Ndɛ Nga Nyanmiɛn I Nuan Ijɔfuɛ Oze Kannin'n 2 - NYANMIƐN NDƐ'N 1998

Zizreɛl i cɛn dan'n

¹ Sanngɛ cɛn kun wa ju, Izraɛlfuɛ'm be wa trɛ kaka kpa. Be ka be-ɔ be ko si-man bé nuan. Be ´sɔn kpa kɛ jenvie nuan aunnyan sa. Nyanmiɛn su se-man be kɛ: «Nán min sran yɛlɛ amun kun .» Be ´flɛ be kɛ: «Nyanmiɛn b'ɔ lafi-man'n i mma mun.»

² Zidafuɛ'm be nin Izraɛlfuɛ'm be wa yo nvle kunngba kɛ laa'n sa. Kpɛkuun bé bo ´yo kun be ´fa be nun sran kunngba kɛ i yɛ ɔ `sie be-ɔ. Yɛ be ´tu be bo mɛn'n nun, afin Zizreɛl i cɛn'n ɔ ´yo cɛn dan kpa .

³ Anannganman'n dunman nun amun `flɛ amun niaan yasua'm be kɛ: «Min sran mun» Yɛ amun `flɛ amun niaan mmla'm be kɛ: «Nsi-be-aunnvuɛ».

Izraɛl ti kɛ bla b'ɔ kunndɛ bian i wun bo'n sa

⁴ «Amun nin Izraɛl b'ɔ ti amún nin'n amun `fu su, afin ɔ ti-man mín yi kun, yɛ n kusu n ti-mɛn i wun kun i sɔ'n ti, amun nin i `fu su . Nzɔliɛ ng'ɔ o i nyrun b'ɔ man be si kɛ ɔ si tekle'n, man ɔ yi. Kun ng'ɔ o i nyɔnflɛn nnyɔn'm be afiɛn'n nun b'ɔ man be si kɛ ɔ kunndɛ bian i wun bo'n, man ɔ yi i ekun.

⁵ Sɛ ɔ ti-mɛn i ti'n, n ´kpɛ i wun kɛ ndɛkɛn yɛ b'a wu i sa, i wun yo ngblɛn. N ´yo man ɔ yo kɛ aawlɛ flɛnnɛn'n sa, ɔ ´kaci kɛ asiɛ bɔ be yo su like-ɔ ɔ yo-man ye'n sa, nzue we ´kun i lele ɔ ´wu.

⁶ Kpɛkuun n su bua-man i mma'm be ndɛ nun, afin be ti gua su ba.

⁷ Bé nin sili tekle. I b'ɔ wuli be'n, i bɔbɔ kuɛkuɛli i wun, afin ɔ ko se kɛ: ‹N ´kɔ min soman'm bé sin, afin sɛ n ´nyan aliɛ n ´di o, sɛ n ´nyan nzue n ´nɔn o, sɛ n ´nyan kondro n ´kla o, sɛ n ´nyan be n ´la su o, sɛ n ´nyan nguɛn n ´kpakpa o, sɛ n ´nyan nzan n ´nɔn o, i kwlaa sɔ'n fin be.›

⁸ I sɔ'n ti m bɔbɔ min Anannganman'n, kɛ ɔ ´yo nan ɔ'a kwla wun-man atin'n ti n ´si i wun talɛ, n ´fa owie n ´tannin i.

⁹ Ɔ su i soman'm be su-ɔ, ɔ su to-man be. Ɔ ´kunndɛ be lele ngbɛn, ɔ su wun-man be. Kpɛkuun ɔ wa se kɛ: ‹Sɛ ɔ ti sɔ'n, n ´sa min sin mín wun klikli fuɛ'n i wun lɔ, afin lɔ liɛ'n, n klun ´jɔ tra siɛn'n.›

¹⁰ Ɔ'a wun-mɛn i wlɛ kɛ min yɛ m mɛnnin i aliɛ ng'ɔ di'n, nin nzan lɔflɛ ng'ɔ nɔn'n, ɔ nin ngo ng'ɔ kpakpa nin-ɔn. Yɛ ɔ'a wun-mɛn i wlɛ kɛ min yɛ m mɛnnin i jɛtɛ ufue nin sika ɔkwlɛ ng'ɔ fa yi sraka mannin amuɛn nga be flɛ i Baal nin-ɔn.

