Jɔlɛ Difuɛ Mun 1 - NYANMIƐN NDƐ'N 1998

Izraɛlfuɛ'm be Kanaan mɛn'n nun tranlɛ

¹ Kɛ Zozie wuli'n, Izraɛlfuɛ'm be usali Anannganman kɛ: «?E nun akpasua onin yɛ ɔ nin Kanaanfuɛ'm be ´dun mmua ko kun-ɔn?»

² Yɛ Anannganman tɛli be su kɛ: «Zida akpasua'n su sran mun-ɔn. M'an fa nvle sɔ'n m'an wla bé sa nun.»

³ Yɛ Zida akpasua su sran'm be seli Simeɔn b'ɔ ti Zida i niaan'n i akpasua su sran'm be kɛ: «Amun bla wa uka e man e nin Kanaanfuɛ nga be o e lika nun'n e kun. Cɛn nga amun nin amun liɛ'm be ´kun'n, e kusu e ´ko uka amun.» Yɛ Simeɔn i akpasua'n su sran'm be nin be ɔli-ɔ.

⁴ Zida akpasua'n nin Simeɔn akpasua'n be fali alɛ'n wlali Kanaanfuɛ nin Ferezfuɛ'm bé sin. Anannganman yili sran sɔ mun mannin be nan b'a kun be nun sran akpi blu (10.000) Bezɛk lɔ.

⁵ Be toli Adɔni-Bezɛk lɛ. Be nin i be kunnin. Be kwlali Kanaanfuɛ nin Ferezfuɛ mun.

⁶ Adɔni-Bezɛk wanndili. Be suli i su be ko trɛli i, nan b'a kpɛkpɛ i sama kokotre nin i ja mma kokotre'n,

⁷ kpɛkuun Adɔni-Bezɛk seli kɛ: «N kpɛkpɛli famiɛn ableso bé sama kokotre nin bé ja mma kokotre mun. Tabli nga n di su like'n, be o i bo yɛ aliɛ ng'ɔ flo mín sa nun tɔ'n yɛ be isa be di-ɔ. Nga n yoli'n yɛ Nyanmiɛn ɔ'a yi ɔ'a man min yɛ.» Be fɛli i bali Zerizalɛm, lɛ yɛ ɔ wa wuli-ɔ.

⁸ Kɛ Zida akpasua'n su sran'm be fɛli i lɛ'n, be ko tɔli Zerizalɛmfuɛ'm be su nan b'a fa klɔ'n. Be kunnin i nun sran'm be kwlaa nan b'a wɔ klɔ'n nun.

⁹ I sin Zida akpasua'n su sran'm be nin Kanaanfuɛ nga be tran oka-oka lika'm be nun lɔ, ɔ nin be nga be o ngua lɔ lika nun'n, ɔ nin be nga be o lika kpɛtɛkplɛɛ nun'n be ko kunnin.

¹⁰ I sin ekun be nin Kanaanfuɛ nga be tran Ebrɔn'n be kunnin. Laa Ebrɔn i dunman yɛlɛ Kirzat-Arba. Zida akpasua'n su sran'm be nin be kunnin nan b'a kwla Sesai, nin Aiman, ɔ nin Talmai.

Ɔtniɛl i Debir kwlalɛ

¹¹ Kɛ Zidafuɛ'm be fɛ i lɛ'n, be nin Debir lɔfuɛ'm be ko kunnin. Debir i dunman laa'n yɛlɛ Kirzat-Sefɛr.

¹² Kalɛb seli kɛ: «Sran ng'ɔ kwla Kirzat-Sefɛr lɔfuɛ mun nan ɔ fa be klɔ'n, n ´fa mín wa bla bɔ be flɛ i Aksa'n, n´fa mɛn i kɛ ɔ jɛ i.»

¹³ Kalɛb bɔbɔ i sinma liɛ bɔ be flɛ i Kɛnaz'n i klun ba bɔ be flɛ i Ɔtniɛl'n yɛ ɔ fali klɔ nin-ɔn, nan Kalɛb ɔ'a fɛ i wa Aksa'n ɔ'a mɛn i kɛ ɔ jɛ i.

¹⁴ Kɛ Aksa juli Ɔtniɛl awlo lɔ cɛ'n, ɔ jin Ɔtniɛl i wun kɛ ɔ srɛ asiɛ kun i si Kalɛb i sa nun. Aksa fin i aflunmun'n su jrali nan Kalɛb ɔ'a usɛ kɛ: «?ɔ waan a srɛ like?»

¹⁵ Yɛ ɔ tɛli i su kɛ: «Ɛɛn! Min waan n ´srɛ wɔ like. Min waan a man min nzue ti lika'n wie yɛlɛ kɛ lika nga a fa mannin min'n ti kee.» Yɛ Kalɛb fali nzue ti nga be o nglo lɔ ɔ nin nzue ti nga be o ngua wa'n mɛnnin i-ɔ.

¹⁶ Moiz i sia b'ɔ ti Kenfuɛ'n, i osu nunfuɛ mun ɔ nin Zida akpasua su sran'm be tuli be bo mme klɔ'n su lɛ. Be ɔli Zida aawlɛ flɛnnɛn b'ɔ o Arad i ngua lɔ'n nun, nan b'a tran lɛfuɛ'm be afiɛn.

