Jɔlɛ Difuɛ Mun 3 - NYANMIƐN NDƐ'N 1998

¹ Anannganman yacili be lɛ kɛ ɔ ´fa sa Izraɛlfuɛ nga b'a kun-man Kanaan alɛ'n wie mun nian.

² Anannganman waan ɔ ´yaci be lɛ nan Izraɛlfuɛ nga be ´kun alɛ'n b'a wun-man nun'n, be fa be a suan alɛ kunlɛ.

³ Nvle sɔ mun yɛ: Filistifuɛ'm be famiɛn diwlɛ nnun mun, Kanaanfuɛ'm be kwlaa, ɔ nin Sidɔnfuɛ mun, ɔ nin Evfuɛ nga be o Liban oka-oka'n nun mun ɔ fɛ i Baal-Ɛrmɔn oka'n su lele fa ju Amat klɔ'n i wun lɔ.

⁴ Nvle nga be o lɛ mun yɛ Anannganman yacili be lɛ kɛ ɔ ´fa sa Izraɛlfuɛ mun ɔ ´nian sɛ be ´fɛ i mmla ng'ɔ fa wlali Moiz nuan kɛ ɔ `fa kle be'n su o.

⁵ Izraɛlfuɛ'm be trannin Kanaanfuɛ mun, nin Ɛtfuɛ mun, nin Amɔrfuɛ mun, nin Ferezfuɛ mun, nin Evfuɛ mun ɔ nin Zɛbisfuɛ'm be afiɛn.

⁶ Be jali nvle sɔ'm be nun bla mun, be fali be mma mmla'm be mannin be kɛ be ja be, kpɛkuun be sɔli be amuɛn mun .

Ɔtniɛl i ndɛ

⁷ Izraɛlfuɛ'm be yoli like ng'ɔ kun Anannganman i ya'n. Bé wla fili Anannganman. Be ko sɔli amuɛn nga be flɛ be Baal nin waka nga be taka be bɔ be sɔ be'n.

⁸ Anannganman wa fali ya Izraɛlfuɛ'm bé wun. Ɔ yili i sa bé su mannin Kisan-Riseataim, b'ɔ ti Mezopotami famiɛn'n. Izraɛlfuɛ'm be suli Kisan-Riseataim afuɛ mɔcuɛ.

⁹ Yɛ be kpan flɛli Anannganman nan ɔ'a man be jɔlɛ difuɛ kun. Be flɛ i kɛ Ɔtniɛl. Kalɛb i sinma yasua Kɛnaz i wa-a.

¹⁰ Anannganman i Wawɛ'n jrɛli i su. Ɔ yoli Izraɛl nvle nun jɔlɛ difuɛ ɔ nin Kisan-Riseataim, b'ɔ ti Mezopotami famiɛn'n be kunnin, nan Anannganman ɔ'a yi famiɛn sɔ'n ɔ'a mɛn i.

¹¹ Izraɛl nvle'n tɔli fɔuun afuɛ ablanan. Yɛ Kɛnaz i wa Ɔtniɛl wuli-ɔ.

Eid i ndɛ

¹² Izraɛlfuɛ'm be yoli like nga Anannganman klo-mɛn i ekun. I sɔ'n ti yɛ Anannganman wlali Eglɔn b'ɔ ti Moab famiɛn'n i fanngan kɛ ɔ nin Izraɛlfuɛ'm be kun nin-ɔn.

¹³ Eglɔn fali Amɔnfuɛ nin Amalɛkfuɛ mun ukali i su nan ɔ nin Izraɛlfuɛ'm b'a ɔ kunlɛ. Be kwlali Izraɛlfuɛ mun, be fali Zeriko .

¹⁴ Izraɛlfuɛ'm be suli Eglɔn b'ɔ ti Moab famiɛn'n i afuɛ blu-nin-mɔcuɛ.

¹⁵ Yɛ Izraɛlfuɛ'm be kpan flɛli Anannganman ekun nan ɔ'a man bé defuɛ kun b'ɔ yɛlɛ Gera i wa Eid. I si Gera ti Bɛnzamɛn akpasua'n su sran. Eid di bɛ. Izraɛlfuɛ'm be sunmannin Eid kɛ ɔ fa like kun ko cɛ Eglɔn b'ɔ ti Moab famiɛn'n.

