Ndɛ Nga Nyanmiɛn I Nuan Ijɔfuɛ Oze Kannin'n 5 - NYANMIƐN NDƐ'N 1998

Izraɛl i ngwlɛlɛ klefuɛ tɛtɛ mun

¹ «Nyanmiɛn nyrun jranfuɛ mun, amun `sie amún su be `tie ndɛ nga kpa! Izraɛlfuɛ mun, amun `sie amún su kpa! Famiɛn i awlofuɛ mun, an `sie amún su! Ndɛ nga ti amun liɛ, yɛlɛ kɛ Mizpa lɔ'n, amun kacili kɛ aya sa min sran'm bé bo, amun kacili kɛ tɛ bɔ b'a guɛ i Tabɔr oka'n su'n sa.

² Kpɛkuun Sitim lɔ kusu'n, amun kacili kunman kploun kpa kun b'ɔ nannan bé bo-ɔ. I lɛ'n ti man m bɔbɔ min Anannganman'n, n wa tu amun kwlaa amun fɔ.

³ M bɔbɔ n si Efraim, Izraɛl i wun sa'n, ɔ fia-man min nyrun. Afin siɛn'n, Efraim si tekle'n wie, ɔ man fiɛn ɔ'a kan Izraɛl wunmuan.»

⁴ Sa nga Izraɛlfuɛ'm be yoli'n ti be kwla sa-man bé sin be ba-man Nyanmiɛn sin kun. Tekle silɛ'n akunndan'n wo bé ti'n nun dan. Be si-man Anannganman.

⁵ Efraimfuɛ'm bé wun tulɛ'n ɔ'a saci bé wun. Izraɛlfuɛ mun nin Efraimfuɛ'm be sa tɛ bɔ be yoli'n ti be su wa tɔ. Zidafuɛ'm be nin be yɛ be ´tɔ-ɔ.

⁶ Be nannin nin be bua nga be waan be ´fa yi tɛ be ´man Anannganman'n, be ´fa wlan be ´kunndɛ Anannganman lele, sanngɛ be su wun-mɛn i afin ɔ'a kaci i sin ɔ'a si be.

⁷ Be lakali Anannganman'n. I lakalɛ bɔ be ´lɛkɛ i'n, yɛlɛ gua su ba bɔ be wuli be'n. Ɔ man kusu anglo kunngba nun'n, be mɛn'n nin be ninnge'm be ´saci mlɔnmlɔn.

Alɛ ng'ɔ o Efraim nin Zida be afiɛn'n

⁸ «An `bo awɛ Gibea lɔ, an `bo awɛ Rama lɔ, an `bo sro Bɛt-Avɛn lɔ, Bɛnzamɛn akpasua sufuɛ mun, amun `nian amun wun kpa.

⁹ Fɔ tulɛ cɛn'n nun, Efraim mɛn'n ´bo. Ndɛ nga n su kan kle Izraɛl akpasua mun yɛ'n, ɔ ´ju sakpa.

¹⁰ Zida famiɛn i awlo lɔ sran dandan'm be ti kɛ be nga bɔ be tutu be fie'm be su ninnge nga be fa ja awɛ'n be bo be sie i lika uflɛ'n be sa. Ɔ man min ya dan nga m'an fɛ i yɛ'n, n wa fa gua be su kɛ nzue dan wie yɛ ɔ su sonji gblogblo sa.

¹¹ Efraimfuɛ'm be lɛ-man nyrun kun, b'a kuakua. Afin be bɔbɔ be tiaun mmla liɛ'n yɛ be waan be ´nanti su-ɔ.

¹² Siɛn'n, n ti kɛ yra sa yɛ n wo Efraimfuɛ'm bé wun-ɔn. M'an kpuke. Kpɛkuun n ti kɛ kannin dan wie sa Zidafuɛ'm be wun.

¹³ Efraimfuɛ'm be wunnin be tukpacɛ'n, Zidafuɛ'm be kusu be wunnin bé wun kannin dan'n. Ɔ man Efraimfuɛ'm be nuan toli Asirifuɛ mun. Be sunmannin sran famiɛn dan'n i wun lɔ. Sanngɛ Efraimfuɛ mun famiɛn sɔ'n su kwla yo-man man amun jaso-man, ɔ su kwla yo-man amún kannin'n i ayre.

¹⁴ Afin m bɔbɔ min n ´kaci kɛ asɔmɔli sa Efraimfuɛ'm bé wun, n ´kaci kɛ asɔmɔli bɔ ɔ'a kpɛ cro'n sa Zidafuɛ'm bé wun, n ´titi be nun kpɛkuun n su kɔ min nyrun. Kɛ n ´kɔ'n, n ´fa be m ´bo min je nun n ´kɔ, sran fi sa su kwla-man be mín nuan nun de.

Be ´sa be sin Anannganman wun

¹⁵ N ´kɔ, n ´sa mín sin min tranwlɛ'n nun lɔ lele san bé tɛ nga be yoli'n ɔ ´fite bé nuan. Ɔ ´fite bé nuan kpɛkuun be ´sa be sin mín wun. Cɛn nga nyrɛnnɛn'n tɔ bé su'n, be ´usa min osu.»