Jɔlɛ Difuɛ Mun 2 - NYANMIƐN NDƐ'N 1998

Nyrɛnnɛn ng'ɔ wa tɔ Izraɛl nvle'n su bɔ Anannganman kannin'n

¹ Anannganman i anz'n fɛli i Gilgal lɛ ɔ ɔli Bɔkim. Ɔ seli Izraɛlfuɛ'm be kɛ: «N fali amun Ezipt lɔ m bali, mɛn nga n kan kleli amún nannan mun kɛ n ´fa man amun'n nun. Yɛ n seli kɛ aenguɛ nga e nin amun trali'n, ɔ ´tran lɛ titi .

² Amun kusu n seli amun kɛ nán amun nin nvle nga i nun sran mun be tra aenguɛ. Amun `bubu be amuɛn sɔwlɛ mun. N seli amun sɔ, sanngɛ amu'an ti-man min aniɛn'n. ?Ɔ yoli sɛ ti yɛ amun yoli sɔ-ɔ ?

³ I sɔ'n ti, n ´kan kle amun kɛ, n su fuan-man nvle sɔ'n nun sran mun amun nyrun. Be nin amun ´tran. Be amuɛn'm be wa yo kɛ aya yɛ b'a suɛ i amun bo sa.»

⁴ Anannganman i anz'n kannin ndɛ sɔ mun kleli Izraɛlfuɛ'm be kwlakwla. Kɛ be tili'n, yɛ woo be tɔli sunlɛ su-ɔ.

⁵ Be tɔnnin klɔ sɔ'n i dunman kɛ Bɔkim bɔ i bo yɛlɛ sunfuɛ mun. Be yili tɛ mannin Anannganman.

Zozie i wulɛ

⁶ Kɛ Zozie mannin Izraɛlfuɛ'm be atin'n, be ɔli be tranwlɛ fanunfanun'm be nun. Kɛ mɛn'n i falɛ'n ɔ yoli kɛ nga sa.

⁷ Zozie ɔ nin kpɛnngbɛn nga be wunnin sa dandan nga Anannganman yoli mannin Izraɛlfuɛ mun bé nyin su'n, be suli Anannganman.

⁸ Nɛn i wa Zozie b'ɔ ti Anannganman i sufuɛ'n ɔ wa wuli. Kɛ ɔ ´wu'n, wuun ɔ lɛ afuɛ ya afuɛ blu.

⁹ Be sieli i Timnat-Erɛs lɔ lika nga be mɛnnin i'n nun Efraim oka b'ɔ o Gaas oka i nglo lɔ lika'n nun.

¹⁰ Zozie i wiengu'm be wa wieli wu. Be sinfuɛ nga be wa jasoli su'n be si-man Anannganman. Be si-man sa ng'ɔ yoli mannin Izraɛl'n.

Izraɛlfuɛ'm be nyin kekle yolɛ ɔ nin be nyrɛnnɛn wunlɛ

¹¹ Izraɛlfuɛ'm be yoli sa nga Anannganman klo-mɛn i mlɔnmlɔn'n: be sɔli amuɛn nga be flɛ be kɛ Baal mun .

¹² Anannganman b'ɔ ti bé nannan'm be Nyanmiɛn'n, bɔ i yɛ ɔ fali be Ezipt lɔ bali'n, be yacili i lɛ be ɔli nvle nga be o bé wun lɛ'n nun, be ko tuli be amuɛn mun, be kotoli bé bo. Ɔ man Anannganman fali ya.

¹³ Be yacili Anannganman lɛ be sɔli amuɛn nga be flɛ be kɛ Baal nin Astarte mun.

¹⁴ Yɛ Anannganman ɔ wa fali ya dan kpa Izraɛlfuɛ'm bé wun nan ɔ'a man ninnge fɛnfuɛ'm be atin kɛ be `fɛn bé bo ninnge mun. Ɔ yoli man b'a kwla jran-man be kpɔfuɛ nga be mantan be lɛ'n be nyrun kun.

¹⁵ Alɛ kwlaa nga be kunnin'n, Anannganman ɔ'a jran-man bé sin kɛ Anannganman bɔbɔ dun mmua kan kleli be'n sa. Ɔ'a jran-man be sin kɛ ɔ tali nda kleli be'n sa. I sɔ'n ti awlaboɛ dan kpa tɔli be su .

¹⁶ Anannganman wa mannin be jɔlɛ difuɛ mun. Be yɛ be wa deli be nvle nga be fɛn be bo ninnge'n bé sa nun-ɔn.

¹⁷ Sanngɛ kɛ be jɔlɛ difuɛ sɔ'm be kan ndɛ kle be'n, nán tilɛ yɛ be ko ti i kɛ ɔ fata'n sa-a. Be sin ko tu amuɛn nga, be sin ko tu amuɛn nga, be koto bé bo. Be kaci bé sin sili atin nga bé nannan'm be fali su'n. Bé nannan'm be nantili Anannganman i mmla'm bé su, sanngɛ b'a nian-man bé si'm be liɛ'n su.

¹⁸ Kɛ Anannganman man be jɔlɛ difuɛ kun ɔ ukɛ i, blɛ nga jɔlɛ difuɛ i nyin tɛ o su'n, Anannganman de be be kpɔfuɛ'm be sa nun. Afin kɛ be ´kle be yalɛ bɔ be ´mianmian be'n, be sun flɛ Anannganman. I kusu ɔ si be aunnvuɛ,

¹⁹ sanngɛ kɛ jɔlɛ difuɛ'n ko wu cɛ'n, kpɛkuun be nantilɛ nga be wa nanti'n i tɛ tra bé nannan'm be liɛ'n bɔbɔ. Be fa bé wun fa cici amuɛn mun, be sɔ be, yɛ be koto bé bo. Bé nannan'm bé nyin kekle'n i su cɛ yɛ be nian-an.

²⁰ Anannganman wa fali ya Izraɛlfuɛ'm bé wun nan ɔ'a se kɛ: «Kɛ bɔ sran nga'm be saci min aenguɛ nga e nin bé nannan mun e trali'n, bɔ b'a tie-man min aniɛn'n,

²¹ i ti n kpa'n, n fuan-man nvle nga Zozie ´wu'n ɔ yacili be lɛ'n be wie fi.

²² N ´fa nvle sɔ mun n fa sa Izraɛlfuɛ mun n ´nian. Sɛ be ´fa Anannganman i atin kɛ be nannan'm be fali'n sa o.»

²³ Yɛ Anannganman yacili nvle sɔ mun bɔ ɔ'a kplin-man su kɛ Izraɛl kwla be Zozie nyin su'n be lɛ, ɔ'a bo-man wɛ kɛ ɔ ´kan bé bo.