¹⁶ Eid boli i tokofi kun, ɔ lɛ i nyrun lɛ i sin. I tɛnndɛn'n ju bé sa koko kun. Ɔ fali tokofi sɔ'n sɛnnin i tralɛ'n i bo, i fama su.

¹⁷ Ɔ ko fali like sɔ'n mannin famiɛn Eglɔn b'ɔ ti Moab famiɛn'n. Eglɔn i wunnɛn'n wo i wun kpa.

¹⁸ Kɛ ɔ fali like'n mannin famiɛn'n wieli'n, ɔ seli be nga be suali like sɔ'n kɛ be `dun mmua.

¹⁹ I bɔbɔ ɔli lele juli amuɛn sɔwlɛ wie b'ɔ o Gilgal i wun lɔ'n nun. Kpɛkuun ɔ sɛli i sin ɔ wa seli famiɛn'n kɛ: «Nannan, n klo kɛ n ´tu wɔ aswre.» Yɛ famiɛn'n seli be nga be o i wun lɛ'm be kɛ be `cuɛn bé wun. Yɛ be fiteli-ɔ.

²⁰ Eid wluli i sin lɔ. Kɛ ɔ ´yo sɔ'n, wuun ɔ ti nglo sua ng'ɔ fa aunngban lɔ'n nun. Ɔ seli i kɛ: «Nyanmiɛn sunmannin min kɛ n kan ndɛ kun kle wɔ.» Yɛ famiɛn'n jasoli i famiɛn bia'n su-ɔ.

²¹ Eid fɛli i sa bɛ'n fa yili tokofi'n b'ɔ o i fama su lɔ'n, yɛ bi! Yɛ ɔ fa wɔli famiɛn'n i klun-ɔn.

²² Tokofi i ba'n nin i waka'n kwlaa wluli bian'n i klun, kpɛkuun bian'n i klun lui'n bu katali kue'n su. Eid yacili tokofi'n i klun.

²³ Eid nyinnin anuan'n nan ɔ'a to nun, kpɛkuun ɔ sinnin sua'n i sin lɔ fiteli.

²⁴ Nan ɔ'a ɔ. Kɛ ɔ ɔli'n, famiɛn'n i sufuɛ'm be wa nian-an, nglo sua'n su lɔ anuan'n i nun ti towa. Be bu i kɛ ɔ su kɔ atin nun nglo sua'n su lɔ.

²⁵ Yɛ be minndɛli kpa bɔ lɔuun, ɔ tike-man anuan'n. Yɛ be fali lakle'n be tikeli anuan nin-ɔn. Be ´nian-an, be min bian'n yɛ ɔ la yɛ. Ɔ'a wu.

²⁶ Blɛ nga be ´minndɛ lɛ'n, wuun Eid ɔ'a wanndi ɔ'a ɔ lalaa. Ɔ sannin amuɛn sɔwlɛ wun ɔ ɔli Sɛira.

²⁷ Kɛ ɔ wluli klɔ nun cɛ'n, yɛ ɔ fitali awɛ nun Efraim oka'n su lɔ-ɔ. Yɛ Izraɛlfuɛ'm be nin i fin oka'n su lɔ jrali-ɔ, ɔ dun be mmua.

²⁸ Ɔ seli be kɛ: «Nanwlɛ Anannganman ɔ'a yi Moabfuɛ mun bɔ be ti amun kpɔfuɛ'n ɔ'a man amun. Amun man e wɔ!» Be suli i su. Be fali kan be nanti bé ja nun kpɛ Zurdɛn lɛ. B'a man-man sran fi atin kɛ ɔ sin.

²⁹ Nan b'a kwla Moabfuɛ mun. Be kunnin sran kɔe akpi blu (10.000). Be kwlaa sɔ'n be ti alɛ kunfuɛ kpakpa mun nin yakpafuɛ mun. Be wie fi ɔ'a fite-man nun.

³⁰ Kɛ ɔ fin le kun sɔ nun'n, Moabfuɛ'm be ti'n wo Izraɛlfuɛ'm bé bo. Lika'n wa tɔli bliin afuɛ ablaɔcuɛ.

Samgar i ndɛ

³¹ I sin Anat i wa Samgar yɛ ɔ wa jasoli su-ɔ. Ɔ fali nannin kankanlɛ waka kun kunnin Filistifuɛ'm be nun sran ya nsiɛn. I kusu deli Izraɛlfuɛ'm be wie.