Jɔlɛ Difuɛ Mun 16 - NYANMIƐN NDƐ'N 1998

Samsɔn nin Gaza lɔ anuan mun

¹ Samsɔn ɔli Gaza lɔ, nan ɔ'a ko wun tekle bla kun. Yɛ ɔ wluli i sin-ɔn.

² Gazafuɛ'm be tili kɛ Samsɔn ɔ'a ba lɛ. Be bo sin yiɛli. Be ko bu sali klɔ'n i anuan nun. B'a keje-man bé wun. Be waan: «Kɛ wia'n ´tɛ muaan cɛ'n, e ´kun i.»

³ Samsɔn lali lɛ lele kɔnguɛ afiɛn. Yɛ ɔ jasoli kɔnguɛ afiɛn sɛsɛsɛ. Ɔ trali klɔ'n i anuan'n ɔ nin i takawlɛ'n. Ɔ tuli bé bo, ɔ fali be ɔ nin waka nga be fa jɛ i anuan'n sin'n boli i wati su ɔli oka ng'ɔ o Ebrɔn ndɛnman'n su lɔ, nan ɔ'a ko sie be lɔ.

Delila i Samsɔn lakalɛ

⁴ I sin Samsɔn wa kloli bla kun b'ɔ tran Sɔrɛk kongo'n nun lɔ. Be flɛ i kɛ Delila.

⁵ Filistifuɛ'm be kpɛnngbɛn'm be wa toli Delila nan b'a se i kɛ: «Klɔklɔ i nan ɔ kle wɔ kan i wunmiɛn'n fin'n kɛ ɔ ´yo nan y'a kwlɛ i'n ti. I liɛ'n, e ´ci i kpɛkuun e ´kwlɛ i. Sɛ a yo sɔ'n, e ti nun ti nun e ´man wɔ jɛtɛ ufue akpi kun ya kun (1.100).»

⁶ Yɛ Delila seli Samsɔn kɛ: «Yaci, kle min kan ɔ wunmiɛn dan'n fin'n. Kle min like nga be kwla fa ci wɔ nan b'a nyan wɔ'n.»

⁷ Samsɔn seli i kɛ: «Sɛ be fa nyanman uflɛ-uflɛ nso nga be nian wu-man kee'n be fa ci min'n, min wunmiɛn dan'n ´wie. N ´kaci kɛ sran kun nga'm be sa.»

⁸ Yɛ Filisti kpɛnngbɛn'm be fali nyanman uflɛ-uflɛ nso be fa blɛli Delila-a, nan ɔ'a fa ci i.

⁹ Ɔ kpan seli i kɛ: «Samsɔn, Filistifuɛ'm be yɛ be ´ba lɛ-ɔ!» Kɛ ɔ ´yo sɔ'n, wuun sran wie'm b'a bu b'a sa i sua ba kun nun. Samsɔn kpɛkpɛli nyanman'n nun kɛ nyanman wie yɛ b'a fa sie i sin'n su sa. B'a wun-man kan i wunmiɛn'n fin'n.

¹⁰ Delila seli Samsɔn kɛ: «A yoli min finfin. A kpɛli min gblɛ! Ndɛ liɛ'n kle min like nga be kwla fa ci wɔ'n.»

¹¹ Yɛ ɔ seli i kɛ: «Sɛ be fa nyanman uflɛ-uflɛ nga be nian fa yo-man like fi'n be ci min'n, min wunmiɛn dan'n ´wie yɛ n ´kaci kɛ sran kun nga'm be sa.»

¹² Yɛ Delila fali nyanman uflɛ uflɛ fa cili i-ɔ. Kɛ ɔ ´yo sɔ'n, wuun sran wie'm b'a fiɛ i sua ba kun nun lɔ. Yɛ ɔ kpan seli i kɛ: «Samsɔn, Filistifuɛ'm be yɛ be ´ba lɛ-ɔ!» Samsɔn kpɛkpɛli nyanman'n nun kɛ jese nyanman kan wie sa.

¹³ Delila seli Samsɔn kɛ: «A yoli min finfin, a tɛ kpɛ min gblɛ lele ndɛ. Kle min like nga n fa ci wɔ'n.» Yɛ ɔ seli i kɛ: «Sɛ a kpaci min ti nun nso'n, sɛ a fa cici nzalɛ'n su'n, min wunmiɛn dan'n ´wie yɛ n ´kaci kɛ sran kun nga'm be sa.»

¹⁴ Delila man Samsɔn lafili, ɔ kpacili i ti nun nso nan ɔ'a fa cici nzalɛ'n. Yɛ ɔ seli i kɛ: «Samsɔn, Filistifuɛ'm be yɛ be ´ba lɛ-ɔ!» Yɛ ɔ tinngeli-ɔ, ɔ tuli nzalɛ'n yɛ ɔ kpɛli tannin b'ɔ o su'n nun.

¹⁵ Delila seli i kɛ: «Ɔ waan a klo min, sanngɛ min ndɛ lo-man wɔ. Min finfin yolɛ i kpɛ nsan yɛlɛ nga. A nian kle-man min kan ɔ wunmiɛn dan'n fin'n.»

¹⁶ Kɛ ɔ jin Samsɔn yalɛ klelɛ'n su cɔcɔcɔ sa. Kɛ bɔ cɛn kwlaa ɔ klɔklɔ i'n, ɔ flannin i siɛn'n. I waan sɛ ɔ ´wu-ɔ, man ɔ wu.

