Jɔlɛ Difuɛ Mun 4 - NYANMIƐN NDƐ'N 1998

Debora nin Barak be nin Zabɛn be alɛ kunlɛ'n ndɛ

¹ Kɛ Eid wuli'n, Izraɛlfuɛ'm be wa yoli like nga Anannganman klo-mɛn i ekun.

² Yɛ Anannganman fali be wlɛli i Zabɛn b'ɔ ti Kanaan famiɛn ng'ɔ tran Azɔr'n i sa nun-ɔn. Zabɛn i alɛ kunfuɛ'm be kpɛnngbɛn yɛlɛ Sizɛra. Ɔ trɛn i liɛ Arɔsɛt-Gɔim.

³ Izraɛlfuɛ'm be kpan flɛli Anannganman afin Sizɛra lɛ blalɛ kakaklolo ya ngwlan. Ɔ kleli Izraɛlfuɛ'm be nun afuɛ kɔe ablaɔn.

⁴ I blɛ sɔ nun'n, wuun Lapidɔt i yi Debora b'ɔ ti Nyanmiɛn nuan ijɔfuɛ'n, ɔ di jɔlɛ Izraɛl mɛn'n nun.

⁵ Ɔ tran mme kun b'ɔ o Efraim oka'n su'n i bo yɛ ɔ kan ndɛ nin-ɔn. Be tɔnnin mme sɔ'n i dunman kɛ Debora i mme. Ɔ o Rama nin Betɛl be afiɛn. Izraɛlfuɛ'm be kɔ i ja su yɛ ɔ di be jɔlɛ mun-ɔn.

⁶ Le kun ɔ sunmannin sran kɛ be ko flɛ Barak, Abinɔam ng'ɔ fin Kedɛs b'ɔ o Nɛftali lika nun lɔ'n i wa liɛ'n. Nan ɔ'a se i kɛ: «Ndɛ nga Anannganman b'ɔ ti Izraɛlfuɛ'm be Nyanmiɛn'n kaleli min kɛ n kan kle wɔ'n yɛ: ‹Kɔ Tabɔr oka'n wun lɔ nan fa Nɛftali nin Zabilɔn akpasua'n be su sran akpi blu (10.000).

⁷ N wa cuɛn Zabɛn i alɛ kunfuɛ'm bé su kpɛnngbɛn Sizɛra, nin i kakaklolo mun, ɔ nin i alɛ kunfuɛ mun, n ´fa be m ´ba ɔ́ wun lɛ Kizɔn nzue ba'n i nuan lɛ. Yɛ n ´fa be m ´man wɔ.»›

⁸ Barak tɛli i su kɛ: «Sɛ a ´wun kɛ n ´kɔ'n, wuun w'a ɔ min sunmanlɛ. Sɛ ɔ'a yo-man sɔ-ɔ, n kɔ-man.»

⁹ Yɛ Debora tɛli i su kɛ: «N wa ko sunman wɔ, sanngɛ a su nyan-man nyrun alɛ sɔ'n nun. Bla sin i sa nun yɛ Anannganman ɔ ´fa Sizɛra wla-a.» Yɛ Debora nin Barak be ɔli Kedɛs-ɔ.

¹⁰ Barak flɛli Zabilɔn nin Nɛftali be akpasua'n su sran mun Kedɛs lɔ. Sran akpi blu (10.000) be su i su, Debora su i su wie.

¹¹ Ebɛr b'ɔ ti Kenfuɛ'n, ɔ nin Moiz i sia liɛ Ɔbab i osu'n nunfuɛ mun b'a kwla tran-man. Ɔbab ti Kenfuɛ'm be nannan. Ebɛr ko kplɛnnin i tannin sua liɛ'n Zananim lɔ Sɛni waka'n i wun lɔ, lika sɔ'n ɔ o Kedɛs klɔ i wun koko lɛ.

¹² Be seli Sizɛra kɛ Abinɔam i wa Barak ɔ'a fu Tabɔr oka'n su.

