Jɔlɛ Difuɛ Mun 21 - NYANMIƐN NDƐ'N 1998

Izraɛlfuɛ'm be kokolɛ bɔ be kokoli'n

¹ Kɛ Izraɛlfuɛ'm be yiali Mizpa lɔ'n, be tali nda be seli kɛ: «Nán e nun sran kun fɛ i wa bla man Bɛnzamɛn akpasua su sran kun kɛ ɔ jɛ i!»

² Izraɛlfuɛ'm be wa yiali Betɛl, be bo yoli kun be srɛli Nyanmiɛn lɛ lele nnɔsua. Be sunnin sunlɛ kpa, yɛ be seli kɛ:

³ «Ee! ?Anannganman b'ɔ ti Izraɛl Nyanmiɛn'n, kɛ Izraɛl akpasua'n kun ɔ'a nunnun'n, nguɛ ndɛ liɛ yɛlɛ nga?»

⁴ Kɛ i aliɛ'n cɛnnin'n, Izraɛlfuɛ'm be jasoli nglɛmun ndɛ kpa nan b'a kplan Nyanmiɛn i sɔwlɛ kun lɛ. Nan b'a yi tɛ nga be yra be nnɛn'n kɔlikɔli'n, ɔ nin bo kun yolɛ i su tɛ mun.

⁵ Kpɛkuun be usali kɛ: «?Yialɛ nga y'a yia yɛ'n, Izraɛlfuɛ wie'm b'a yia-man wie?» Afin be tali nda kɛ sran kwlaa bɔ be ´ko yia Mizpa lɔ bɔ ɔ'a ɔ-man wie'n, be ´kun i.

⁶ Izraɛlfuɛ'm be kokoli kpa bé niaan bɔ be fin Bɛnzamɛn akpasua'n su b'ɔ be tuli Izraɛl nvle nun'n ti.

⁷ Be usali bé wun kɛ: «?Bé kan nga be kali lɛ'n, nguɛ yɛ e ´yo man be nan b'a nyan bla-a? Afin y'a bo Anannganman dunman y'a ta nda kɛ: ‹E fa-man e wa bla mun e man-man be kɛ be ja be.»›

⁸ I ti yɛ be usali be wiengu kɛ: «?Akpasua onin yɛ kɛ e ´yia Mizpa lɔ'n, i su sran wie ɔ'a ba-man wie nin-ɔn? Kpɛkuun be ´usa-a, Zabɛs b'ɔ o Galaad lɔ'n i su sran fi ɔ'a ba-man anyia'n i bo wie.»

⁹ Kɛ be ´ka sran mun'n, Zabɛs b'ɔ o Galaad lɔ'n i su sran fi nun-man be nun.

¹⁰ Yɛ Izraɛl nvle'n nunfuɛ'm be sunmannin alɛ kunfuɛ akpi-akpi blu-nin-nnyɔn (12.000), nan b'a se be kɛ: «Amun `fa tokofi be ko kun Zabɛsfuɛ mun Galaad akpasua'n su lɔ. Amun `kun bla mun nin ba kanngan mun wie.

¹¹ Amun `kun yasua'm be kwlakwla ɔ nin bla nga b'a si yasua'n.»

Zabɛs talua mɔnnɛn bɔ be trali be mannin Bɛnzamɛn akpasua su sran mun'n

¹² Be ɔli nan b'a tra talua mɔnnɛn ya nnan Zabɛs b'ɔ o Galaad akpasua'n su lɔ'n su. Be nin bian nian la-man le. Yɛ be fali be bali Silo b'ɔ o Kanaan nvle'n nun lɛ'n i nanmue nun lɛ-ɔ.

¹³ Izraɛlfuɛ'm be sunmannin sran Bɛnzamɛn akpasua'n su sran nga be o Rimɔn yɛbuɛ wun lɔ'm bé sin kɛ be kplin su kɛ be siesie be afiɛn.

¹⁴ Kpɛkuun Bɛnzamɛn akpasua'n su sran'm be jasoli lɔ be bali, nan Izraɛlfuɛ'm b'a fa Zabɛs lɔ bla nga bɔ be yacili be lɛ'n b'a man be, sanngɛ be ngba b'a nyan-man wie.

¹⁵ Bɛnzamɛn akpasua'n su sran'm be yoli Izraɛlfuɛ'm be annvɔ Izraɛl akpasua kun sɔ bɔ Anannganman kpɔcili i'n ti.

¹⁶ Nvle nun kpɛnngbɛn'm be usali bé wun kɛ: «?E ´yo sɛ nan be nga be kali lɛ'n b'a nyan bla b'a ja? Afin Bɛnzamɛn akpasua su bla'm be wieli wu.»

¹⁷ Yɛ be waan: «Man Bɛnzamɛn akpasua'n su sran nga be nyannin bé ti'n, be di be akpasua'n nun aja kɛ ɔ ´yo nan akpasua kun sa ɔ'a tu-man Izraɛl nvle'n nun'n ti.

¹⁸ Yɛ sanngɛ e kwla fa-man e mma bla mun e man-man be, afin e tali nda kɛ: ‹Nán Izraɛlfuɛ fi fa bla man Bɛnzamɛnfuɛ kun, nan sran ng'ɔ yo sɔ'n, nán man ɔ wun ye le.»›

¹⁹ Yɛ be wla kpɛnnin su kɛ afuɛ nuan kwlaa nun Anannganman i cɛn bɔ be di i Silo lɔ'n, ɔ su wa ju. Silo'n wo Betɛl i nglo, ɔ o Lɛbɔna i ngua, atin ng'ɔ fɛ i Betɛl kɔ Sisɛm i wia afiliɛ lɔ.

²⁰ Yɛ be seli Bɛnzamɛn akpasua su sran'm be kɛ: «Amun `ko fia vinyi fie'm be nun.

²¹ Kɛ amun ´nian nan Silo talua'm b'a fite nan be su si able'n, amun `fin vinyi fie'm be nun fite, amun `ko tra amun ti nun bla kunngun, nan amun `fa be ɔ amun mɛn'n nun be `ko ja be.»

²² Sɛ bé si nin be niaan mun be wa sanman amun e ja su'n, e ´se be kɛ: «Amun `fa fli ye, yɛlɛ kɛ bla nga e trali be lomuɛn'n b'a ju-man Bɛnzamɛnfuɛ'm bé ti nun kunngun. Sɛ ɔ ti kɛ amun bɔbɔ yɛ amun fali bla mun mannin be'n, wuun sannzan wo amún su.»

²³ Kɛ Bɛnzamɛn akpasua'n su sran'm be yoli sɔ-ɔ. Be trali bla nga be si able'n bé ti nun kunngun, yɛ be sali bé sin be tranwlɛ-ɔ. Be kplannin be klɔ mun uflɛ nan b'a tran be nun.

²⁴ Kɛ ɔ yoli sɔ'n, yɛ Izraɛlfuɛ'm be sali be sin be akpasua'm bé su ɔ nin be awlo'm be nun-ɔn. Be ɔli be tranwlɛ.

²⁵ I blɛ sɔ nun'n, wuun famiɛn nun-man Izraɛl mɛn'n nun mlɔnmlɔn. Sran kun i klunklo like nga i waan ɔ ´yo'n yɛ ɔ yo-ɔ.