¹⁷ Yɛ ɔ tuli i klun kleli i-ɔ. Ɔ seli i kɛ: «Kɛ n fin min nin klun m ´ba'n, n ti Anannganman i liɛ, i ti like nga be fa yi tre'n wie nian kan-man mín ti'n le. Sɛ be yi mín ti'n, min wunmiɛn dan'n ´jaso min nun yɛ n ´kaci kɛ sran kun nga'm be sa.»

¹⁸ Delila wunnin kɛ ɔ'a kɛn i klun ndɛ ɔ'a kle i, yɛ ɔ man be ko flɛli Filisti kpɛnngbɛn mun-ɔn. Ɔ seli be kɛ: «Amun `bla! Ndɛ liɛ'n ɔ'a kɛn i klun ndɛ'n ɔ'a kle min.» Filisti kpɛnngbɛn'm be bali. Kɛ be ´ba sɔ'n, be sika'n wo bé sa nun.

¹⁹ Delila man Samsɔn lafili i ja su. Delila flɛli sran kun nan ɔ'a yi i ti bɔ be wɔli i nso'n. Delila ´kɛn i-ɔ, fɛklɛɛ! I fanngan'n ɔ'a wie i nun.

²⁰ Yɛ ɔ kpannin-ɔn: «Samsɔn, Filistifuɛ'm be yɛ be ba lɛ-ɔ!» Samsɔn tinngeli. Ɔ buli i kɛ ɔ wa kwla kpinndin i wun kɛ titi'n sa, afin ɔ si-man kɛ Anannganman ɔ'a jaso i sin.

²¹ Filistifuɛ'm be trɛli i, be boboli i nyinma nnyɔn'n, be fɛ i be ɔli Gaza. Be cili i nin aaba jrɔkɔ nnyɔn, yɛ be miɛnnin i kɛ ɔ kpɛ be bisua sua lɔ mannzin ng'ɔ si ble'n i wun.

²² Kɛ ɔ ´yo sɔ'n, wuun Samsɔn i timuɛn b'ɔ be yili'n ɔ su fu.

Samsɔn i sa kasiɛn ng'ɔ yoli'n ɔ nin i wie'n

²³ Le kun Filisti kpɛnngbɛn'm be yiali kɛ be ´yi tɛ be man be amuɛn bɔ be flɛ i Dagɔn'n, nan be ´di Samsɔn i tralɛ'n i ti cɛn. Be waan: «Ye amuɛn'n yili Samsɔn b'ɔ ti e kpɔfuɛ'n wlali e sa nun.»

²⁴ Kɛ sran'm be wunnin Samsɔn'n, be manmannin be amuɛn'n, be seli kɛ: «Ye amuɛn'n yili Samsɔn b'ɔ ti e kpɔfuɛ'n mannin e. I yɛ ɔ kle e mɛn'n i yalɛ nin-ɔn, i yɛ man e wu ngboko nin-ɔn.»

²⁵ Kɛ be klun jɔli dan'n ti, be seli kɛ: «Amun `fa Samsɔn bla nan ɔ wa kan ngowa kan kle ye.» Be ko fali Samsɔn bisua lɔ bali. Ɔ wa yili srilɛ kleli be. Yɛ be sieli i sua'n i kuatrɛn nnyɔn'm be afiɛn-ɔn.

²⁶ Samsɔn seli gbanflɛn ng'ɔ trɛ i sa'n kɛ: «Fa min man n ko kan sua'n i kuatrɛn'n nan n kisa su.»

²⁷ Kɛ ɔ ´yo sɔ'n, wuun sran'm b'a yia sua sɔ'n nun kaka kpa. Filisti kpɛnngbɛn'm be kwlaa be o lɛ. Kan be fa aunngban lɛ'n, sran kɔe akpi nsan (3.000) be o lɛ be ´nian Samsɔn, wuun be ´fɛ i yiyi bé nyin su.

²⁸ Samsɔn srɛli Anannganman seli kɛ: «Min Min, Anannganman, n ´srɛ wɔ. Man ɔ́ wla kpɛn mín su. Man min fanngan ndɛ ekun nan man n tu min klunngbɔ Filistifuɛ'm bé su, min nyinma nnyɔn bɔ be boli be'n ti.»

²⁹ Samsɔn fɛli i sa fuɛli i sua'n i kuatrɛn nnyɔn'm bé wun. Yɛ ɔ kisali bé su-ɔ. Kun wo i sa fama su, yɛ kun wo i sa bɛ su.

³⁰ I waan: «Man e nin Filistifuɛ mun e wu.» Ɔ fɛli i wunmiɛn'n kwlakwla fa suli sua'n i kuatrɛn'n bo, kpɛkuun kpundungblun! Sua'n tɔli Filisti kpɛnngbɛn mun ɔ nin sran'm be kwlaa nga be o lɛ'n bé su. Be nga Samsɔn kunnin be i wie cɛn nun'n, be sɔnnin tra be ng'ɔ kunnin be blɛ bɔ i nyin o su'n .

³¹ I niaan mun nin i si i awlofuɛ'm be bali nan b'a fɛ i ba ɔ, nan b'a ko sie i Zɔrea nin Ɛstaɔl be afiɛn lɛ, i si Manɔak i asieliɛ nun. Samsɔn sieli Izraɛlfuɛ mun afuɛ ablaɔn.