Jɔlɛ Difuɛ Mun 13 - NYANMIƐN NDƐ'N 1998

Samsɔn

¹ Izraɛlfuɛ'm be yoli like nga Anannganman klo-mɛn i ekun. Yɛ Anannganman fali be wlɛli i Filistifuɛ'm be sa nun afuɛ ablanan.

² I blɛ sɔ nun'n, bian wie be flɛ i kɛ Manɔak, ɔ fin Dan i akpasua'n su ɔ tran Zɔrea. I yi'n i klun ti kpan. Ɔ wu-man ba.

³ Anannganman i anz ɔ fiteli bla sɔ'n i nyrun, nan ɔ'a se i kɛ: «Wɔ yɛ ɔ klun ti kpan yɛ, a lɛ-man ba, sanngɛ a wa wunnzɛ yɛ a wa wu ba yasua kun.

⁴ I sɔ'n ti, nian ɔ́ wun su kpa. Nán nɔn nzan annzɛ nzan kekle fi, nán like fiɛn wie fi kan ɔ́ nuan.

⁵ A wa wunnzɛ yɛ a wa wu ba yasua kun. Ba nga a wa wu i lɛ'n, nán man like bɔ be fa yi tre'n kɛn i ti'n le, afin ba sɔ'n ɔ ´yo Nyanmiɛn liɛ mlɔnmlɔn. I yɛ ɔ wa bo Izraɛl nvle i delɛ'n bo Filistifuɛ'm bé sa nun-ɔn.»

⁶ Bla'n ɔli ko kan kleli i wun'n kɛ: «Nyanmiɛn i sran wie wa toli min, sɛ Nyanmiɛn i anz a o, afin i nyrun'n yo sro. M'an usɛ-mɛn kan ɔ fin'n, i kusu ɔ'a bo-mɛn i dunman'n ɔ'a kle-man min.

⁷ Ɔ seli min kɛ: ‹A wa wunnzɛ, a ´wu ba yasua kun. Ɔ man kɛ ɔ fin ndɛ'n, nán nɔn nzan annzɛ nzan kekle fi, nán di like fiɛn wie fi. Ba nga a wa wu i'n, kɛ ɔ fin i nin klun'n lele nin i wie'n, ɔ ti Nyanmiɛn i liɛ.»›

⁸ Yɛ Manɔak srɛli Anannganman seli kɛ: «Nannan, yaci, Nyanmiɛn sran nga a sunmɛnnin i'n, man ɔ bla ekun. Man ɔ wa kle e like ng'ɔ fata kɛ e yo e man ba bɔ e wa wu i'n.»

⁹ Nyanmiɛn tɛli Manɔak i srɛlɛ'n su. I anz wa toli Manɔak i yi'n ekun. Kɛ ɔ ´yo sɔ'n, wuun ɔ o fie su lɔ, ɔ ti ase. I wun Manɔak nun-mɛn i wun lɛ.

¹⁰ Bla'n wanndili ndɛndɛ ko toli i wun'n, ɔ seli i kɛ: «Nian, le kun wie sran'n b'ɔ bali'n, ɔ'a ba ekun.»

¹¹ Yɛ Manɔak jaso suli i yi su, yɛ be wa toli sran nin-ɔn. Nan Manɔak ɔ'a usɛ i kɛ: «?Wɔ yɛ a kannin ndɛ kleli bla nga nin-ɔn?» Bian tɛli i su kɛ: «Ɛɛn, min-ɔn.»

¹² Manɔak seli kɛ: «Ndɛ'n yɛ a kɛnnin i lɛ-ɔ. ?Sɛ sa sɔ'n i nuan yia'n, nguɛ yɛ e ´yo e man ba nin-ɔn?»

¹³ Anannganman i anz'n seli Manɔak kɛ: «Like kwlaa nga n seli bla'n kɛ nán ɔ di'n, man ɔ ci. Like kwlaa b'ɔ fin vinyi i mma nun'n, nán ɔ kɛn i nuan.

¹⁴ Nán man ɔ nɔn nzan ng'ɔ bo'n wie fi. Nán man ɔ di like fiɛn fi. Ndɛ nga n kan kleli i'n, man ɔ niɛn i kwla'n su yo.»

¹⁵ Manɔak seli Anannganman i anz kɛ: «Minndɛ kan, man n kun boli bɔ b'a kpɛ cro kun nan e fa yo like kan e man wɔ ka.»

¹⁶ Yɛ Anannganman i anz'n tɛli i su kɛ: «Kannzɛ a tra min ase'n, n su di-man like nga a tɔn'n, sanngɛ sɛ a klo'n tɛ nga be yrɛ i nnɛn kɔlikɔli'n, `yi kun man Anannganman.» Manɔak ɔ'a wun-mɛn i wlɛ kɛ Anannganman i anz nin-ɔn.

¹⁷ Manɔak usali Anannganman i anz'n kɛ: «Bo ɔ dunman kle e nan kɛ ɔ ndɛ'n kpɛn su'n y'a manman wɔ.»

¹⁸ Anannganman i anz'n tɛli i su kɛ: «?Ɔ yo sɛ ti yɛ a usa min dunman-an? Ɔ ti nvialiɛ nun like .»

¹⁹ Yɛ Manɔak fali boli bɔ b'a kpɛ cro kun ɔ nin ble annzɛ like ng'ɔ ti kɛ ble sa, yɛ ɔ yili sraka kun yɛbuɛ'n su mannin Anannganman-an. Kpɛkuun atrɛ sa wie yoli Manɔak nin i yi be nyrun.

²⁰ Kɛ sin'n ´jue Nyanmiɛn sɔwlɛ su'n, Anannganman i anz'n fuli sin taaman nun ɔli. Kɛ be wunnin i sɔ'n, be tɔli nan b'a utu bé nyin ase.

²¹ Kɛ ɔ yoli sɔ'n, Anannganman i anz'n ɔ'a yi-mɛn i wun nglo a kle-man Manɔak nin i yi be kun. I sin'n, Manɔak wa wunnin i wlɛ kɛ Anannganman i anz nin-ɔn.

²² Ɔ seli i yi'n kɛ: «Nyanmiɛn nga y'a wun i yɛ'n, e liɛ a wie.»

²³ I yi'n tɛli i su kɛ: «Sɛ ɔ ti kɛ Anannganman waan e wu'n, wuun ɔ'a sɔ-man e tɛ nga bɔ e yrɛ i nnɛn kɔlikɔli'n nin e ble annzɛ like ng'ɔ ti kɛ ble sa nga e fa mɛnnin i'n be nun. Yɛ kusu wuun ɔ'a yi-man sa nga'm be nglo a kle-man ye, wuun ɔ'a kan-man ndɛ nga mun a kle-man ye.»

²⁴ Bla'n wuli ba yasua kun nan ɔ'a tɔn i dunman kɛ Samsɔn. Ba'n nyinnin, Anannganman man ɔ yoli kpa.

²⁵ Anannganman i Wawɛ'n ɔ boli i su jralɛ bo Zɔrea nin Ɛstaɔl be afiɛn Dan nanmue nun lɔ.