa kun nun. Yɛ ɔ fɛli i sa fama'n ɔ fali junman difuɛ'm be marto'n ɔ fa boli Sizɛra i ti'n nun kpɔkpɔkpɔ, ɔ fitili i ti awa'n kplo boli nun lɔ.

²⁷ Ɔ kluli i bo lɛ nan ɔ'a tɔ. Ɔ ja lɛ. Kɛ ɔ kluli b'ɔ tɔli'n, kpɛkuun fɔuun ɔ'a jɔ.

²⁸ Sizɛra i nin'n wo i fenɛtri nun. Ɔ jin fenɛtri i griazi i sin yɛ ɔ nian-an. I waan: ‹Min wan yo! ?Ɔ yo sɛ ti yɛ i kakaklolo'n ɔ'a cɛ sa-a? ?Ɔ yo sɛ ti yɛ ndɛ i kakaklolo'm be nanti blɛblɛ sɔ-ɔ?›

²⁹ Kpɛkuun i kunngba o lɛ kan i janvuɛ'm be nun ngwlɛlɛfuɛ'n i su tɛlɛ b'ɔ tɛli'n, ɔ kan flan nun kɛ:

³⁰ ‹Kɛlɛ be su cɛ be kpɔfuɛ'm bé bo ninnge'm be nun, be su cɛ talua nga be tra be lomuɛn'm be nun: sonja kun talua kun annzɛ talua nnyɔn. Sizɛra i liɛ yɛlɛ be kondro bɔ be di nun aba nglanman-nglanman kpa mun. Kwlafuɛ'n i liɛ yɛlɛ tannin nga be di nun aba klanman kpa sakpa bɔ be fa gua be kɔmin nun'n.›

³¹ Anannganman, man ɔ kpɔfuɛ'm be wu sa tititi! Sanngɛ man be nga be klo wɔ'n be yo kɛ wia bɔ ɔ'a man su b'ɔ su bo kpa'n sa.» Kɛ ɔ yoli sɔ'n, lika'n tɔli bliin afuɛ ablanan.