Jɔlɛ Difuɛ Mun 17 - NYANMIƐN NDƐ'N 1998

Mika i amuɛn sua'n i ndɛ

¹ Efraim oka-oka lika'n nun lɔ'n, sran kun o lɔ bɔ be flɛ i kɛ Mika.

² Ɔ seli i nin kɛ: «Ɔ jɛtɛ ufue mma akpi kun jɛtɛ ufue mma ya (1.100) nga be wuali'n bɔ a wuali su amuɛn m bɔbɔ min nyrun'n, sika sɔ'n yɛ. Min yɛ n fali-ɔ.» I nin tɛli i su kɛ: «Min wa, man Anannganman yo ɔ wun sa ye.»

³ Ɔ yili jɛtɛ ufue mma akpi kun'n nin ya'n mɛnnin i nin, yɛ i nin seli i kɛ: «Min wa, n waan n ´fa sika nga n wlɛ i Anannganman i sa nun ɔ dunman su. Fa man be fa yo waka sran nan be klo aaba guɛ i wun. I ti'n, de, n su fa man wɔ.»

⁴ Sanngɛ ɔ fali sika'n mannin i nin ekun, nan i nin ɔ'a fa nun jɛtɛ ufue mma ya nnyɔn. Ɔ fa mannin ajuin difuɛ'n nan ɔ'a fa yi sika sran nan ɔ'a klo aaba a guɛ i wun. Yɛ be fa sieli i Mika i sua lɔ-ɔ.

⁵ Mika sɔ'n, ɔ lɛ i bɔbɔ i amuɛn sua. Ɔ yili waka sran uflɛ ɔ nin awlo amuɛn wie mun. Yɛ ɔ fɛli i wa'm be nun kun sieli kɛ ɔ yo i amuɛn'm be nyrun tranfuɛ.

⁶ I blɛ sɔ nun'n, wuun famiɛn nun-man Izraɛl mɛn'n nun mlɔnmlɔn. Sran kun i klunklo like nga i waan ɔ ´yo'n yɛ ɔ yo-ɔ.

⁷ I blɛ kunngba sɔ nun'n, Levi akpasua'n su gbanflɛn kun b'ɔ tran Bɛtleɛm b'ɔ o Zida mɛn nun'n,

⁸ ɔ jasoli Bɛtleɛm lɔ kɛ ɔ ´ko kunndɛ lika uflɛ ´tran nun. Yɛ ɔ wa juli Efraim oka wun lɛ-ɔ. Ɔ juli Mika i awlo lɛ.

⁹ Mika usɛli i kɛ: «?A fin e sɛ?» I waan: «N ti Levifuɛ. N tran Bɛtleɛm, Zida nvle'n nun. N su wlan n ´kunndɛ tranwlɛ.»

¹⁰ Mika seli i kɛ: «Tran mín wun wa nan yo mín si ɔ nin min amuɛn'm be nyrun tranfuɛ. Afuɛ nuan kun'n, m ´man wɔ jɛtɛ ufue mma blu, ɔ nin aliɛ, ɔ nin tralɛ.»

¹¹ Levifuɛ'n kplinnin su kɛ ɔ ´tran Mika i awlo lɛ, yɛ bian sɔ'n ɔ nin i be trannin kɛ sran kun nin i wa sa.

¹² Mika fali gbanflɛn'n sieli i amuɛn'm be nyrun tranfuɛ.

¹³ Mika waan: «Kɛ m'an nyan Levifuɛ kun b'ɔ ti min amuɛn'm be nyrun tranfuɛ yɛ'n, siɛn liɛ'n, n si kɛ Anannganman ɔ wa man min muae.»