Ndɛ Nga Nyanmiɛn I Nuan Ijɔfuɛ Oze Kannin'n 9 - NYANMIƐN NDƐ'N 1998

Izraɛlfuɛ mun, nán amun bo wɛ be di cɛn

¹ Izraɛlfuɛ mun, nán amun bo wɛ be bo nglo, nán amun bo wɛ be yi be aklunjuɛ'n i nglo kɛ nvle kun nga mun sa. Afin sɛ n ´kwla se'n amun kpɔcili min bɔ n ti amun Nyanmiɛn'n amun tekle silɛ'n ti. Kan kwlaa nga be bo ble lɛ'n, san amun ´kunndɛ amun akatua lɛ kpan!

² Sanngɛ ble nga be bo i kple'n su lɛ'n, ngo nga be yi i ngo cuɛnwlɛ'n nun lɛ'n be su yo-man amun liɛ. Nzan lɔflɛ nga amun minndɛ i'n amun ´minndɛ i ngbɛn.

³ Efraimfuɛ mun, amun su kwla ka-man Anannganman'n i mɛn'n nun. Amun ´sa be sin Ezipt lɔ, yɛ amun ko di aliɛ ng'ɔ ti fiɛn'n Nyanmiɛn nyrun. Asiri lɔ yɛ amun ko di i sɔ nin-ɔn .

⁴ Ɔ man Efraimfuɛ'm be su kwla gua-man nzan man-man Anannganman'n kun. Anannganman su sɔ-man be tɛ nga be yi'n be nun kun. Aliɛ nga be ´di'n, ɔ wa kaci kɛ sɛ bo aliɛ sa, sran ng'ɔ di'n, fiɛn ´kɛn i. Be ´di aliɛ man be ku'n, sanngɛ be su kwla fa-man aliɛ sɔ'n be wlu-man Anannganman'n i sua'n nun lɔ.

⁵ ?Anyia cɛn'n b'ɔ ti Anannganman'n i cɛn'n, sɛ ɔ ju'n, amun ´yo i sɛ?

⁶ Kɛ amun mɛn'n ko saci bɔ an ´jaso nun kɔ'n, Eziptfuɛ'm be ´sɔ amun nun li bɔ cɛ, sanngɛ Mɔf klɔ'n yɛ ɔ ´yo amun asieliɛ-ɔ. Amun sika'n ɔ ´ka ijre afiɛn. Owie yɛ ɔ wa fu amun sua'm be nun-ɔn.

⁷ Amun fɔ tulɛ nga Anannganman'n kɛnnin i ndɛ'n, i blɛ'n ɔ'a wie ju. Yɛ amun kalɛ tualɛ blɛ'n kusu ɔ'a wie ju. I sɔ blɛ nun'n, Izraɛl wa si kɛ sa ti-ɔ. An ko se kɛ: «Nyanmiɛn nuan ijɔfuɛ'n ɔ'a bo fia, sran sɔ'n b'ɔ nin Nyanmiɛn be ijɔ'n i ti ɔ'a saci.» Sɛ ɔ bo fia'n, ɔ fin amun sa tɛtɛ beblebe'n, ɔ fin abɔlɛ kpɔlɛ nga amun kpɔ i'n .

⁸ Nyanmiɛn nuan ijɔfuɛ'n bɔ sasa Efraim'n, b'ɔ nin Nyanmiɛn yɛ be nanti'n, kan kwlaa ng'ɔ ´kɔ'n, be suɛ i wun aya kpan! Nyanmiɛn i sua'n nun kpɔlɛ'n cɛ yɛ be kpɔ i-ɔ.

⁹ An yoli sa tɛtɛ'n lele ɔ'a bobo su kɛ Gibea blɛ su'n sa, i sɔ sa tɛ liɛ'n, Anannganman'n su bu-man nnya gua-man su, ɔ ´tu amun fɔ sa tɛ sɔ'm be ti .

Efraimfuɛ'm be nyin wa gua ase

¹⁰ Anannganman'n waan: «Laa Izraɛl ti min nyrun kɛ aawlɛ flɛnnɛn wie nun vinyi mma sa. Kɛ n niannin amun nannan mun'n, n wunnin kɛ be like bɔ be fɛli i'n blɛ sɔ nun'n, yɛlɛ figie mma klikli nga be nyɛn i figie'n su'n. Sanngɛ be Baal-Pɛɔr lɔ julɛ yɛ, bé wun Baal b'ɔ ti nyannzuɛn like'n i sa nun fa wlalɛ yɛ. Be fali bé wun wlali amuɛn sɔ'n i sa nun, ɔ man be bɔbɔ be kacili tete like kɛ be soman uflɛ sɔ'n sa.

¹¹ Efraimfuɛ'm be nyrun bɔ be lɛ i'n ɔ wa tu kɛ anunman fa tu'n sa: be su fa-man kuɛ kun, be su wunnzɛ-man kun, be su wu-man ba kun.

¹² Ba kunngun nga be ´nyan be bɔ be ´ta be'n, n ´yo man ba sɔ'm be su nyan-man bé ti yo-man sran bɔ ngbɛn. N ´de be bé sa nun. Ee, cɛn nga n ko kaci mín sin n ko si be'n, be yako wie!

¹³ Efraimfuɛ mun bɔbɔ, kɛ n niɛn i lɛ'n, be wu be wa liɛ'n fa yo alɛ nnɛn. Be su fa be minndɛ sran ng'ɔ ´kun be mun.»

¹⁴ ?Ee Anannganman, fɔ onin cɛ yɛ ɔ nin be fata-a? Yo man bé yi'm be klun yo kpan, man be nyɔnflɛn nzue'm be wie nun.

¹⁵ Anannganman waan: «Ajalɛ nnyɔn-nnyɔn'n, Gilgal lɔ yɛ m boli i wunlɛ bo-ɔ, lɔ yɛ mín nyin fa cili be-ɔ. Ɔ man i ti'n, n wa kan bé bo min awlo'n nun, bé nyin kekle'n ti n su klo-man be kun. Be nin be famiɛn i awlo lɔ sran dandan'm be kwlaa yɛ n su klo-man be kun nin-ɔn.

¹⁶ Sɛ n ´kwla se'n, b'a bo Efraimfuɛ'm be kannin, be olui'm b'a wu kee, ɔ su su-man mma kun. Sɛ bla'm be nyan ba ekun'n, n ´kun be anwlɛn su ba sɔ bɔ be yɛyɛ be mun. N'yo man wie'n wa fa be.»

¹⁷ Min Nyanmiɛn ɔ wa yi be man gua, b'a tie-mɛn i nuan nun ndɛ'n ti ɔ wa yi be man gua. Wlan-wlanlɛ finfin'n sa yɛ be wa wlan-wlan mɛn uflɛ'm be nun-ɔn.