Jacques 1 - NYANMIƐN NDƐ'N 1998

Nvle blu-nin-nnyɔn'm be like yolɛ

¹ N Zak bɔ n ti Nyanmiɛn nin e Min Jésus-Krist be sran'n, n ´yo nvle blu-nin-nnyɔn bɔ b'a sanndi mɛn wunmuan nun'n be like.

Sa b'ɔ tɔ sran su'n i ndɛ, ɔ nin ngwlɛlɛ'n i ndɛ

² N niaan mun, sa fanunfanun ng'ɔ tɔ amun su'n, an `bu i amun cenjele like,

³ afin an si kɛ kɛ an lafi Nyanmiɛn su, bɔ be sa amun nian'n, yɛ man an kaci sran bɔ be tra be anwlɛn-ɔn.

⁴ An `tra amun anwlɛn lele guɛ i ti nin i bo nan amu'an yo sran, yɛ like fi su mian-man amun.

⁵ Sɛ ngwlɛlɛ'n w'a ti-man amun nun wie kpa'n, man ɔ kan kle Nyanmiɛn bɔ i sa ti-man tankaan'n, b'ɔ fa like man sran'm be kwlaa ɔ ijɔ-mɛn i sin'n. Ɔ man sran sɔ'n ɔ ´wun sa wlɛ.

⁶ Sanngɛ kɛ ɔ ´kan kle i'n, man ɔ lafi i su. Nán man ɔ sie i nyin nnyɔn-nnyɔn, afin sran ng'ɔ lafi-mɛn i su kpa'n, ɔ ti kɛ jenvie'n bɔ aunngban'n kpɛ su b'ɔ man ɔ keje kɔ wa kɔ wa'n sa.

⁷ I sɔfuɛ'n, nán man ɔ bu kɛ e Min Nyanmiɛn'n ´mɛn i like.

⁸ Ɔ ti sran bɔ i akunndan'n ti nnyɔn-nnyɔn. I sa'n kwlaa nun ɔ kacikaci.

⁹ Aniaan ng'ɔ ti yalɛfuɛ'n, man ɔ fa nyrun bɔ Nyanmiɛn man ɔ'a nyɛn i'n di i nuan.

¹⁰ Yɛ anyanbeunfuɛ'n kusu, kɛ Nyanmiɛn kle i kɛ ɔ ti yalɛfuɛ'n, man ɔ fɛ i yalɛ'n di i nuan. Afin anyanbeunfuɛ'n ti kɛ waka nyrɛ sa, ɔ cɛ-man.

¹¹ Wia'n fi, ɔ bo waka'n fiaan, i nyrɛ'n gua, kpɛkuun i nyrunnyan'n ɔ'a kpa. Anyanbeunfuɛ'n kusu, kɛ ɔ wa yaci i ninnge ng'ɔ yo be'n ɔ kpɛ kpo wu sɔ-ɔ .

Lakalɛ

¹² Sran nga sa tɔ i su b'ɔ trɛ i anwlɛn'n, i liɛ su ti ye. Afin kɛ Nyanmiɛn wun kɛ ɔ trɛ i anwlɛn sa sɔ nun'n, nguan b'ɔ ti like kpa, bɔ i waan ɔ ´fa man be nga be klo i'n, ɔ ´fa mɛn i.

¹³ Sɛ be laka sran kun'n, nán man ɔ se kɛ, Nyanmiɛn yɛ ɔ lɛkɛ i-ɔ. Afin be kwla laka-man Nyanmiɛn sa fi nun, yɛ i bɔbɔ laka-man sran fi.

¹⁴ Sanngɛ sran kun i lakalɛ'n fin i bɔbɔ i konvi'n, yɛ man be lɛkɛ i be nyɛn i-ɔ.

¹⁵ Sɛ konvi'n ti sran'n, wuun e ´se kɛ, ɔ wunnzɛ, yɛ ɔ wu sa tɛ'n. Kɛ sa tɛ sɔ'n i nyin ko ti kpa'n, i like b'ɔ su i su'n yɛlɛ wie'n.

¹⁶ N niaan kpa mun, nán an laka amun wun.

¹⁷ Like kpa kwlaa nga be fa man sran'n, ɔ nin like kpa kwlaa nga be nyɛn i'n, be fin e Si b'ɔ o nglo lɔ b'ɔ yili anglo'n, nin nzraama, ɔ nin wia'n bɔ be kpaja'n. I liɛ'n ɔ kaci-man mlɔnmlɔn, yɛ ɔ kpɛ-mɛn i wun kɛ lolɛ b'ɔ kpɛ i wun'n sa.

¹⁸ I ndɛ nanwlɛ'n ti ɔ fa e kaci i wa i klun klo su nan y'a yo like ng'ɔ yili be'n be kwlaa be nun klikli.

Nyanmiɛn Ndɛ'n su falɛ

¹⁹ N niaan kpa mun, an `bu ndɛ nga i akunndan: man sran'm be kwlakwla be sie bé su be tie ndɛ nga be kan'n kpa, nán man sran fi kan ndɛ ndɛndɛ, yɛ nán man ɔ fa ya ndɛndɛ.

²⁰ Afin sɛ sran fa ya'n, ɔ kwla yo-man sa ng'ɔ ti kpa'n Nyanmiɛn nyrun'n.

²¹ I sɔ'n ti, an `wla nzuɛn tɛtɛ'n nin klunwi'n kwlaa be ase. An `yo amún wun aenvuɛ, an `fa ndɛ nga Nyanmiɛn kan kle amun'n su. I yɛ man amun ´nyan amún ti-ɔ.

²² Nyanmiɛn ndɛ nga an ti'n, an `lafi su. Sɛ an tie i ngbɛn bɔ an fa-man su'n, wuun an su laka amún wun.

²³ Afin sɛ sran kun ti Nyanmiɛn ndɛ'n b'ɔ fa-man su'n, ɔ ti kɛ sran b'ɔ niɛn i nyrun niannun nun sa.

²⁴ Kɛ ɔ ko nian nun bɔ ɔ'a wɔ'n, kpɛkuun i wla a fi i wafa ng'ɔ ti'n.

²⁵ Sanngɛ Nyanmiɛn mmla'n b'ɔ ti niannun kpa'n, b'ɔ man sran'm be nyan bé ti'n, sran ng'ɔ nian nun'n, b'ɔ nian nun tititi'n, bɔ kɛ ɔ ti mmla'n i wla fi-man sanngɛ ɔ fa su'n, Nyanmiɛn man like ng'ɔ yo'n ɔ ´yo ye.

²⁶ Sɛ sran kun bu i wun kɛ ɔ su Nyanmiɛn sanngɛ ɔ sie-mɛn i nuan'n diin'n, i Nyanmiɛn sulɛ'n ti ngbɛn, ɔ su lɛkɛ i wun.

²⁷ Nyanmiɛn sulɛ b'ɔ ti kpa bɔ fiɛn fi nun-mɛn i wun e Si Nyanmiɛn nyrun'n, yɛlɛ aika mun nin angboti mmla'm bɔ be wun nyrɛnnɛn'n be lika nianlɛ, ɔ nin bé wun su nianlɛ mɛn nun sa tɛtɛ yolɛ'm be nun.