Jɔlɛ Difuɛ Mun 20 - NYANMIƐN NDƐ'N 1998

Izraɛlfuɛ mun nin Bɛnzamɛnfuɛ mun be alɛ kunlɛ

¹ Izraɛlfuɛ'm bɔ be o kan ɔ fɛ i Dan b'ɔ o nglo lɔ'n b'ɔ fa ju Beɛr-Seba b'ɔ o ngua lɔ'n, be kwlaa be bali. Be nga be o Galaad b'ɔ o wia afiliɛ lɔ'n be bali wie. Bé nuan yoli kun be yiali Anannganman nyrun Mizpa lɔ.

² Be kpɛnngbɛn'm be ngba be nin akpasua'm be kwlaa be su sran'm be bali Nyanmiɛn i nvle'n i anyia sɔ'n i bo. Be kwlaa sɔ'm be ti sran akpi-akpi ya nnan (400.000). Be tra tokofi nun-ɔn, ɔ yo ye.

³ Bɛnzamɛn akpasua'n su sran'm be kusu be tili i kɛ Izraɛlfuɛ'm b'a ɔ anyia Mizpa lɔ. Izraɛlfuɛ'm be usali kɛ: «?Ndɛ'n yoli sɛ?»

⁴ Yɛ Levi akpasua'n su sran nga be kunnin i yi'n, ɔ fɛli i nuan wlɛli i ndɛ'n nun yɛ ɔ ´kan-an. Ɔ seli kɛ: «E nin min soman'n e juli Bɛnzamɛn klɔ nga be flɛ i Gibea'n su. E waan e ´la lɛ.

⁵ Gibeafuɛ'm be jasoli mín wun. Be wa bo sin yiali sua nga n la nun'n kɔnguɛ. Kunlɛ li yɛ be waan be ´kun min-ɔn. Be nin min soman'n be lali kekle nun lele ɔ wuli.

⁶ N fali min soman'n, n kpɛkpɛli i nun, n fɛli i nnɛn'n n ko cɛcɛli Izraɛl nvle'n kwlaa nun afin sa nga be yoli'n ti tɛ. Be boli tete Izraɛl nvle'n nun.

⁷ E Izraɛlfuɛ mun e kwlaa'n yɛ y'a yia yɛ. Amun `wun amun wun nan amun ti amun wun aniɛn.»

⁸ Nzrafuɛ'm be kwlakwla be jasoli likawlɛ nan b'a se kɛ: «E kwlaa nga y'a yia yɛ'n, sran fi su sɛ-mɛn i sin i tranwlɛ.

⁹ Like nga e ´fa yo Gibeafuɛ mun'n yɛ: man e tu fɔtɔ,

¹⁰ nan e ka Izraɛl akpasua'n su sran'm be ngba. Kɛ e ka sran blu'n, e `yi sran kun, kɛ e ka sran ya'n, e `yi sran blu, kɛ e ka sran akpi'n, e `yi sran ya, kɛ e ka sran akpi blu'n (10.000), e `yi sran akpi. I sɔ sran'm be ´ko kunndɛ like diwa blɛ nzrafuɛ nga b'a yia yɛ'n. Kɛ be ju wa cɛ'n, e ´tu Bɛnzamɛn klɔ nga be flɛ i Gibea'n i nunfuɛ'm be fɔ tete bɔ be boli i Izraɛl nvle nun'n ti.»

¹¹ Izraɛlfuɛ'm be kwlaa bé nuan yoli kun be kan boli nun kɛ be nin klɔ'n su fuɛ'm be ´kun.

¹² Izraɛl akpasua sufuɛ'm be sunmannin sran Bɛnzamɛn awlo kunngun'm be nun kɛ be usa be kɛ: «?Nguɛ sa tɛ liɛ yɛ amun yoli i sɔ-ɔ?

¹³ Amun `yi Gibea lɔ finfinfuɛ sɔ mun man e nan e kun be, nan sa tɛ sɔ'n nunnun Izraɛl nvle'n nun.» Sanngɛ Bɛnzamɛn akpasua su sran'm b'a tie-man be niaan Izraɛlfuɛ'm be nuan su ndɛ'n.

¹⁴ Be fin be klɔ'm bé su be fiteli, be ti yiali Gibea lɛ kɛ be nin Izraɛlfuɛ'm be ´kun.

¹⁵ Bɛnzamɛn akpasua'n su sran nga be fin be klɔ'm bé su be wa yiali Gibea lɛ'n, kɛ be ka be'n, be nga b'a ju alɛ kunlɛ'n be ti sran akpi-akpi ablaɔn-nin-nsiɛn (26.000). Be nun ya nso be ti safunyrɛn. Gibeafuɛ'm be nun-man nun.

¹⁶ Sran'm be kwlaa be nun'n, sran ya nso be di bɛ. Sɛ be sunnzun ti ndrɛ kun wun nan be fa yɛbuɛ to i wun kpafloko'n, ɔ sɛn-mɛn i wun.

