Jɔlɛ Difuɛ Mun 11 - NYANMIƐN NDƐ'N 1998

Zɛfte ɔ'a kaci Izraɛl jɔlɛ difuɛ

¹ Zɛfte fin Galaad akpasua'n su, ɔ ti safunyrɛn. I nin'n ti tekle bla. I si yɛlɛ Galaad.

² Galaad i bo bla liɛ'n wuli ba mun mɛnnin i. Kɛ ba sɔ'm be nyinnin'n, be fuannin Zɛfte. Be seli i kɛ: «Nán wɔ aja diwlɛ yɛlɛ baba i awlo wa, afin ɔ́ nin liɛ ti i ngunmin.»

³ Yɛ Zɛfte wanndili i niaan'm be nyrun ko trannin Tɔb nvle nun lɔ-ɔ. Kpɛkuun sran wie mun bɔ be ti-man nanndoliɛ'n be yiɛli i wun lɛ, be nin i be ɔli alɛ kunlɛ kanngan.

⁴ Kɛ ɔ yoli sɔ'n, ɔ'a cɛ-man yɛ Amɔnfuɛ'm be nin Izraɛlfuɛ'm be bali kunlɛ nin-ɔn.

⁵ Yɛ Galaad lɔ kpɛnngbɛn'm be ɔli Tɔb nvle'n nun lɔ be ko yiali Zɛfte-ɔ.

⁶ Be seli i kɛ: «Bla wa dun mmua e nyrun man e nin Amɔnfuɛ mun e kun.»

⁷ Zɛfte tɛli Galaad kpɛnngbɛn'm bé su kɛ: «?Nán amun yɛ amun klo-man mín sa, bɔ amun fuannin min mín si i awlo'n nun nin-ɔn? ?Ɔ yo sɛ ti yɛ ndɛ amún sa ɔ'a mian kpɛkuun amu'an ba mín sin-ɔn?»

⁸ Be tɛli i su kɛ: «I sɔ'n ti yɛ y'a ba ɔ́ sin kɛ a nin ye wɔ man e nin Amɔnfuɛ mun e ko kun nin-ɔn. Kpɛkuun a ´yo Galaad nvle'm be kwlaa be su kpɛn.»

⁹ Zɛfte seli be kɛ: «?Amun waan, sɛ e nin amun e kɔ nan e nin Amɔnfuɛ mun e ko kun nan Anannganman yi be man min'n, min yɛ n ´yo amun kpɛn-ɔn?»

¹⁰ Yɛ be tɛli i su kɛ: «E kan Anannganman ti, sɛ y'a yo-man sɔ cɛ'n, man ɔ bu e fɔ.»

¹¹ Yɛ Zɛfte nin Galaad kpɛnngbɛn'm be ɔli-ɔ. Izraɛlfuɛ'm be fɛ i sieli kpɛn. I kunngba'n ɔ ti sonja'm be su kpɛn. Ndɛ kunngba nga be kɛnnin i lɔ'n, Zɛfte ko kɛnnin i Anannganman nyrun Mizpa lɔ.

Zɛfte nin Amɔnfuɛ'm be akplowa silɛ

¹² Zɛfte sunmannin sran Amɔnfuɛ'm be famiɛn'n sin kɛ be usa i kɛ: «?Nguɛ sa yɛ n yoli bɔ i ti yɛ amu'an ba min mɛn'n nun wa kɛ amun nin min ´kun alɛ nin-ɔn?»

¹³ Amɔn famiɛn'n tɛli Zɛfte i sran'm bé su kɛ: «Sa ti b'ɔ yoli sɔ'n yɛlɛ kɛ i blɛ nga Izraɛlfuɛ'm be fin Ezipt be ´ba'n, be fali min lika ng'ɔ fɛ i Arnɔn lele fa ju Zabɔk ɔ nin Zurdɛn nuan'n. Nan i sɔ'n ti, fa min lika'n man min wɛtɛɛ su.»

¹⁴ Yɛ Zɛfte sunmannin sran Amɔnfuɛ'm be famiɛn sin ekun-ɔn.

¹⁵ I waan be ko se i kɛ: «Izraɛlfuɛ'm b'a fa-man Moabfuɛ'm be lika annzɛ Amɔnfuɛ'm be lika.

