Ndɛ Nga Nyanmiɛn I Nuan Ijɔfuɛ Oze Kannin'n 7 - NYANMIƐN NDƐ'N 1998

¹ «Kɛ n waan n ´yo Izraɛlfuɛ mun nan be `yo juejue'n, kpɛkuun Efraimfuɛ'm be fɔnlɛ liɛ'n, ɔ nin Samarifuɛ'm be sa tɛtɛ nga be yo be'n yɛ b'a tɛ nglo yɛ. Be lakalaka sran'm be di bé wun ninnge mun. Awiefuɛ'm be wluwlu sua'm be nun, kodiawiefuɛ'm be gua klɔ nun atin'm be nun yɛ be yo abɔlɛ nin-ɔn.

² Sanngɛ ɔ kpɛn-man sran fi klun se-man kɛ wie-ɔ, tɛ nga be yo'n n wun i. Yɛ be bɔbɔ bé tɛ'n yɛ ɔ'a ci be siɛn'n yɛ. I kwlaa'n yɛ ɔ gua mín nyin su kpɛsɛ yɛ.

³ Be klunwi aeliɛ'n jɔ famiɛn'n klun. Gblɛ nga be kpɛ'n, ɔ jɔ famiɛn'n i awlo lɔ sran dandan'm be kusu be klun.

⁴ Be kwlaa be kunndɛ be wiengu'm bé yi mun nin bé wun mun. Be ti kɛ fur sa, kɛ kpaun tɔnfuɛ'n ko trɔ nun sin bɔ ɔ'a lo kpa'n, kpɛkuun ɔ nian-man lɔ kun lele san kpaun ng'ɔ boli'n ɔ'a wla.

⁵ Cɛn nga be ´di famiɛn'n i cɛn'n, kɛ famiɛn'n i awlo lɔ sran dandan'm be ko nɔn nzan'n b'ɔ ko ti be'n, kpɛkuun ndɛ'm be su floflo bé nuan.

⁶ Be nga sran'm be wun njiciɛ'n yɛ be cici, i sɔ sran'm be ti kɛ fur sa. Kɔnguɛ be ti flɔlɔ sa be yɛyɛ-man, sanngɛ nglɛmun be jue kɛ b'a trɔ fur nun sin sa.

⁷ Kɛ b'a lo klakla'n, wuun be su kun be su kpɛnngbɛn mun. Kɛ be famiɛn'm be tɔ kunngun sa! Sanngɛ be nun kun sa kpan flɛ-man min kɛ n `de be le.

⁸ Nvle wie'm be nzuɛn tɛ'n ɔ'a sa Efraimfuɛ mun. I ti man Efraimfuɛ mun b'a yo kɛ gbofloto wie b'ɔ o sin su bɔ b'a kaci-mɛn i sa.

⁹ I wunmiɛn ng'ɔ o i nun'n, aofuɛ'm b'a fa, sanngɛ ɔ si-man sɔ. I ti'n ɔ'a bo je sanngɛ ɔ wun-man nun kɛ ɔ'a yo oke.

¹⁰ Izraɛlfuɛ'm be tutre bɔ be di'n ɔ'a saci bé wun. Izraɛlfuɛ'm b'a sa-man bé sin min Anannganman bɔ n ti be Nyanmiɛn'n mín wun. I kwlaa sɔ nun'n b'a usa-man min osu.

¹¹ Efraimfuɛ'm be ti kɛ auble wie mun bɔ be si-man ngwlɛlɛ bɔ akunndan nun-man bé ti nun'n sa. Be kpan flɛli Eziptfuɛ mun, kpɛkuun b'a sin b'a ɔ Asiri.

¹² Sanngɛ kɛ be ´tu kɔ sɔ'n, n ´to min lala'n n ´gua bé su, n ´yi be ase kɛ anunman sa. Kɛ be sa tɛ'n fa ti ju'n, i su yɛ n ´fa tu be fɔ-ɔ .

¹³ Efraimfuɛ'm be yako! Nian, be su wanndi min. Nyrɛnnɛn nga be wa wun i'n ti beblebe ngbɛn, afin bé nyin ɔ'a yi-man min. Blɛ nga min waan n ´de be'n, kpɛkuun be tɔnnin min suɛn.

¹⁴ Be kpan flɛ min kɛ n wa de be, sanngɛ min flɛlɛ sɔ'n ɔ jɔ-man be klun kpa. Kɛ be la'n, be bu-man be nyinma, be kpli be bɛ'n su kplakplakpla. Be liɛ'n be bu i kɛ, kɛ be bobo bé wun kannin'n yɛ be wa nyan aliɛ be ´di-ɔ, yɛ be ´nyan nzan lɔflɛ be ´nɔn-ɔn. Kusu wuun kɛ ɔ ´yo sɔ'n, wuun e nin be ye afiɛn'n ɔ'a saci.

¹⁵ Min yɛ n tali be-ɔ. Min yɛ n wlali be yakpa-a, sanngɛ mín wun akunndan tɛ'n yɛ be bu-ɔ.

¹⁶ Ɔ lɛ be sran nga be sa bé sin be bɛ i sin'n, nán min-ɔn. Be ti kɛ ta b'ɔ ti-man kpa'n sa. Bé famiɛn i awlo lɔ sran dandan mun bé nuan nun ndɛ dandan'n ti be ´wu alɛ'n nun, ɔ man be ´fa be kpɛ flɛn Ezipt lɔ.»