¹⁷ Be kali Izraɛlfuɛ'm be kusu, kɛ Bɛnzamɛn akpasua'n su sran'm be nun-man nun'n, be kwlaa nga b'a ju alɛ kunlɛ'n be ti sran akpi-akpi ya nnan (400.000). Be kwlaa'n be ti alɛ kunfuɛ mun.

¹⁸ Be jasoli, be ɔli Betɛl yɛ be usali Nyanmiɛn sa, be waan: «?E nun onin yɛ ɔ ´dun mmua nin Bɛnzamɛnfuɛ'm be ´ko kun-ɔn?» Anannganman waan: «Man Zida akpasua'n yɛ ɔ dun mmua-a.»

¹⁹ Izraɛlfuɛ'm be jasoli nglɛmun ndɛ be ko kpɛli be ngblaliɛ Gibea wun lɔ.

²⁰ Izraɛlfuɛ'm be ɔli kɛ be nin Bɛnzamɛnfuɛ'm be ko kun, be ko jranjrannin Gibea ndɛnman.

²¹ Bɛnzamɛnfuɛ'm be fin Gibea lɔ fiteli, le kun sɔ'n nun nan b'a kun Izraɛlfuɛ'm be nun sran akpi-akpi ablaɔn-nin-nnyɔn (22.000).

²² Izraɛl sonja'm be trali be anwlɛn. Be ko jranjrannin kan be jrannin lɛ cɛn klikli nun'n. Be jranjrannin kɛ be ´kun alɛ.

²³ Izraɛlfuɛ'm be dun mmua be ko sunnin Anannganman nyrun lele nnɔsua, be usali Anannganman sa. Be usɛli i kɛ: «?E nin e niaan Bɛnzamɛn i akpasua'n su sran mun e `kun ekun?» Anannganman tɛli be su kɛ: «Amun nin be `ko kun ekun.»

²⁴ I le nnyɔn su'n, be fali alɛ wlali Bɛnzamɛn akpasua'n su sran'm bé sin ekun.

²⁵ Bɛnzamɛn akpasua'n su sran'm be kusu be fiteli nan b'a kun be nun sran akpi-akpi blu nin mɔcuɛ (18.000), be guali sɔ fɛiin! Be kwlaa sɔ'n be ti alɛ kunfuɛ kpakpa ngunmin.

²⁶ Kɛ ɔ yoli sɔ'n, Izraɛlfuɛ'm be kwlakwla be ɔli Betɛl nan b'a sun. Be cili nglɛmun, be trannin Anannganman nyrun lɛ lele nnɔsua. Be yili tɛ nga be yra be nnɛn'n kɔlikɔli'n, ɔ nin bo kun yolɛ i su tɛ mun be mannin Anannganman.

^27-28 Kɛ ɔ ´yo sɔ'n, wuun Nyanmiɛn i alaka'n wo lɛ'n, wuun Aarɔn i wa Eleazar i klun ba liɛ Fine yɛ ɔ ti Nyanmiɛn i nyrun jranfuɛ-ɔ. Ɔ usali Anannganman kɛ: «?E nin e niaan Bɛnzamɛnfuɛ mun e `kun alɛ'n ekun annzɛ nán e nin be e kun kun?» Anannganman tɛli bé su kɛ: «Amun nin be `ko kun, ainman n ´yi be n ´wla amún sa nun.»

²⁹ Yɛ Izraɛlfuɛ'm be ko bu sali Gibea wun lɔ-ɔ.

³⁰ Le nsan'n su'n, Izraɛlfuɛ'm be ko fali alɛ'n wlali Bɛnzamɛn akpasua'n su sran'm bé sin. Be ko jranjrannin Gibea nyrun lɔ kɛ klikli'n liɛ'n sa.

³¹ Bɛnzamɛn akpasua'n su sran'm be fiteli. Be yacili bé wun lɛ man Izraɛlfuɛ'm be cuɛnnin be ɔli klɔ wun mmua, kɛ be ´wanndi atin'm bé su ´kɔ'n, wuun be ´kun Izraɛlfuɛ mun kɛ laa liɛ'n nun'n sa. Kɛ e ijɔwa-a, b'a kun be nun sran ablasan fie'm be su atin ng'ɔ kɔ Betɛl ɔ nin ng'ɔ kɔ Gibea'n bé su lɔ.

³² Bɛnzamɛn akpasua'n su sran'm be waan: «Aa! Y'a kwla be ekun kɛ titi'n sa.» Izraɛlfuɛ'm be kusu be waan: «E `wanndi nan e `cuɛn be e wɔ atin'm bé su klɔ'n wun mmua.»

³³ Kpɛkuun Izraɛlfuɛ'm be kwlakwla be jasoli kan be jranjrannin lɛ'n be ko yiali Baal-Tamar lɔ nan be nga be bu sali'n, b'a fin Maare-Gibea b'a fite.

