Jɔlɛ Difuɛ Mun 12 - NYANMIƐN NDƐ'N 1998

Efraimfuɛ mun nin Galaadfuɛ'm be alɛ'n

¹ Efraim akpasua'n su sran'm be wa yiali, be ɔli nglo lɔ lika'n nun. Be ko seli Zɛfte kɛ: «?Ɔ ju sɛ ti yɛ a nin Amɔnfuɛ'm be ´ko kun bɔ a flɛ-man ye-ɔ? I sɔ'n ti e ´wɔ ɔ́ sua'n nin ɔ bɔbɔ amun nun.»

² Zɛfte tɛli bé su kɛ: «Kɛ akplowa dan'n tɔli Amɔnfuɛ mun ɔ nin min nvlefuɛ'n ye afiɛn'n, n flɛli amun amu'an de-man min bé sa nun.

³ Kɛ n nian bɔ amun ba-man min ukalɛ'n, yɛ n waan wie-o-wie nguan-o-nguan, yɛ e nin Amɔnfuɛ mun e ko kunnin-ɔn. Yɛ Anannganman kusu yili be mannin min-ɔn. Ɔ man alɛ nga amun nin min a bɛ i kunlɛ ndɛ yɛ'n, n wun-mɛn i wlɛ.»

⁴ Yɛ Zɛfte yiali Galaadfuɛ'm be kwlakwla yɛ ɔ nin Efraim akpasua'n su sran'm be ´kun-ɔn. Galaadfuɛ'm be kwlali Efraim akpasua'n su sran'm bɔ be waan: «Amun Galaadfuɛ mun, amun ti aofuɛ yɛ amun wa fiali Efraim akpasua'n su sran mun nin Manase akpasua'n su sran mun be afiɛn-ɔn.»

⁵ Galaadfuɛ'm be jrannin Efraim lika nga be nanti bé ja nun be kpɛ Zurdɛn lɛ'n, yɛ kɛ Efraim akpasua'n su sran wie su wanndi'n b'ɔ ju lɛ'n b'ɔ se kɛ: «Amun man min atin man n kpɛ nzue'n.» Galaadfuɛ'm be usɛ i kɛ: «?A ti Efraimfuɛ?» Sɛ ɔ tɛ su kɛ: «Cɛcɛ'n!» Kpɛkuun Galaadfuɛ'm be se i kɛ: «Se kɛ ‹Sibɔlɛt› man e nian e!»

⁶ Kɛ b'ɔ si-mɛn se'n, kpɛkuun i waan, «Zibɔlɛt.» E ijɔwa-a, b'a tɔ i su b'a kpɛ i kɔmin. Kan be kpɛ nzue'n bé ja nun lɛ'n yɛ be yo i sɔ sa nin-ɔn. Blɛ sɔ nun'n, Efraim akpasua su sran nga be tɔli'n be ti sran akpi-akpi ablanan-nin-nnyɔn (42.000).

⁷ Zɛfte b'ɔ ti Galaadfuɛ'n, ɔ yoli Izraɛlfuɛ'm be jɔlɛ difuɛ afuɛ nsiɛn. I sin ɔ wa wuli yɛ be sieli i Galaad klɔ'm be nun kun su .

Ibzan nin Abdɔn

⁸ Kɛ Zɛfte wuli'n, Ibzan b'ɔ fin Bɛtleɛm'n yɛ ɔ yoli Izraɛlfuɛ'm be jɔlɛ difuɛ-ɔ.

⁹ Ɔ wuli ba yasua ablasan ɔ nin ba bla ablasan. Ɔ fɛli i mma bla sɔ mun mannin nvle uflɛ nun yasua mun. Kpɛkuun ɔ jali nvle nun bla ablasan fa mannin i mma yasua mun.

¹⁰ Ɔ sieli Izraɛlfuɛ mun afuɛ nso nan ɔ'a wu. Be sieli i Bɛtleɛm lɔ.

¹¹ I sin, Elɔn b'ɔ fin Zabilɔn akpasua'n su'n yɛ ɔ sieli Izraɛlfuɛ mun-ɔn. Ɔ dili i kpɛnngbɛn liɛ'n afuɛ blu nan ɔ'a wu.

¹² Be sieli i Azalɔn, Zabilɔn nvle'n nun lɔ.

¹³ I sin ekun, Ilɛl i wa Abdɔn b'ɔ fin Piratɔn'n yɛ ɔ sieli Izraɛl-ɔ.

^14-15 Ɔ wuli ba ablanan yɛ i anunman'm be ti ablasan. Be lɛ be aflunmun ableso yɛ be fu be su-ɔ. Ilɛl i wa Abdɔn yoli Izraɛlfuɛ'm be jɔlɛ difuɛ afuɛ mɔcuɛ nan ɔ'a wu. Be sieli i Piratɔn b'ɔ o Efraim nvle'n nun lɔ, Amalɛk oka'n su.