Jɔlɛ Difuɛ Mun 18 - NYANMIƐN NDƐ'N 1998

Dan akpasua'n su sran'm be lika'n i kacilɛ ndɛ

¹ I blɛ sɔ nun'n, wuun famiɛn nun-man Izraɛl mɛn'n nun mlɔnmlɔn. I blɛ kunngba sɔ nun'n, wuun Dan akpasua'n su sran'm be su kunndɛ lika be ´tran nun, wuun be nian nyan-man be lika liɛ kɛ akpasua kun nga'm bé sa.

² Yɛ Dan akpasua'n su sran'm be sunmannin be akpasua'n su alɛ kunfuɛ kpakpa nnun kɛ be fɛ i Zɔrea nin Ɛstaɔl lɛ be ko kpla mɛn'n be nian. Be seli be kɛ: «Amun `ko kpla mɛn'n be nian.»

³ Kɛ sran sɔ'm be bali Efraim oka-oka lika'n nun lɛ'n bɔ be juli Mika awlo wun lɛ'n, be tili Levi akpasua'n su gbanflɛn'n i nɛn'n, yɛ be ko wluli lɛ-ɔ. Be usɛli i kɛ: «?Wan yɛ ɔ fa wɔ bali wa-a? ?Nguɛ like yɛ a yo i wa-a? ?Nguɛ like yɛ a nyɛn i wa-a?»

⁴ Ɔ tɛli bé su kɛ: «Like nga Mika yo man min'n yɛ, n ti i amuɛn'm be nyrun tranfuɛ. Ɔ tannin min kalɛ.»

⁵ Be seli i kɛ: «Yaci, usa Nyanmiɛn man e nian, sɛ e ´nanti ye o.»

⁶ Amuɛn'm be nyrun tranfuɛ'n tɛli bé su kɛ: «Amun ajalɛ'n ti Anannganman klun su. Amun ´nanti klanman.»

⁷ Yɛ sran nnun'm be ɔli-ɔ. Be juli Lais. Bé wunnin kɛ lɛfuɛ'm be ti be tilɛ lɛ kɛ Sidɔnfuɛ'm bé sa. Be klun ti-man be. Be o lɛ fɔuun, be nin be siefuɛ'm be lɛ-man ndɛ, kusu be o Sidɔnfuɛ'm bé wun mmua, be ti be tiaun tilɛ.

⁸ Yɛ be sali bé sin be niaan'm bé wun lɔ Zɔrea nin Ɛstaɔl lɔ-ɔ. Kɛ be usali be jasin'n,

⁹ be tɛli su kɛ: «E ko wunnin lika'n, nanwlɛ ɔ ti klanman. Nan i sɔ'n ti nán amun tran lɛ bliin sɔ. Amun `jaso man e nin be e ko kun. Nán amun yo ainkuɛnfuɛ lika'n i ko falɛ'n nun sɔ.

¹⁰ Sɛ amun ju lɔ'n, amun wa wun kɛ be bu-man akunndan kɛ sran wie ɔ wa fa alɛ wla bé sin cɛn wie le. Lika'n ti tɛtrɛ. Like kwlaa nga sran kun kwla miɛn i wun'n, be nyɛn i lɔ. Nyanmiɛn kusu yili lika sɔ'n mannin amun.»

¹¹ Dan akpasua'n su sran ya nsiɛn be fɛli i Zɔrea nin Ɛstaɔl lɛ be ɔli, be alɛ ninnge'm be o bé sa nun.

¹² Be ko boli nanmue Kirzat-Zearim lɔ Zida nvle'n nun. I ti yɛ be tɔnnin Kirzat-Zearim i wia atɔliɛ lɛ lika'n i dunman kɛ: Dan nanmue nin-ɔn. Lele ndɛ'n be tɛ flɛ i sɔ.

¹³ Ke be tuli bé bo lɛ'n, be ɔli Efraim oka-oka'n nun lɔ, kpɛkuun be juli Mika i awlo i wun lɛ.

¹⁴ Kpɛkuun sran nnun nga be ɔli Lais mɛn'n i kpla nianlɛ'n, be seli be niaan'm be kɛ: «?Kɛlɛ amun si kɛ amuɛn kun, nin waka sran mun, ɔ nin amuɛn bɔ be kloli aaba guɛli i wun'n be o sua nga'm be nun? Siɛn'n like nga amun ´ko yo'n, amun `yo.»

¹⁵ Be wunngeli Mika i awlo'n i wun lɔ nan b'a wlu kan Levi akpasua'n su gbanflɛn'n tran lɛ'n. Be usɛli i kɛ: «?Ɔ wun lɔun?»

¹⁶ Kɛ ɔ ´yo sɔ'n, wuun Dan alɛ kunfuɛ ya nsiɛn'm be o anuan'n nun be alɛ ninnge'm be wo bé sa nun.

