Jɔlɛ Difuɛ Mun 15 - NYANMIƐN NDƐ'N 1998

Samsɔn i Filistifuɛ'm be fie'm be nun wɔlɛ

¹ Kɛ ɔ cɛli kan'n, ble'n i kpɛlɛ blɛ nun'n, Samsɔn ɔli i yi i wun wunlɛ. Ɔ ´kɔ'n, boli bɔ b'a kpɛ cro'n kun wo i sa nun. I waan ɔ ´wlu i yi sin i sua ba nun lɔ sanngɛ i sia yasua'n ɔ'a kplin-man su.

² Ɔ seli i kɛ: «Ɔ yo min kɛ a klo-mɛn i, i ti m'an fa man ɔ janvuɛ'n. I sinma bla'n i klanman trɛ i, fɛ i fa sie i osu.»

³ Samsɔn seli be kɛ: «Andɛ liɛ'n, sɛ n yo Filistifuɛ'm bé sa ya'n min ndɛ yo fɛ.»

⁴ Yɛ Samsɔn ɔli nan ɔ'a ko tra nsoso ya nsan. Ɔ fali nsoso'm be lua'n wɔli su nan ɔ'a cici be nnyɔn-nnyɔn. Yɛ ɔ fali tɛ mun sieli nsoso'm be afiɛn kan be lua'n wɔ su lɛ'n.

⁵ Ɔ sɔli tɛ'm be nuan, yɛ ɔ yacili nsoso'm be nun Filistifuɛ'm be ble fie'm be nun. Ɔ man Samsɔn wɔli be ble sɔlɛ bɔ be tiannin be nuan'n ɔ nin ble nga be nian kpɛ-man'n nun. Ɔliɛ olivie fie'm be kwlakwla, ɔ wɔli be nun ukali su.

⁶ Filistifuɛ'm be ´usa-a, be waan: «Samsɔn b'ɔ ti bian b'ɔ fin Timna i sia nin-ɔn. I waan ɔ'a fɛ i yi ɔ'a man i janvuɛ'n, i ti yɛ ɔ yoli i sɔ-ɔ.» Yɛ Filistifuɛ'm be ɔli nan b'a ko trɔ bla'n nin i si'n bé wun sin nan b'a yra be.

⁷ Samsɔn seli be kɛ: «I sɔ nga amun yoli i lɛ'n ti, san n ´tu min klunngbɔ amún su ka nan min anwlɛn'n ɔ'a tɔ nun.»

⁸ Ɔ boli be bolɛ kpa! Nanwlɛ, kɛ i sa ko ti be'n yɛ ɔ tili be-ɔ. Kɛ ɔ yoli sɔ'n, yɛ ɔ ɔli ko trannin Etam yɛbuɛ buɛ'n nun lɔ-ɔ.

Samsɔn ɔ nin aflunmun aoje'n

⁹ Filistifuɛ'm be ɔli ko boli be nanmue Zida lɔ. Be ko fali alɛ'n wlali Lesi sin.

¹⁰ Zida akpasua'n su sran'm be usali be kɛ: «?Ɔ yoli sɛ ti yɛ amu'an fa alɛ'n b'a wla e sin-ɔn?» Be waan: «E bali Samsɔn cilɛ. Sa ng'ɔ yoli ye'n, e ´yo i wie e ´sie i osu.»

¹¹ Yɛ Zida akpasua'n su sran akpi nsan (3.000) be ɔli Etam yɛbuɛ buɛ'n nun lɔ-ɔ. Be usali Samsɔn kɛ: «?A si-man kɛ Filistifuɛ'm be kwla ye? ?Ɔ yo sɛ ti yɛ a yoli e sɔ-ɔ?» Ɔ tɛli bé su kɛ: «Sa nga be yoli min'n, yɛ n kusu n fa yoli be wie-ɔ.»

¹² Yɛ be seli i kɛ: «E bali kɛ e wa ci wɔ nan e ´fa wɔ fa wla Filistifuɛ'm be sa nun.» Yɛ ɔ seli be kɛ: «Amun `ta min nda kɛ amun bɔbɔ amun su kun-man min.»

¹³ Be tɛli i su kɛ: «E kun-man wɔ. E liɛ nga e si i'n yɛlɛ ɔ cilɛ nin wɔ bé sa nun fa wlalɛ. Y'a se-man kɛ e ´kun wɔ.» Yɛ be cili i nin nyanman uflɛ-uflɛ nnyɔn-ɔn, nan b'a fɛ i yɛbuɛ buɛ nun b'a fite.

¹⁴ Kɛ ɔ juli Lesi lɛ'n, Filistifuɛ'm be bali i atin kpalɛ. Be ´ba'n, wuun be ´kpan aklunjuɛ kpanlɛ. Yɛ Anannganman i Wawɛ'n jrali i su-ɔ. Kpɛkuun nyanman ng'ɔ o i sa'n yoli kɛ lɛn nyanman bɔ sin ɔ'a kɛn i'n sa. Be ´nian-an, ɔ'a fin i sa ɔ'a gua.

¹⁵ Yɛ ɔ wunnin aflunmun aoje uflɛ-uflɛ kun-ɔn, ɔ toli i sa'n fali, nan ɔ'a fa kun sran akpi.

¹⁶ Kpɛkuun i waan: «Aflunmun aoje kun kwle kun, kwle nnyɔn. Aflunmun aoje kun'n yɛ m'an fa kun sran akpi yɛ.»

¹⁷ Kɛ ɔ wieli ijɔ'n, ɔ toli aflunmun aoje'n yili i blo. I sɔ'n ti yɛ be tɔnnin lika'n i dunman kɛ aoje kpɔlɛ nin-ɔn.

¹⁸ Nzue we wie b'ɔ wa kunnin i'n, be flɛ-mɛn nzue we. Yɛ ɔ kpan flɛli Anannganman-an, ɔ seli kɛ: «Anannganman, wɔ yɛ a mannin min bɔ n ti ɔ sufuɛ'n min kwlalɛ dan nga-a. ?Yɛ nzue we ti n ´wu n ´tɔ Filistifuɛ bɔ be wla-man klɛn'n bé sa nun?»

¹⁹ Yɛ Nyanmiɛn'n kpacili Lesi lɛ yɛbuɛ'n i nun-ɔn, kpɛkuun nzue fin yɛbuɛ buɛ nun fiteli. Yɛ Samsɔn nɔnnin nzue sɔ'n wie nan ɔ'a nyan fanngan ekun. I ti yɛ be tɔnnin nzue ti sɔ i dunman kɛ Sran Ng'ɔ Kpan Flɛ Sran'n i Nzue Ti nin-ɔn. Nzue ti sɔ'n tɛ o lɛ lele ndɛ.

²⁰ Filistifuɛ'm be blɛ su Samsɔn sieli Izraɛlfuɛ mun afuɛ ablaɔn.