¹³ Yɛ Sizɛra yoli man i blalɛ kakaklolo ya ngwlan'n, nin i alɛ kunfuɛ'm bɔ be o Arɔsɛt-Gɔim be kwlaa bé ti yiali Kizɔn nzue ba'n i nuan lɛ-ɔ.

¹⁴ Yɛ Debora seli Barak kɛ: «Jaso, ndɛkɛn yɛ Anannganman ɔ ´yi Sizɛra ´man wɔ-ɔ. Anannganman bɔbɔ ɔ ´dun mmua ɔ nyrun.» Yɛ Barak fin Tabɔr oka'n su jrali-ɔ. I sa nun sran'm be ti akpi blu (10.000).

¹⁵ Anannganman man Sizɛra nin i kakaklolo'm b'a nyan-man jranwlɛ, be wanndili Barak bo. Sizɛra fin i kakaklolo nun jrali nan ɔ'a wanndi i ja nun.

¹⁶ Barak suli kakaklolo nin alɛ kunfuɛ'm be su lele juli Arɔsɛt-Gɔim. Kɛ be ´ju lɛ'n, wuun b'a wie Sizɛra i alɛ kunfuɛ'm be kwlaa be kun. Be nun kun sa a ka-man lɛ.

¹⁷ Kɛ ɔ ´yo sɔ'n, wuun Sizɛra ɔ ´wanndi i ja nun ´kɔ. Ɔ ko fiali Ebɛr b'ɔ ti Kenfuɛ'n i yi Zaɛl, i tannin sua'n i bo lɔ, afin Zabɛn b'ɔ ti Azɔr famiɛn'n ɔ nin Ebɛr b'ɔ ti Kenfuɛ'n i awlofuɛ'm be di anuansɛ.

¹⁸ Yɛ Zaɛl fiteli-ɔ, ɔ ɔli Sizɛra i atin kpalɛ nan ɔ'a se i kɛ: «Min min bian, bla e sie like, bla wa sike min awlo wa. Nán ɔ klun ti wɔ kaan sa.» Ɔ sikeli bla'n i sua lɔ, nan bla'n ɔ'a fa kondro kun ɔ'a fa kɛtɛ i su.

¹⁹ Ɔ seli bla'n kɛ: «Man min nzue kan man n nɔn. Nzue we'n kun-man min ngowa.» Bla'n tikeli nɔnnɔn tonglo'n su fa mɛnnin i. Ɔ nɔnnin, yɛ bla'n katali i su ekun-ɔn.

²⁰ Bian'n seli i kɛ: «Jran anuan'n nun lɛ. Sɛ sran wie wa usa wɔ kɛ: ‹?Sran o wɔ awlo wa'n?› Tɛ i su kɛ: ‹Cɛcɛ.»›

²¹ Kɛ ɔ ´yo sɔ'n, wuun Sizɛra ɔ'a fɛ saa, ɔ su lafi kpa gbɔɔ! Yɛ Ebɛr i yi Zaɛl fali waka ti piembie kun ɔ nin marto kun, ɔ wunngeli i wun lɛ blɛblɛblɛ. Ɔ fali waka sɔ'n boli i ti'n nun, ɔ boli nun asiɛ'n nun, nan ɔ'a wu.

²² Zaɛl ´nian-an, Barak yɛ ɔ su kunndɛ Sizɛra yɛ. Ɔ ko kpɛli i atin nan ɔ'a se i kɛ: «Bla man n fa sran nga a su kunndɛ i'n n kle wɔ.» Ɔ wluli i sua lɔ, ɔ ´nian-an, Sizɛra yɛ ɔ la yɛ waka'n bo i ti'n nun, ɔ'a wu.

²³ Le kun sɔ nun'n, Nyanmiɛn'n boli Zabɛn b'ɔ ti Kanaan famiɛn'n mannin Izraɛlfuɛ mun.

²⁴ Aliɛ'n b'ɔ ´cɛn'n b'ɔ ´san'n, wuun Izraɛlfuɛ'm bé ta'n ɔ ´tin Zabɛn b'ɔ ti Kanaan famiɛn'n su, lele be kunnin i.