Jacques 5 - NYANMIƐN NDƐ'N 1998

Anyanbeunfuɛ'm be afɔtuɛ manlɛ

¹ Anyanbeunfuɛ mun, an `sie amún su! Nyrɛnnɛn b'ɔ wa tɔ amún su'n ti'n, an `bo awuyomo, yɛ an `sun!

² Amun ninnge'm b'a saci, kakaa'm b'a di amun tralɛ mun.

³ Amun sika ɔkwlɛ'n nin amun jɛtɛ ufue'm b'a dun, i dunlɛ sɔ'n ɔ ´yiyi amún bo, yɛ ɔ ´yra amun kɛ sin sa. Mɛn nga y'a ju i bue nuan yɛ'n, amu'an tian amun ninnge'm bé nuan!

⁴ Be nga be di amun fie'm bé su junman'n, bɔ amu'an tua-man be kalɛ'n, an `tie be kpanlɛ'n. Be nga be kpɛ amun awie'n be kpan lele be nɛn'n to e Min Nyanmiɛn b'ɔ sie mɛn wunmuan'n lɔ .

⁵ An di amun klun like, yɛ an di mɛn'n, ɔ man amu'an yo kɛ nnɛn bɔ ɔ'a lo kpa bɔ i kunlɛ a ju'n sa.

⁶ An buli be nga be ti sran kpa'n be fɔ, yɛ an kunnin be, be nin amun a kpli-man.

Be anwlɛn tralɛ nin Nyanmiɛn srɛlɛ

⁷ I sɔ'n ti, aniaan mun, an `tra amun anwlɛn lele man ɔ fa ju e Min'n i balɛ. An `nian, fie difuɛ'm be tra be anwlɛn lele be nyan be fie'n su like kpakpa. Be tra be anwlɛn lele kofie bolɛ nzue'n nin wawa nzue'n ɔ tɔ su.

⁸ Amun kusu, an `tra amun anwlɛn, yɛ an `jran kekle, afin e Min'n i balɛ'n ɔ'a mantan.

⁹ Aniaan mun, nán an kan amun wiengu wun ndɛ tɛ man Nyanmiɛn bu amun fɔ, afin i yɛ ɔ ti Jɔlɛ Difuɛ nin-ɔn, ɔ jin anuan'n sin.

¹⁰ Aniaan mun, Nyanmiɛn nuan ijɔfuɛ bɔ be kannin ndɛ e Min'n i dunman nun'n, kɛ be ´kle be nyrɛnnɛn'n, be trali be anwlɛn. An `nian be liɛ'n su.

¹¹ Be nga be jrannin kekle'n, e se kɛ be liɛ su ti ye. An tili Zɔb i anwlɛn b'ɔ trali'n yɛ an wunnin i agualiɛ nga e Min'n man ɔ guɛli i'n, afin sran yo e Min'n i annvɔ, yɛ ɔ si i aunnvuɛ .

¹² N niaan mun, sa ng'ɔ ti cinnjin kpa'n yɛlɛ kɛ nán an flɛ nyanmiɛn'n, nin asiɛ'n, nin like wie fi be di. Sanngɛ sɛ an se kɛ «Ɛɛn'n,» man ɔ ka su, yɛ sɛ an se kɛ: «Cɛcɛ'n,» man ɔ ka su nan b'a fa-man amun a ɔ-man Nyanmiɛn ja su .

¹³ Sɛ nyrɛnnɛn wo amun nun wie su'n, man ɔ koko kle Nyanmiɛn. Sɛ amun nun wie klun ti jɔwa'n, man ɔ to jue manman Nyanmiɛn.

¹⁴ Sɛ amun nun wie wunnɛn yo i ya'n, man ɔ flɛ asɔnun kpɛnngbɛn mun. Man be guɛ i su ngo e Min'n i dunman nun yɛ be srɛ Nyanmiɛn kɛ ɔ yo i juejue .

¹⁵ Nyanmiɛn su bɔ be lafi'n ti'n, Nyanmiɛn srɛlɛ sɔ'n man tukpacɛfuɛ sɔ'n ´nyɛn i ti, yɛ e Min'n man ɔ ´jaso. Yɛ sɛ ɔ yoli sa wie'n, ɔ ´yaci cɛ i.

¹⁶ I sɔ'n ti, kɛ ɔ ´yo nan amu'an yo juejue'n, an `kan sa nga an yoli'n kle amun wiengu, an `srɛ Nyanmiɛn man amun wun kɛ ɔ man amun jaso. Sɛ sran kpa kun srɛ like Nyanmiɛn sa nun b'ɔ jran su kpa'n, i srɛlɛ sɔ'n yo sa ye dan.

¹⁷ Eli ti sran kɛ e sa. Ɔ srɛli Nyanmiɛn ɔ jrannin su kpa kɛ, nán man nzue'n tɔ, yɛ nzue'n jrannin lele afuɛ nsan anglo nsiɛn .

¹⁸ I sin ɔ srɛli Nyanmiɛn ekun kɛ man nzue'n tɔ. Ɔ tɔli nan ninnge'm b'a yo ye .

¹⁹ N niaan mun, an si kɛ sɛ amun nun sran wie yaci atin kpa'n b'ɔ fa-man ndɛ nanwlɛ'n su kun'n nan sran wie kle i atin kpafuɛ'n,

²⁰ sran sɔ'n b'ɔ kle sa tɛ yofuɛ'n i atin kpa'n, ɔ ´de i wie'n sa nun, yɛ ɔ man i wun sa kpanngban'n be ´wie .