Ndɛ Nga Nyanmiɛn I Nuan Ijɔfuɛ Oze Kannin'n 4 - NYANMIƐN NDƐ'N 1998

Nyanmiɛn nin i nvle'n b'a nyɛn i

¹ Anannganman nin i mɛn'n nunfuɛ'm be lɛ ndɛ. Izraɛlfuɛ mun, an `tie ndɛ ng'ɔ kan'n: «Be wun-man sran nanwlɛfuɛ nin aklunyefuɛ kun. Min bɔ n ti Nyanmiɛn'n be bua-man min ndɛ nun mɛn nga nun kun.

² Like nga be yo i siɛn'n yɛlɛ be wiengu'm be amuɛn wualɛ nin be lakalakalɛ, nin be kunlɛ, nin bé bo ninnge'm be wualɛ, nin sran'm be bɔbɔ be wualɛ, ɔ nin be wiengu'm bé yi nin bé wun'm bé bo kunndɛlɛ. Sran kunlɛ'n yɛ be jin su sa mlɔnmlɔnmlɔn-ɔn.

³ I sɔ'n ti, sa yalɛ wa tɔ mɛn'n su. Nzue su tɔ-man kun. I klɔ sran mun o, i nnɛn mun o, i anunman mun o, be kwlaa bé wun ´fɔ. Jue'm be kwlaa be ´wu.»

Nyanmiɛn nyrun jranfuɛ'm be kunndɛ kɛ min nvle'n yo tɛ

⁴ Nán kɛ sran'm be kwlakwla yɛ m ´man be ndɛ-ɔ. Nán kɛ sran'm be kwlakwla yɛ n ´ijɔ be-ɔ. Wɔ bɔ a ti min nyrun jranfuɛ'n bé su kpɛn'n yɛ e nin wɔ lɛ i-ɔ .

⁵ Wia klengle kpa'n nun yɛ ɔ́ ja'n ɔ ´kpla-a, yɛ ɔ niaan'n b'ɔ ti min nuan ijɔfuɛ'n kusu i ja liɛ'n ɔ ´kpla kɔnguɛ. Izraɛl, n ´kun wɔ awuliɛ nin'n.

⁶ Min sran'm be su wu, silɛ bɔ be si-man min'n ti be su wu. Ɔ kusu ɔ liɛ'n, a yili min ase. Silɛ nga a si min laa'n, a si-man min sɔ kun. I sɔ'n ti kusu m'an yi wɔ ase, a su yo-man min nyrun jranfuɛ kun. Mmla nga n kleli wɔ bɔ ɔ́ wla fili be su'n ti, min kusu n su kplin-man su kɛ ɔ mma'm be yo min nyrun jranfuɛ.

⁷ Kɛ min nyrun jranfuɛ'm be ´trɛ be ´kɔ be nyrun'n, wuun blɛ li yɛ be ´se be kɛ be `yo tɛ nin-ɔn. Be nyrun bɔ be lɛ i'n, n wa yo man ɔ ´kaci kuakualɛ.

⁸ Like nga bɔ min sran'm be yo-mɛn i kpa'n, bɔ be ko yi i nuan tɛ be man min'n, i sɔ tɛ ninnge liɛ'n, yɛ ɔ ti min nyrun jranfuɛ sɔ'm be aliɛ yɛ be di-ɔ. I ti be akunndan liɛ kunngba ng'ɔ o be klun'n, yɛlɛ kɛ man min sran'm be yo sa tɛ'n tititi.

⁹ Sanngɛ sa ng'ɔ ´nyan min nyrun jranfuɛ mun'n, ɔ ´nyan min nvlefuɛ mun be wie. Be nzuɛn'n ti n ´kle be nun. Bé sa tɛ nga be yoli'n, be ´fɛ i su afɛ'n.

¹⁰ Man be di like'n sɛ, sanngɛ nán kɛ be ku yɛ ɔ ´yi ti-ɔ. Man be si tekle'n sɛ, sanngɛ nán kɛ ba yɛ be ´wu i ti-ɔ. Afin m bɔbɔ min Anannganman'n, be yili min nin min mmla'm be ase. Be yacili min lɛ be ɔli be tekle silɛ, be ɔli amuɛn'm bé sin.

¹¹ Min sran'm be nzan ndɛ'n ti be cinnjin ngboko. Nzan ndɛ'n ɔ'a saci bé ti'n.

¹² Waka sran'n yɛ be ko usɛ i sa-a. Waka losin'n yɛ ɔ ko ijɔ kle be-ɔ. Tekle silɛ'n mlinnin be. Afin be wlaka bolɛ sɔ'n ti be nin min ye afiɛn'n tili nun.

¹³ Oka'm be su yɛ be yi tɛ mun-ɔn. Kpɔlɛ'm be su yɛ be yra ansans mun-ɔn. Waka kɛ sɛni, nin peplie, ɔ nin terebɛnt bɔ be lɛ fɔnvɔ klanman'n, be bo yɛ be gua-a. I sɔ nga lɛ'n ngba kwlaa ti yɛ man amun mma mmla'm be si tekle nin-ɔn, i ti yɛ amun sewi'm be kunndɛ be wiengu mun bé wun mun nin-ɔn.

¹⁴ Ɔ man amun mma mmla nga be sili tekle'n, n su yo-man be sa fi, amun sewi nga be kunndɛli be wiengu'm bé wun mun'n, n su yo-man be sa fi. Amun yɛ e nin amun y'a nyɛn i-ɔ. Afin amun yasua'm be bɔbɔ yɛ amun cuɛn mmla'm be kɔ klɛ nun, yɛ ninnge nga amun fa man amuɛn mun'n yɛ amun nin tekle nga be o sua'm be nun'n be di-ɔ. Be bu be nyanndra be se kɛ: «Nvle nga ngwlɛlɛfuɛ nun-man nun'n, i sɔ nvle liɛ'n ti mlinfuɛ.»

¹⁵ Izraɛl, sɛ a ´si ɔ tekle'n, nán man Zida si wie. Min lika ng'ɔ o Gilgal lɔ'n, nán an wɔ lɔ, nán an wɔ be ju Bɛt-Avɛn lɔ, be ko ta nda se kɛ: «N kan Nyanmiɛn!»

¹⁶ Izraɛlfuɛ'm be yoli nyin kekle. Be yoli kɛ nannin bla wie bɔ be ´sie i kɔmin su waka-a ɔ kpli-man su'n sa. Ɔ man i ti siɛn'n, Anannganman ɔ wa yo be kɛ bua ba wie bɔ b'a to i kunngba cenje b'a yi i aawlɛ wie nun b'ɔ su didi'n sa.

¹⁷ Efraimfuɛ'm b'a fa amuɛn sɔlɛ'n b'a cici bé ti. Yaci be lɛ!

¹⁸ Kɛ be wie nzan nɔn cɛ'n, man be fa bé ti be tin i tekle silɛ'n nun. Kuakualɛ yɛ bé su ngbɛn'm be klo i-ɔ.

¹⁹ Aunngban dan'n ´kata be su kplu! Kpɛkuun be ´wun bé tɛ bɔ be yili'n su nyannzuɛn.