Jacques 4 - NYANMIƐN NDƐ'N 1998

Be nga be fa mɛn'n taka bé ti su'n

¹ ?Utre'n nin akplowa ng'ɔ o amun afiɛn'n, be fin nin? ?Be fin-man amún nyin b'ɔ blo ninnge'm bé su b'ɔ man amun klun jɔ-man'n?

² An klo kɛ amun ´nyan ninnge mun, sanngɛ an nyan-man be, ɔ man an kun sran. Amún nyin blo sran like su, kɛ an nyɛn-mɛn i'n, an si akplowa, yɛ an di utre. Like nga an klo i'n, an nyɛn-mɛn i, afin an srɛ-man Nyanmiɛn kɛ ɔ fa man amun.

³ Sɛ an srɛ'n an nyɛn-mɛn i, yɛlɛ kɛ amun klun akunndan'n ti-man kpa, afin an klo kɛ sɛ an nyɛn i-ɔ amun ´fa yo like nga amun klun klo'n.

⁴ An ti kɛ bla b'ɔ kunndɛ bian i wun bo sa. ?An si-man kɛ sran ng'ɔ klo mɛn'n i dilɛ'n, wuun ɔ kpɔ Nyanmiɛn? Ɔ man sran nga i waan ɔ ´fa mɛn'n tɛkɛ i ti su'n, ɔ kaci Nyanmiɛn i kpɔfuɛ.

⁵ ?Nyanmiɛn Ndɛ nga be klɛli i kɛ Nyanmiɛn Wawɛ'n b'ɔ fa mannin ye'n jrɛn i nuan si i ti kwla'n, an bu i kɛ be klɛli i ngbɛn ?

⁶ Sanngɛ ye nga Nyanmiɛn yo ye'n ti dan, afin be klɛli i kɛ: «Nyanmiɛn nin be nga be tu be wun'n mun be lɛ i, sanngɛ ɔ yo aenvuɛfuɛ'm be ye .»

⁷ I sɔ'n ti, an `fa amún wun man Nyanmiɛn. Nán an lo amún wun man mmusu'm bé si Satan'n, an `jran kekle yɛ ɔ ´wanndi amun.

⁸ An `fa amún wun mantan Nyanmiɛn, yɛ i kusu ´fɛ i wun mantan amun-ɔn. Sa tɛ yofuɛ mun, an `wunnzin amún sa, akunndan nnyɔn-nnyɔnfuɛ mun, an `yaci akunndan tɛtɛ'n.

⁹ Man amun nyrɛnnɛn'n wlu amún nyin su, an `bo awuyomo, an `sun, yɛ srilɛ nga an sri'n, man ɔ kaci sunlɛ.

¹⁰ An `yo amún wun aenvuɛ e Min Nyanmiɛn'n i nyrun, yɛ ɔ man amun ´nyan nyrun.

Nán an kan amun niaan wun ndɛ tɛ

¹¹ Aniaan mun, nán an kan amun wiengu wun ndɛ tɛ. Sran ng'ɔ kɛn i niaan wun ndɛ tɛ annzɛ ɔ bu i fɔ'n, wuun mmla'n yɛ ɔ kɛn i ndɛ tɛ kɛ ɔ ti sa ɔ ti sa-a. Ɔ man sɛ an se kɛ mmla'n ti sa ti sa'n, wuun amun waan ɔ ti-man kpa.

¹² Nyanmiɛn kunngba'n b'ɔ sieli mmla'n, b'ɔ jran su di jɔlɛ'n, i yɛ ɔ man sran nguan-an, i yɛ man sran wu-ɔ. ?A ti ɔ liɛ sɛ bɔ a bu ɔ niaan fɔ-ɔ?

Nán an yo wun tufuɛ

¹³ Amun bɔ an se kɛ: « Ndɛ annzɛ ainman e ´kɔ klɔ nga su, e ´di afuɛ kun lɔ, e ´di aata, yɛ e ´nyan sika'n,» an `sie amun su.

¹⁴ An si-man like ng'ɔ ´yo amun ainman'n. An ti kɛ bɔlɛ'n b'ɔ gua kaan, sanngɛ kɛ ɔ ´yo kan'n, wuun ɔ'a titi'n sa .

¹⁵ An se-man kɛ: «Sɛ e Min Nyanmiɛn di su'n nan aliɛ'n cɛn ye'n, e ´yo nga e ´yo nga.»

¹⁶ Sanngɛ jɔlɛ caca'n yɛ an di-ɔ, yɛ an tu amun wun. Nuan dilɛ sɔ'n ti-man kpa.

¹⁷ Sran ng'ɔ si kɛ like nga sɛ ɔ yo-ɔ ɔ ti kpa b'ɔ yo-man'n, wuun ɔ'a yo sa tɛ.