¹⁶ Kɛ Izraɛlfuɛ'm be fin Ezipt lɔ be ´ba'n, be fali aawlɛ flɛnnɛn'n nun lɔ atin'n, be ko toli ndɛma jenvie'n, i sin be juli Kadɛs lɛ.

¹⁷ Izraɛlfuɛ'm be sunmannin sran Edɔm famiɛn'n i sin. Be srɛli i atin kɛ be ´sin i mɛn'n nun, sanngɛ famiɛn'n ɔ'a kplin-man su. Be sunmannin sran Moab famiɛn'n i sin ekun. I kusu ɔ'a kplin-man su. Ɔ man Izraɛlfuɛ'm be trannin Kadɛs.

¹⁸ Be ko sannin Edɔm mɛn'n ɔ nin Moab mɛn'n bé wun. Be sinnin Moab i wia afiliɛ lɔ yɛ be bali-ɔ, sanngɛ b'a kpɛn-man lɔ. Be wa boli be nanmue Arnɔn nzue ba'n i bue kun lɔ, sanngɛ b'a wlu-man Moab nvle'n nun, afin Arnɔn nzue ba'n wo Moab i nuan su.

¹⁹ Yɛ Izraɛlfuɛ'm be sunmannin sran Siɔn b'ɔ ti Amɔn famiɛn'n, b'ɔ tran Ɛsbɔn'n i sin kɛ ɔ man be atin man be ´sin i mɛn'n nun be ɔ be liɛ'n nun.

²⁰ Siɔn ɔ'a kplin-man su kɛ be sin i nvle'n nun, afin ɔ lafi-man be su. Kpɛkuun Siɔn flɛli i nvlefuɛ'm be kwlakwla ɔ man be ko boli be nanmue Zaaz. Be nin Izraɛlfuɛ mun be ko kunnin.

²¹ Anannganman b'ɔ ti Izraɛl Nyanmiɛn'n, ɔ yili Siɔn nin i sran mun mannin Izraɛlfuɛ mun, yɛ Izraɛlfuɛ'm be fali Amɔrfuɛ nga be tran lɛ lika'n nun'n bé mɛn'n kwlaa-a.

²² Izraɛlfuɛ'm be fali Amɔrfuɛ'm be lika ngba. Lika sɔ'n i tɛnndɛn nun'n fɛ i Arnɔn nzue ba'n i nuan su fa ju Zabɔk nzue ba'n nuan su. Yɛ i tɛtrɛ nun'n fɛ i aawlɛ flɛnnɛn'n nun fa ju Zurdɛn'n nuan.

²³ ?Lika nga Anannganman b'ɔ ti Izraɛl Nyanmiɛn'n fɛli i Amɔrfuɛ'm bé sa nun fa mannin Izraɛl b'ɔ ti i nvle'n, ɔ yo sɛ ti yɛ wɔ yɛ a wa de e sa nun-ɔn?

²⁴ ?Lika nga Kɛmɔs b'ɔ ti wɔ amuɛn'n fa man wɔ kɛ a tran nun'n, nɛ́n i yɛ a tran nun-ɔn? ?Yɛ e li yɛ lika kwlaa nga Anannganman b'ɔ ti e Nyanmiɛn'n fa man e kɛ e tran nun'n yɛ e su tran-man nun-ɔn?

²⁵ ?Ɔ kpa'n, a bu i kɛ ɔ kpa tra Zipɔr i wa Balak b'ɔ yoli Moab famiɛn'n? Afin nian, ɔ nin Izraɛlfuɛ'm b'a si-man akplowa, yɛ ɔ nin be b'a kun-man .

²⁶ Izraɛlfuɛ'm be trannin Ɛsbɔn nin i asa'n su, be trannin Arɔɛr nin i asa'n su, yɛ be trannin klɔklɔ nga be o Arnɔn nzue ba'n i nuan lɔ'n be kwlaa be su. Kɛ be trannin lɔ i afuɛ ya nsan yɛ. ?Lalaa'n, ɔ yo sɛ yɛ amu'an de-man lika sɔ mun bé sa nun-ɔn?

²⁷ M'an fɔn-man wɔ lika. Sɛ ɔ ti sa tɛ-ɔ, wɔ yɛ a su yo min-ɔn, afin a nin min a ba alɛ kunlɛ. Anannganman b'ɔ di jɔlɛ'n, ɔ wa bu ndɛ ng'ɔ o Izraɛlfuɛ mun nin Amɔnfuɛ'm be afiɛn'n andɛ.»

