Jacques 2 - NYANMIƐN NDƐ'N 1998

Nán an bu sran'n wie kpa tra wie

¹ N niaan mun, kɛ an lafi e Min Jésus-Krist b'ɔ lɛ nyrun dan'n i su'n, nán an bu sran'n wie kpa tra wie.

² Man e se kɛ wienun-ɔn amu'an wɔ asɔnun, kpɛkuun sran wie a wlu lɔ, sika nga wo i sa, tralɛ klanman wlɛ i wun, yɛ sran wie kusu i wun tralɛ sra-sra ɔ'a wlu lɔ.

³ Sɛ an bu ng'ɔ wla tralɛ klanman'n i sran bɔ an se i kɛ: «Tran lika kpa nga nun wa!» Yɛ an se yalɛfuɛ'n kusu kɛ: « Ɔ liɛ'n, jran lɛ!» Annzɛ: «Tran asiɛ wun bia'n wun lɛ'n,»

⁴ wuun an bu amun nun wie kpa tra wie, yɛ amu'an yo akunndan tɛ bufuɛ.

⁵ N niaan kpa mun, an `sie amun su! ?Nyanmiɛn a fa-man mɛn nga nun yalɛfuɛ mun kɛ be yo anyanbeunfuɛ i su bɔ be lafi'n ti nan famiɛn nga i waan be nga be klo i'n be ´di'n be di wie?

⁶ Sanngɛ amun liɛ'n, an bu-man yalɛfuɛ'm be sran. ?Nán anyanbeunfuɛ mun yɛ be mianmian amun be fa amun kɔ jɔlɛ difuɛ'm be ja su nin-ɔn?

⁷ ?Nán be yɛ be saci sran nga i dunman fɛ'n wo amun su'n i dunman nin-ɔn?

⁸ Nanwlɛ, mmla nga wie nun-mɛn i sin'n, bɔ be klɛli i Nyanmiɛn Ndɛ'n nun kɛ: «Klo ɔ wiengu kɛ a fa klo ɔ bɔbɔ wun'n sa'n,» sɛ an fa su'n, ɔ ti kpa .

⁹ Sanngɛ sɛ an bu sran'n wie kpa tra wie'n, wuun amu'an yo sa tɛ. Kɛ be nian mmla nun'n, be wun kɛ amu'an tɔn mmla'n.

¹⁰ Afin sran ng'ɔ fa mmla'n kwlaa su b'ɔ yaci kun'n, wuun ɔ'a saci i kwlaa.

¹¹ Sran ng'ɔ seli kɛ: «Nán kunndɛ bla ɔ́ yi bo annzɛ bian ɔ́ wun bo'n,» i kunngba'n seli kɛ: «Nán kun sran.» Ɔ man sɛ a kunndɛ-man bla ɔ́ yi bo annzɛ bian ɔ́ wun bo bɔ sanngɛ a kun sran'n, wuun w'a saci mmla'n .

¹² Kɛ be wa jran mmla b'ɔ man e nyan é ti'n su di jɔlɛ'n ti, ɔ man ndɛ nga amun ´kan'n, nin like nga amun ´yo'n, an `yo i i nuan su.

¹³ Afin kɛ Nyanmiɛn ´di be nga be si-man sran aunnvuɛ'n be jɔlɛ'n, ɔ su si-man be aunnvuɛ. Sɛ aunnvuɛ silɛ'n nin fɔ bulɛ'n be ti sran'n, wuun aunnvuɛ silɛ'n kwla fɔ bulɛ'n.

Nyanmiɛn sulafilɛ nin like nga sran yo'n

¹⁴ ?N niaan mun, sɛ sran kun se kɛ ɔ lafi Nyanmiɛn su bɔ sanngɛ be wun-mɛn i sɔ i nzuɛn'n nun'n, nzu ye yɛ ɔ yo mɛn i-ɔ? ?I Nyanmiɛn sulafilɛ sɔ'n kwla de i?

¹⁵ Man e se kɛ wienun-ɔn e niaan bian annzɛ e niaan bla kun lɛ-man tralɛ, yɛ ɔ lɛ-man aliɛ.

¹⁶ ?Sɛ amun nun kun se i kɛ: «Man ɔ́ wun jɔ wɔ fɔuun, man a nyan tannin kla, yɛ man ɔ ku yi!» Bɔ sanngɛ ɔ mɛn-mɛn i like nga i sa miɛn i wun'n, nzu ye yɛ ɔ'a yo a mɛn i-ɔ?

¹⁷ Sran ng'ɔ lafi Nyanmiɛn su'n, kɛ i kusu ti sɔ-ɔ, sɛ sa ng'ɔ yo be'n be ti-man kpa'n, wuun i Nyanmiɛn sulafilɛ'n ti ngbɛn.

¹⁸ Wienun-ɔn sran wie wa se n kɛ: «Ɔ liɛ'n, a lafi Nyanmiɛn su, yɛ n kusu'n, n yo sa kpakpa.» Yɛ n kusu n ´se i kɛ: «Man n nian ɔ Nyanmiɛn su bɔ a lafi bɔ a yo-man sa kpa'n, yɛ n kusu'n, sa kpakpa nga n yo be'n, m ma fa kle wɔ kɛ n lafi Nyanmiɛn su.»

¹⁹ A lafi su kɛ Nyanmiɛn ti kunngba cɛ, ɔ ti nanwlɛ. Mmusu'm be kusu be lafi su sɔ wie, ɔ man bé wun usu be.

²⁰ Eee, sran finfinfuɛ! ?A klo kɛ a wun i wlɛ kɛ sran ng'ɔ se kɛ ɔ lafi Nyanmiɛn su, sanngɛ ɔ yo-man sa kpakpa'n, i Nyanmiɛn su b'ɔ lafi'n ɔ yo-man sa fi ye?

²¹ ?Kɛ e nannan Abraam fɛli i wa Izaak kɛ ɔ ´fa sɔ Nyanmiɛn'n, Nyanmiɛn a bu-mɛn i sran kpa i sa sɔ'n ti ?

²² ?An wun-mɛn i? I Nyanmiɛn sulafilɛ'n nin i sa kpa yolɛ'n be san nun, ɔ man i Nyanmiɛn sulafilɛ'n i nyin fiteli weiin i sa kpa b'ɔ yoli be'n ti.

²³ Kɛ ɔ yoli sɔ'n, ɔ man Nyanmiɛn Ndɛ nga be klɛli'n ɔ kpɛnnin su, be klɛli i kɛ: «Abraam lafili Nyanmiɛn su, ɔ man i su b'ɔ lafili'n ti, ɔ buli i sran kpa.» Yɛ Nyanmiɛn flɛli i i janvuɛ .

²⁴ ?An wun-mɛn i? Nán sran i Nyanmiɛn su b'ɔ lafi'n ngunmin ti yɛ ɔ bu i sran kpa-a, sanngɛ sa kpa ng'ɔ yo be'n be o nun wie.

²⁵ ?Kɛ Raab b'ɔ ti tekle bla'n sikeli Zuif'm bɔ be sunmannin be'n, b'ɔ man be fali atin uflɛ ɔli'n, Nyanmiɛn a bu-mɛn i kusu sran kpa i sa sɔ'n ti ?

²⁶ Sɛ sran kun o sa b'ɔ de-man wunmiɛn'n, wuun ɔ'a wu. I kunngba nin-ɔn, sɛ sran kun se kɛ ɔ lafi Nyanmiɛn su bɔ be wun-mɛn i sɔ i nzuɛn'n nun'n, wuun i Nyanmiɛn sulafilɛ'n ti ngbɛn.