³⁴ Izraɛl alɛ kunfuɛ kpakpa akpi blu (10.000) be bali Gibea alɛ kunlɛ. Aa, alɛ'n jrannin. Bɛnzamɛn akpasua'n su sran'm be si-man kɛ lika'n ɔ wa yo kekle bé sa nun.

³⁵ Anannganman kwlali Bɛnzamɛnfuɛ mun mannin Izraɛlfuɛ mun. Le kun sɔ nun'n, Izraɛlfuɛ'm be kunnin Bɛnzamɛn akpasua'n su sran mun be nun sran akpi-akpi ablaɔn-nin-nnun sran ya (25.100) alɛ kunfuɛ kpakpa ngunmin.

³⁶ Bɛnzamɛn akpasua'n su sran'm be ´nian-an, b'a kwla be. Izraɛlfuɛ'm be lafili be nga be fiali Gibea wun lɔ'n bé su ti yɛ be wanndili Bɛnzamɛn akpasua'n su sran'm be nyrun nin-ɔn.

³⁷ Be nga be fiali'n, be wanndili ndɛndɛ be ko tɔli Gibea klɔ'n su, be trali klɔfuɛ mun, be kunnin be ngba ɔ nin tokofi.

³⁸ Izraɛlfuɛ'm be nin be nga be fiali'n bé nuan yiali sa kun su. Sa sɔ'n yɛlɛ kɛ be nga be fiali'n, be wɔ klɔ'n nun nan wɛnsrɛn ng'ɔ ´jaso'n ɔ `yo lɔuun.

³⁹ I ti kɛ Izraɛlfuɛ'm be klɔklɔli alɛ'n cɛ'n, kpɛkuun be kacili bé sin be wanndili. Ɔ man Bɛnzamɛn akpasua'n su sran'm be kunnin Izraɛlfuɛ wie mun. Be kunnin sran kɔe ablasan. Be waan: «Nga, y'a kwla be kɛ klikli nun'n sa!»

⁴⁰ Kɛ e ijɔwa-a, nzɔliɛ nga be kleli'n bɔ yɛlɛ sin wɛnsrɛn'n, ɔ su fin klɔ nun ´fu kɔ. Kɛ Bɛnzamɛn akpasua'n su sran'm be ´nian bé sin-ɔn, klɔ wunmuan'n yɛ ɔ su yra yɛ.

⁴¹ Yɛ Izraɛlfuɛ'm be kusu be blili bé nyin-ɔn, kpɛkuun Bɛnzamɛn akpasua'n su sran'm be yɛ b'a mian yɛ, be wun-man kɔwlɛ, afin be wun i jrɛin kɛ b'a mlin mlɔnmlɔn a wie.

⁴² Kɛ e ´ijɔwa-a, b'a bli bé nyin b'a fa aawlɛ flɛnnɛn atin'n be su wanndi. Izraɛlfuɛ'm be su bé su. Be nga be fin klɔ'n nun lɔ'n kusu be bue kun be wa miannin bé su, ɔ man be kali gli nun nan b'a kun be mlɔnmlɔn.

⁴³ Kɛ be miannin be su sɔ'n, be suli bé su, b'a jran-man mlɔnmlɔn lele be fa juli Gibea ndɛnman Bɛnzamɛn akpasua'n su sran'm be nvle'n i wia afiliɛ lɔ. Kɛ ɔ ´yo sɔ'n, wuun be ´kun be.

⁴⁴ Bɛnzamɛn akpasua su sran'm be nun sran akpi-akpi blu-nin-mɔcuɛ (18.000) be tɔli. Be kwlaa sɔ'n be ti alɛ kunfuɛ kpakpa ngunmin.

⁴⁵ Be kpɛli bé wun ekun, be wanndi ɔli aawlɛ flɛnnɛn'n i wun lɔ Rimɔn yɛbuɛ'n wun lɔ, nan be nun akpi nnun (5.000) b'a tɔ atin'n su. Izraɛlfuɛ'm be suli bé su lele Gidɛɔm nan b'a kun be nun sran akpi nnyɔn (2.000).

⁴⁶ Bɛnzamɛn akpasua'n su sran'm be kwlaa nga be wuli le kun sɔ nun'n be ti sran akpi-akpi ablaɔn-nin-nnun (25.000). Be kwlaa sɔ'm be ti alɛ kunfuɛ kpakpa ngunmin.

⁴⁷ Sran ya nsiɛn be wanndi ɔli aawlɛ flɛnnɛn'n wun lɔ Rimɔn yɛbuɛ'n wun lɔ. Be trannin Rimɔn yɛbuɛ'n wun lɔ anglo nnan.

⁴⁸ Izraɛlfuɛ'm be sali be sin be bali Bɛnzamɛn akpasua'n su sran'm be klɔ'm be su nan b'a kun klɔfuɛ nin nnɛn'm be ngba, kpɛkuun be wɔli klɔ'm be kwlaa be nun.