Jɔlɛ Difuɛ Mun 19 - NYANMIƐN NDƐ'N 1998

Tete sa bɔ Bɛnzamɛn i akpasua su sran nga be o Gibea lɔ be yoli'n i ndɛ

¹ I blɛ sɔ nun'n, wuun Izraɛl mɛn'n nian nyan-man famiɛn, Levi i akpasua'n su sran kun b'ɔ tran Efraim oka-oka'n i tiwa lɔ'n, ɔ nin bla wie be boli soman. Bla'n fin Zida nvle nun klɔ nga be flɛ i kɛ Bɛtleɛm'n su.

² Le kun ɔ nin i soman'n be kannin ndɛ, nan ɔ'a wanndi a ɔ i si i awlo Bɛtleɛm lɔ. Ɔ ko trannin lɔ anglo nnan.

³ I sin, bla'n i wun'n wa suli i su i sia'm be klɔ lɔ, ɔ kpɛtɛli i yɛ ɔ srɛli i kɛ ɔ bla awlo. Kɛ bian'n ɔ ´kɔ'n, ɔ fɛli i sufuɛ'n nin i aflunmun nnyɔn yɛ be ɔli-ɔ. Bla'n fɛli i ko kleli i si. Kɛ i si wunnin i'n, ɔ sɔli i nun nin aklunjuɛ.

⁴ I sia trɛli i ase lele cɛn nsan. Ɔ mannin be like be dili. Ɔ mannin be nzan be nɔnnin, yɛ be wlu be lali-ɔ.

⁵ I le nnan su'n, be jasoli nglɛmun ndɛ. Levi i akpasua'n su sran'n siesieli i wun kɛ ɔ su kɔ, kpɛkuun bla'n i si'n seli i kɛ: «Gua ase, fa aliɛ kan tra wɔ anwlɛn nan amu'an wɔ.»

⁶ Yɛ be nnyɔn'n be trannin ase-ɔ. Be dili like, be nɔnnin nzan likawlɛ. Bla'n i si'n seli bian'n kɛ: «Yaci, gua ɔ wla ase, e la ekun.»

⁷ Bian'n jasoli kɛ ɔ ´kɔ, sanngɛ i sia'n srɛli i lele nan ɔ'a la lɛ ekun.

⁸ I le nnun su'n, ɔ jasoli nglɛmun ndɛ kɛ ɔ ´kɔ. Bla'n i si'n waan: «Fa like kan tra wɔ anwlɛn nan amun minndɛ. Nnɔsua'n, wuun amu'an wɔ.» Yɛ be nnyɔn'n be dili like likawlɛ-ɔ.

⁹ Bian'n jasoli kɛ ɔ nin i soman'n nin i gbanflɛn'n be ´kɔ, yɛ i sia'n waan: «Lika'n yɛ ɔ'a san yɛ, e la, gua ɔ wla ase. Ainman nglɛmun amun ko wɔ amun tranwlɛ.»

¹⁰ Bian'n waan: «Ndɛ liɛ'n n la-man kun.» Yɛ ɔ jaso ɔli-ɔ. Ɔ ko juli Zɛbis, Zerizalɛm yɛ be flɛ i sɔ-ɔ, ɔ nin i aflunmun nnyɔn be nin bé su trɔ'n, nin i soman'n yɛ be kɔ-ɔ.

¹¹ Kɛ be ´ju Zɛbis wun lɔ'n, wuun aliɛ'n ɔ'a san. I gbanflɛn'n seli i si kɛ: «E wɔ Zɛbisfuɛ'm be klɔ ng'ɔ o yɛ'n su lɔ e `ko la lɛ.»

¹² I si'n seli i kɛ: «Nán e wlu klɔ nga nun. I su sran'm be ti-man Izraɛlfuɛ. Man e wɔ Gibea lɔ.»

¹³ Ɔ seli i gbanflɛn'n ekun kɛ: «E wɔ Gibea annzɛ Rama e ko la klɔ nnyɔn sɔ'm be nun kun su.»

¹⁴ Yɛ be ɔli-ɔ. Kɛ be ´ju Bɛnzamɛn akpasua'n su klɔ nga be flɛ i kɛ Gibea'n su'n, wuun wia'n su tɔ. Be kpacili nan b'a ko wlu lɔ.

¹⁵ Be ko kunndɛli sikewlɛ. Levi akpasua'n su sran'n ko trannin gua'n su lelele, b'a nyan-man sran fi b'ɔ ´sike be-ɔ.

