Jɔlɛ Difuɛ Mun 10 - NYANMIƐN NDƐ'N 1998

Tola i ndɛ

¹ Kɛ Abimelɛk wuli'n, sran ng'ɔ wa jasoli su kɛ ɔ ´de Izraɛl nvle'n yɛlɛ Tola, Dɔdo i wa Ipa i klun ba liɛ'n. Ɔ ti Isakar akpasua'n su sran. Ɔ tran Samir b'ɔ o Efraim oka-oka lika'n nun lɔ'n nun.

² Ɔ sieli Izraɛlfuɛ mun afuɛ ablaɔn-nin-nsan yɛ ɔ wuli-ɔ. Be sieli i Samir lɔ.

Zair i ndɛ

³ Sran ng'ɔ sinnin Tola i ajalɛ nun'n yɛlɛ Zair b'ɔ fin Galaad'n. Ɔ sieli Izraɛl afuɛ ablaɔn-nin-nnyɔn.

⁴ Ɔ wuli ba yasua ablasan. Be lɛ be aflunmun ablasan yɛ be fu su-ɔ. Be lɛ klɔ ablasan Galaad nvle'n nun lɔ. Lele ndɛ be tɛ flɛ be kɛ Zair klɔ.

⁵ Zair ɔ wa wuli nan b'a sie i Kamɔn lɔ.

Amɔnfuɛ'm be Izraɛlfuɛ'm be su tɔlɛ

⁶ Izraɛlfuɛ'm be wa yoli like nga Anannganman klo-mɛn i ekun. Be sɔli amuɛn nga be flɛ be Baal nin Astarte mun. Be sɔli Sirifuɛ mun, nin Sidɔnfuɛ mun, nin Moabfuɛ mun, nin Amɔnfuɛ mun, ɔ nin Filistifuɛ'm be amuɛn mun ekun. Be kacili bé sin sili Anannganman, b'a su-mɛn i kun.

⁷ Anannganman kusu fali bé wun ya dan kpa, nan ɔ'a fa be a wla Filistifuɛ nin Amɔnfuɛ'm bé sa nun.

⁸ Nvle sɔ'm be yoli be tɛtɛ kpa. Kɛ ɔ fɛ afuɛ sɔ'n nun lele b'ɔ ´fa di afuɛ blu-nin-mɔcuɛ'n, Izraɛlfuɛ nga be tran Zurdɛn i bue kun lɔ'n wia afiliɛ lɔ lika nun Amɔrfuɛ'm be lika ng'ɔ o Galaad lɔ'n, be wunnin nyrɛnnɛn dan.

⁹ Amɔnfuɛ'm be kpɛli Zurdɛn'n kɛ be nin Zida, nin Bɛnzamɛn, ɔ nin Efraim be akpasua su sran'm be ´ko kun. Izraɛlfuɛ'm be akunndan sanngannin kpa.

¹⁰ Yɛ be kpan flɛli Anannganman be seli i kɛ: «E fɔnnin ɔ wun, yɛlɛ kɛ a ti e Nyanmiɛn, kpɛkuun e yacili wɔ lɛ e ko sɔli Baal b'ɔ ti amuɛn'n.»

¹¹ Anannganman seli Izraɛlfuɛ'm be kɛ: «?I nun bɔ Eziptfuɛ mun, nin Amɔrfuɛ mun, nin Amɔnfuɛ mun, nin Filistifuɛ mun,

¹² nin Sidɔnfuɛ mun, nin Amalɛkfuɛ mun, ɔ nin Maɔnfuɛ'm be ´kle amun nyrɛnnɛn bɔ amun kpan flɛli min'n, m'an de-man amun bé sa nun?

¹³ Sanngɛ kpɛkuun amu'an kaci amún sin a si min, amu'an wɔ amuɛn'm be sɔlɛ. Nga amun yoli i lɛ'n ti n su de-man amun kun.

¹⁴ Amun `wɔ be ko kpan flɛ amuɛn nga amun ɔli bé sin'n, man be de amun blɛ kekle nga nun.»

¹⁵ Izraɛlfuɛ'm be seli Anannganman kɛ: «E yoli sa tɛ, like kwlaa nga ɔ waan a ´yo ye'n, yo ye. Sanngɛ yaci, ndɛ liɛ'n de ye.»

¹⁶ Be guali nvle uflɛ'm be amuɛn ng'ɔ o be sa nun'n be blo, kpɛkuun be suli Anannganman. Kɛ Anannganman wunnin i sɔ'n, ɔ yaci be nyrɛnnɛn nun-ɔn, ɔ yo-man ye.

¹⁷ Amɔnfuɛ'm be yiali, be ko kpɛli be ngblaliɛ'n Galaad nvle'n nun. Izraɛlfuɛ'm be kusu be yiali nan b'a kpɛ be ngblaliɛ Mizpa lɔ.

¹⁸ Galaadfuɛ mun be nin be kpɛnngbɛn'm be usali bé wun kɛ: «?Wan yɛ ɔ ´dun mmua ɔ nin Amɔnfuɛ'm be ´ko kun-ɔn? I sɔ sran liɛ'n yɛ ɔ wa yo Galaadfuɛ'm be kwlaa be su kpɛn-ɔn.»