Ndɛ Nga Nyanmiɛn I Nuan Ijɔfuɛ Oze Kannin'n 8 - NYANMIƐN NDƐ'N 1998

Izraɛlfuɛ'm be bɔbɔ yɛ be mlinnin be wun-ɔn

¹ An `bo awɛ be bo sran'm be jɔ. Anannganman i sran'm be kpɔfuɛ'm bé su tɔ bé su, kɛ anunman nyin tɔ like wie su'n sa. «Sa ti bɔ be tɔ bé su sɔ'n, yɛlɛ kɛ aenguɛ nga min nin be e trali'n, b'a saci i'n. I bo'n kun ekun yɛlɛ kɛ b'a bu-man min mmla'n i like fi kun.

² Be ´kpan se min kɛ: ‹E Nyanmiɛn, e ti Izraɛlfuɛ, e liɛ e si wɔ.›

³ Sanngɛ kusu wuun b'a yi sa kpa yolɛ'n i blo, ɔ man kusu be ´wanndi be kpɔfuɛ'm be nyrun.

⁴ Kɛ be ´sie be famiɛn mun'n, be bo-man min dunman nun, be ´sie bé su kpɛnngbɛn mun'n, n ti-man nun. Be fa jɛtɛ ufue nin sika ɔkwlɛ yɛ be yo amuɛn mun-ɔn, i sɔ'n ti kusu yɛ be wa wie nunnun nin-ɔn.

⁵ Samarifuɛ mun, amun nannin ba nga amun fali sika ɔkwlɛ yili'n, nán min nyinma wun i kun! Ɔ ti min klɔklɔlɛ like, amu'an klɔklɔ min. Kɛ an wo amun liɛ sa'n, ɔ lɛ-man kɛ b'a nyan-man amún wun ndɛ kan b'a kan-man.

⁶ Nannin ba ng'ɔ o lɛ'n, amun bɔbɔ yɛ amun kpɛli i ba-a, ajuin difuɛ'n yɛ ɔ yili-ɔ, ɔ kwla nian-man sran su. I sɔ'n ti Samarifuɛ'm be nannin ba bɔ be fa sika ɔkwlɛ be yoli'n, n wa fufu nun.

⁷ Sɛ n ´kwla se'n, aunngban yɛ amun luali-ɔ, seke b'ɔ tu'n kusu yɛ amun wa ti-ɔ. ?Ble fekle'n, be fa yi sanmlɛn sɛ yɛ ɔ yo ye-ɔ? Sɛ bɔ be fa yi sanmlɛn'n aofuɛ mun yɛ be ´di-ɔ.

⁸ Izraɛl bɔbɔ yɛ man be mlinnin be wun-ɔn. Siɛn'n, be o nvle-nvle'm be afiɛn kɛ talie wie b'ɔ lɛ-man nyrun'n sa.

⁹ Afin be bɔbɔ be ɔli Asiri. Be ti be liɛ kɛ blo aflunmun bɔ i ngunmin sin i sinlɛ bo nun'n sa. Efraimfuɛ'm be ti kɛ bla bɔ i bɔbɔ yi sika yɛ ɔ fa kunndɛ bian mun sin'n be sa.

¹⁰ Ninnge wla nga be fa mannin nvle uflɛ mun lɛ'n, ɔ ti ngbɛn. Blɛ nga ɔ'a ju yɛ'n liɛ'n, n wa tian bé nuan. Trɔ nga wlengbi'm be famiɛn'n ɔ wa fa taka bé ti su'n, ɔ ´ti be kpa.

¹¹ Sraka yiwlɛ nga Efraimfuɛ'm b'a yo be kpanngban be ti be bɔbɔ be sa tɛ'n i su ukalɛ. Be jran sraka yiwlɛ sɔ'm bé su be yo sa tɛ'n sakpa.

¹² Kannzɛ bɔ min waan man n klɛ min mmla'n kwlakwla kpan m man be'n, ɔ ti ngbɛn bé sa nun.

¹³ Nnɛn dilɛ klolɛ ti kɛ be jin min sɔlɛ'n su sa. Sanngɛ i sɔ tɛ nga be ´yi i lɛ'n, ɔ ti min nyrun sɔ saa. Nán kɛ ń wla wa fi bé sa tɛ sɔ nin-ɔn. N ´tu be fɔ. Be wa sa be sin Ezipt lɔ ekun.

¹⁴ Izraɛl i wla fili i yifuɛ'n, ɔ ko kplannin sua kpakpa mun. Zida kusu kplannin klɔ kpanngban bɔ be si bé wun . Sanngɛ i sɔ klɔ liɛ mun'n, n wa fa sin n yi be nun. I sɔ sua kpakpa liɛ mun'n, sin'n yɛ ɔ ´di be-ɔ.»