¹⁶ Be o lɛ kpɛkuun bian oke kun fin fie su su ba. Bian sɔ'n ti Efraim oka-oka nun lɔfuɛ, ɔ tran Gibea lɛ. Lɛfuɛ'm be kusu be ti Bɛnzamɛn akpasua su sran.

¹⁷ Ɔ ´nian-an, aofuɛ yɛ ɔ o gua'n su yɛ, yɛ ɔ usɛli i kɛ: «?A fin ye sɛ, yɛ a su ko nin?»

¹⁸ Levifuɛ'n tɛli i su kɛ: «N ti Efraim oka-oka'n i tiwa lɔfuɛ. N ɔli Zida klɔ nga be flɛ i kɛ Bɛtleɛm su lɔ, n su sin n kɔ min mɛn'n nun. N nyan-man sran nan ɔ'a sike min.

¹⁹ Sanngɛ ijre nga nnɛn'm be ko di'n wo e sa nun, yɛ kusu min nin min yi nin min gbanflɛn'n e lɛ kpaun nga e ko di'n nin nzan nga e ´ko nɔn'n. Like fi mian-man ye.»

²⁰ Bian kpɛnngbɛn'n seli i kɛ: «Man e ko sie like, nan m bɔbɔ m man amun like diwa. Ɔ nin i fata-man kɛ amun la gua'n su.»

²¹ Yɛ ɔ nin i be ɔli awlo-ɔ. Ɔ mannin i aflunmun'm be ijre. Be bɔbɔ be wunnzinnin bé ja wun. I sin be dili like be nɔnnin nzan.

²² Be o lɛ be bo nzɛmunndɛ kpɛkuun klɔ nun sran finfinfuɛ'm b'a bo b'a sin b'a yia sua'n. Kɛ be ´ti'n, be su bobo anuan'n. Be seli bian kpɛnngbɛn bɔ i liɛ yɛlɛ sua'n kɛ: «Bian nga a sikeli i'n, fɛ i fite wa man e nin i e la.»

²³ Bian'n fiteli gua su lɔ nan ɔ'a se be kɛ: «Aniaan mun, n ´srɛ amun kpa ti-ɔ, nán amun yo sa tɛ nga. Kɛ bɔ bian'n ɔ'a wlu min awlo'n ti, nán amun bo tete nga.

²⁴ Mín wa bla b'ɔ nian si-man yasua le'n, ɔ nin bian'n i soman'n be o wa. Man n fa be m blɛ amun nan amun nin be la, amun nin be yo kwlaa nga amun klo'n, nan sanngɛ nán amun fa bian'n be bo tete nga .»

²⁵ Kɛ bɔ be waan be kplin-man su'n yɛ Levi akpasua su sran'n fɛli i soman'n fiteli-ɔ. Be nin i be lali kɔnguɛ wunmuan'n nun, bla'n ɔ'a lo-man wunmiɛn kaan sa.

²⁶ Aliɛ njɛnniɛn su'n, bla'n ɔ wa tɔli bian kpɛnngbɛn ng'ɔ sikeli be'n i sua'n i anuan'n nun. Ɔ kali lɛ lele nglɛmun.

²⁷ I wun tinngeli nglɛmun, kɛ ɔ ´tike anuan'n nan ɔ ´fite kɔ i nyrun'n, ɔ ´nian-an i soman'n yɛ ɔ la yɛ i sa'n gua anuan'n nun sɛsɛsɛ.

²⁸ Ɔ seli i kɛ: «Jaso man e wɔ.» Bliin! Yɛ bian'n fɛli i fa sieli i aflunmun'n kun su yɛ ɔ ɔli i klɔ-ɔ.

²⁹ Kɛ ɔ juli lɔ'n, ɔ wluli i sua lɔ, ɔ ko fali laliɛ, ɔ trɛli i soman'n i fuɛn'n, ɔ kpɛkpɛli i nun blu-nin-nnyɔn. Ɔ fɛli i nnɛn'n cɛcɛli Izraɛl akpasua blu-nin-nnyɔn mun bé ti nun ti nun be mɛn wunmuan'n nun.

³⁰ Be kwlaa nga be wunnin i'n be waan: «Kɛ ɔ fin cɛn bɔ Izraɛlfuɛ'm be fin Ezipt be bali'n lele b'ɔ ´fa ju ndɛ'n, sa kɛ nga sa nian ju-man le. Amun man e bu sa sɔ'n i akunndan, man e wun é wun nan e ti e wun aniɛn.»