¹⁷ Zida akpasua su sran mun, nin Simeɔn b'ɔ ti Zida i niaan'n i akpasua su sran mun be fali alɛ'n wlali Kanaanfuɛ nga be tran Zɛfat'n bé sin, nan b'a kwla be. Be nunnunnin klɔ'n mlɔnmlɔn, i sɔ'n ti be flɛli klɔ sɔ'n kɛ Nunnunlɛ.

^18-19 Anannganman ukali Zida i akpasua'n su sran mun ɔ man be fali oka-oka lika mun. Be fali Gaza klɔ'n, nin Askalɔn klɔ'n, nin Ekrɔn klɔ'n ɔ nin be asa'n su lika mun. Be nga be tran jenvie nuan'n be lɛ blalɛ kakaklolo. I sɔ'n ti, Zida akpasua su sran'm b'a kwla fuan-man be.

²⁰ Be fali Ebrɔn klɔ'n be mannin Kalɛb kɛ Moiz kan kleli be'n sa . I sɔ'n ti, Kalɛb fuannin Anak i mma nsan'm be akpasua su sran mun.

²¹ Bɛnzamɛn i osu nun sran'm b'a fuan-man Zɛbisfuɛ nga be tran Zerizalɛm lɛ'n. Ɔ man lele ndɛ Zɛbisfuɛ'm be nin be yɛ be o Zerizalɛm lɛ-ɔ.

Betɛl falɛ'n

^22-23 Manase nin Efraim bɔ be ti Zozɛf osu'n nun sran'n be kusu be ɔli Betɛl bɔ laa i dunman yɛlɛ Liz'n. Be nin be ɔli alɛ kunlɛ. Anannganman jrannin bé sin. Be sunmannin sran kɛ be kɔ kpla klɔ'n.

²⁴ Sran sɔ'm be ´nian-an, bian kun fin klɔ nun lɔ su fite. Be seli i kɛ: «Kle ye kan be sin bɔ be wlu klɔ'n nun lɔ'n. Sɛ a kle ye'n, e ´yaci ɔ nun.»

²⁵ Yɛ ɔ kleli be-ɔ. Efraim nin Manase be osu'n nun sran mun bɔ be ti Zozɛf i akpasua sufuɛ'n, be kunnin klɔ'n nun sran'm be kwlaa, san bian sɔ'n nin i osufuɛ mun yɛ be yacili be lɛ-ɔ.

²⁶ Bian sɔ'n ɔ ɔli Ɛtfuɛ'm be mɛn'n nun ko kplannin klɔ kun nan ɔ'a tɔn i dunman Liz. Be tɛ flɛ i sɔ lele ndɛ.

Nvle nga Izraɛlfuɛ'm b'a fuan-man be'n

²⁷ Manase i akpasua'n su sran'm b'a fuan-man Bɛt-Sean nin i asa'n su sran mun, nin Tanak nin i asa'n su sran mun, nin Dɔr nin i asa'n su sran mun, nin Zibleam nin i asa'n su sran mun, nin Megido nin i asa'n su sran mun. Kanaanfuɛ sɔ'm be kali lɛ.

²⁸ Kɛ Izraɛlfuɛ'm be wa nyannin fanngan'n, be miannin Kanaanfuɛ mun kɛ be di junman man be. B'a fuan-man be.

²⁹ Efraim i akpasua'n su sran'm be kusu b'a fuan-man Kanaanfuɛ nga be tran Gezɛr'n. Be nin be yɛ be o Gezɛr lɛ-ɔ.

³⁰ Zabilɔn i akpasua'n su sran'm b'a fuan-man Kitrɔnfuɛ mun nin Naalɔlfuɛ mun, yɛ Kanaanfuɛ sɔ'm be nin Zabilɔn akpasua'n be trannin lɛ-ɔ. Be dili junman mannin be.

³¹ Azɛr i akpasua'n su sran'm b'a fuan-man Akofuɛ mun, nin Sidɔnfuɛ mun, nin Aklalfuɛ mun, nin Akzibfuɛ mun, nin Ɛlbafuɛ mun, nin Afikfuɛ mun, nin Rɛɔbfuɛ mun.

³² Ɔ man Azɛr akpasua'n su sran'm be trannin Kanaanfuɛ mun bɔ be ti ɔnvuɛ'n be wun lɛ, b'a fuan-man be.

³³ Nɛftali i akpasua'n su sran'm b'a fuan-man Bɛt-Semɛsfuɛ mun, ɔ nin Bɛt-Anatfuɛ mun. Be trannin Kanaanfuɛ nga be ti ɔnvuɛ'n be wun lɛ, sanngɛ be miannin be kɛ be `di junman man be.

³⁴ Amɔrfuɛ'm be suli Dan i akpasua'n su sran'm bé bo ko sieli be oka-oka lika'n nun. B'a man-man be atin kɛ be jra lika kpɛtɛkplɛɛ'n nun lɛ.

³⁵ Amɔrfuɛ'm be kali Erɛs, nin Azalɔn, ɔ nin Saalbim lɛ, sanngɛ Zozɛf i osu nun sran'm be wa kwlali be. I ti be miannin be kɛ be di junman man be.

³⁶ Amɔrfuɛ'm be lika'n i anyialiɛ'n ɔ fɛ i Nyannglan Oka'n ɔ nin Sela klɔ'n bé wun lɔ kɔ.