¹⁷ Yasua nnun nga be dun mmua ɔli mɛn i kplalɛ'n, be wluli sua'n nun lɔ nan b'a fa waka sran nga be kloli aaba guɛli i wun'n, nin amuɛn mun, nin amuɛn ninnge mun. Kɛ ɔ ´yo sɔ'n, wuun amuɛn'm be nyrun tranfuɛ'n nin alɛ kunfuɛ ya nsiɛn nga be alɛ ninnge'n wo bé sa nun'n be o anuan'n nun lɛ.

¹⁸ Kɛ be wluli Mika i awlo lɔ'n bɔ be fali waka sran'n nin amuɛn mun, amuɛn'm be nyrun tranfuɛ'n usali be kɛ: «?Nguɛ yɛ amun yo-ɔ?»

¹⁹ Be seli i kɛ: «Muan ɔ́ nuan'n su, nán kan ndɛ fi. ?Kɛ a ti sran kun i amuɛn'm be nyrun tranfuɛ'n ɔ nin kɛ a ´yo Izraɛl akpasua'm be nun kun su amuɛn'm be nyrun tranfuɛ'n, onin yɛ a klo i-ɔ? Bla e wɔ, ko yo e su kpɛn nin e amuɛn'm be nyrun tranfuɛ.»

²⁰ Kɛ amuɛn'm be nyrun tranfuɛ'n tili i sɔ'n, i klun jɔli, ɔ fali amuɛn mun nin waka sran mun, nan ɔ nin be ɔ'a ɔ.

²¹ Be fali atin'n, ba kanngan mun, nin nnɛn mun, ɔ nin trɔ'm be o be nyrun.

²² Kɛ be nin Mika i awlo'n be afiɛn tili nun kan'n, sran nga be mantan Mika lɛ'n be flɛflɛli bé wun, nan b'a su bé su.

²³ Kɛ be ´kpan su Dan akpasua'n su sran'm bé su'n, be kpɛli bé nyin be usali Mika kɛ: «?Nzu ti yɛ a kpan sɔ-ɔ?»

²⁴ Mika waan: «?Kɛ amun usa min kɛ nzu ti yɛ n kpan'n, n wun-mɛn i wlɛ. Min amuɛn'n bɔ n yoli be'n, amun fali be, kpɛkuun amun fali min amuɛn'm be nyrun tranfuɛ'n ekun. ?Yɛ nzu yɛ ɔ ka mín sa nun-ɔn?»

²⁵ Dan akpasua'n su sran'm be tɛli i su kɛ: «Nán e ti wɔ ngan lɛ kun! Sɛ ɔ'a yo-man sɔ-ɔ, sran wie'm be ´fa ya be ´ko tɔ amún su. Be ´kun wɔ nin wɔ awlofuɛ mun.»

²⁶ Kɛ Mika nian bɔ be lɛ wunmiɛn be trɛ i'n, i ti ɔ sɛli i sin ɔli i awlo. Dan i akpasua'n su sran'm be kusu be ɔli be kɔlɛ.

Dan i akpasua'n su sran'm be fali Lais klɔ'n yoli be liɛ

²⁷ Dan i akpasua'n su sran'm be fali Mika i amuɛn'm be nin i amuɛn nyrun tranfuɛ'n. Be ko fali alɛ'n wlali Laisfuɛ'm bé sin. Laa be ti be tilɛ fɔuun, be sunnzun-man kɛ be wa kun alɛ. Be kunnin be. Be wɔli klɔ'n nun.

²⁸ Sran fi ɔ'a uka-man be, afin be nin Sidɔnfuɛ'm be afiɛn wali. Be o Bɛt-Rɛɔb i kongo'n nun, kusu be nin nvle fi be ju kun-man alɛ.

²⁹ Dan akpasua'n su sran'm be kplannin klɔ'n i uflɛ, kpɛkuun be tɔnnin i dunman kɛ Dan. Be fa tɔnnin be nannan Dan b'ɔ ti Zakɔb i wa'n, sanngɛ laa klɔ sɔ'n i dunman yɛlɛ Lais.

³⁰ Dan akpasua'n su sran'm be takali waka sran'n. Zonatan b'ɔ ti Moiz i wa Gɛrsɔm i klun ba liɛ'n, ɔ nin i mma mun yɛ be yoli Dan akpasua'n su sran'm be amuɛn'm be nyrun tranfuɛ lele fa juli blɛ nga be trali Izraɛlfuɛ mun lomuɛn ɔli mɛn uflɛ nun nin-ɔn.

³¹ Kan be takali amuɛn nga Mika yoli'n, ɔ kali lɛ blɛ nga Nyanmiɛn sua'n wo Silo'n lɔ'n.