²⁸ Amɔnfuɛ'm be famiɛn'n ɔ'a tie-man ndɛ nga Zɛfte sunmannin sran kɛ be ko kan kle i'n.

Zɛfte i nda b'ɔ tali'n

²⁹ Yɛ Anannganman i Wawɛ'n jrali Zɛfte su-ɔ. Ɔ sinnin Galaad nvle'n nin Manase nvle'n nun. Ɔ sinnin Mizpe, kpɛkuun ɔ fɛli i lɛ nan ɔ nin Amɔnfuɛ'm b'a ɔ kunlɛ.

³⁰ Zɛfte tali Anannganman i nda kɛ: «Sɛ a yi Amɔnfuɛ mun wla mín sa nun'n,

³¹ kɛ n fin Amɔnfuɛ'm be mɛn'n nun lɔ m ´ba bɔ n klun ti jɔwa'n, sran ng'ɔ dun mmua fin min awlo'n nun lɔ fite ba min atin kpalɛ'n, ɔ ´yo ɔ liɛ mlɔnmlɔn. N ´fɛ i yi tɛ bɔ be yrɛ i nnɛn kɔlikɔli'n m ´man wɔ.»

³² Zɛfte ɔli Amɔnfuɛ'm be mɛn'n nun lɛ ɔ nin be ko kunnin alɛ, kpɛkuun Anannganman yili be mɛnnin i.

³³ Kɛ a fɛ i Arɔɛr lele bɔ a ´fa ju Minit, klɔ dandan ablaɔn o lɔ, ɔ kwlali be kwlakwla ng'ɔ o lɛ'n. Ɔ kwlali be lele juli Abɛl-Kɛramim. Kwlalɛ'n yoli dan, ɔ man Amɔnfuɛ'm bé nyin guali ase Izraɛlfuɛ'm be nyrun.

³⁴ Zɛfte ɔ ´sɛ i sin ´bɛ i awlo Mizpa lɔ'n, ɔ ´nian-an, i wa bla'n ɔ'a fite ɔ'a bɛ i atin kpalɛ. Ɔ ´ba'n, wuun ɔ ´bo klɛn ´si able. Zɛfte i wa ng'ɔ lɛ i yɛ ɔ o lɛ-ɔ. Zɛfte lɛ-man ba yasua fi, ɔ lɛ-man ba bla uflɛ fi.

³⁵ Kɛ ɔ wunnin i cɛ'n, ɔ titili i tralɛ'n nun. I waan: «Ee! Mín wa, w'a kun min, w'a kun min! Amun ngba yɛ amun sanngan min akunndan nin-ɔn. M'an ta nda Anannganman i nyrun. N lɛ-mɛn i yowlɛ fi kun.»

³⁶ Ɔ tɛli i su kɛ: «Mín si, kɛ bɔ a tali nda Anannganman i nyrun'n ti, sa ng'ɔ fiteli ɔ́ nuan kɛ a ´fa yo min'n, fa yo min! Afin Anannganman ɔ'a yo man w'a tu ɔ klunngbɔ Amɔnfuɛ'm bé su.

³⁷ Sanngɛ n ´srɛ wɔ like kun, yaci min nun anglo nnyɔn man n wɔ oka'm bé su lɔ. N ko sun, afin n nian si-man bian le nan se kɛ wie yɛ n ´ja-a. E nin min janvuɛ mun yɛ e ´kɔ-ɔ.»

³⁸ I si waan: «Kɔ!» Nan ɔ'a mɛn i atin kɛ ɔ ko di anglo nnyɔn, ɔ nin i janvuɛ mun be ɔli, ɔ ko sunnin oka'm bé su lɔ, bian b'ɔ nian si-mɛn le'n ti.

^39-40 Kɛ anglo nnyɔn'n wieli'n, ɔ sɛli i sin i si awlo lɔ, nan nda nga i si tali'n ɔ'a yo i nuan like'n. I blɛ sɔ nun'n, wuun ɔ nin yasua nian la-man le. Sa sɔ'n ɔ kacili Izraɛlfuɛ'm be nzuɛn. Afuɛ'n kwlaa kɛ i blɛ'n ko ju'n, Izraɛl talua'm be ko di Galaad bian'n i wa bla'n i ti cɛn. Be di i le nnan.