¹¹ I sɔ'n ti, sɛ aliɛ fitelɛ blɛ'n ju'n, n ´yo man ɔ su nyan-man aliɛ. Sɛ ɔ kan nzan kusu-ɔ, nzan'n su kpɛn-man. N ´de mín tannin nin min bɛ'm be kwlaa i sa nun kpɛkuun i wun ´ka ngblɛn.

¹² N wa sokpɛ i i soman'm be nyrun, n wun-man sran kun nga b'ɔ ´ko de i mín sa nun-ɔn.

¹³ N ´yo man i aklunjuɛ'n ɔ ´wie, ɔ su di-man cɛn kun. I anglo le kun o, i wunmiɛn-delɛ-cɛn o, ɔ nin cɛn uflɛ mun'n ɔ su di-man be kun.

¹⁴ I vinyi fie nin i figie fie b'ɔ kan be ndɛ se kɛ: ‹Min ajaoke nga min soman'm be mannin min'n yɛ'n,› n ´saci be. N ´yo man fie sɔ'n be ´kaci bo ble, kpɛkuun lɛ yɛ blo nnɛn'm be wa didi-ɔ.

¹⁵ Baal sɔlɛ b'ɔ sɔ i'n, bɔ sɛ i cɛn'n ko ju-ɔ, ɔ fɛfɛ i wun klanman, ɔ fa nzɛ wlɛ i sa'n, yɛ ɔ wla i kɔmin nyanman nglanman mun'n, i ti e nin e wa nyɛn i. Ɔ su i soman'm bé su kpɛkuun i wla fi mín su.» Anannganman yɛ ɔ kan sɔ-ɔ.

¹⁶ «I sɔ'n ti n wa lɛkɛ i blɛblɛ n ´fɛ i n ´kɔ aawlɛ flɛnnɛn'n nun lɔ n ´ko kɛn i anwlɛn su ndɛ.

¹⁷ Kpɛkuun n ´fɛ i vinyi fie mun `mɛn i ekun. N ´yo man Nyrɛnnɛn kongo'n ´kaci i wla ase gualɛ lika. Ɔ wa to jue su min su kɛ i talua nun'n sa. Ɔ ´su min su kɛ blɛ ng'ɔ fin Ezipt ´ba-a, ɔ fa suli min su'n sa .»

Anannganman nin Izraɛl be afiɛn siesielɛ

¹⁸ Anannganman'n waan: «I cɛn sɔ nun'n, ɔ ´flɛ min kɛ: ‹Min wun.› Ɔ su flɛ-man min kɛ: ‹Baal min Min kun.›

¹⁹ N ´yo man Baal nin amuɛn kun nga mun be dunman'n ´mlin i nuan nun. Bé wla ´fi be dunman'm be su mlɔnmlɔnmlɔn.

²⁰ N ´yo man min sran mun be nin nnɛn mun, nin anunman mun, ɔ nin nnɛn nga be cuɛn bé wun ase'n be ´di anuansɛ. N ´saci mɛn'n nun ta nin tokofi'm be kwlaa, afin alɛ kunlɛ'n ´wie. Kpɛkuun min sran'm be kwlaa bé wun ´tɔ be fɔuun.

²¹ Jalɛ nga n ´ja wɔ yɛ'n, n su yra-man wɔ le. Ɔ ´yo nanwlɛ su. N ´klo wɔ, n ´si wɔ aunnvuɛ.

²² Jalɛ nga n ´ja wɔ'n, min nin wɔ e ´tran lelele kpɛkuun siɛn'n a si min Anannganman.»

²³ Anannganman'n waan: «I cɛn sɔ nun'n, sɛ be srɛ min like'n m ´man. Like nga nyanmiɛn b'ɔ la nglo lɔ plaii'n ɔ srɛ'n, m ´mɛn i. Yɛ like nga asiɛ'n kusu srɛ nyanmiɛn b'ɔ la nglo lɔ plaii'n i sa nun'n ɔ ´fa mɛn i.

²⁴ Asiɛ'n ´yo man ble'n ´yo ye, nzan'n ´kpɛn, be yi ngo-ɔ ɔ ´ba. I sɔ ninnge nga be mian Zizreɛl i sa'n, ɔ ´nyan be.

²⁵ N ´fa Zizreɛlfuɛ mun n siesie mɛn'n nun. N ´klo Be-si-man-i-aunnvuɛ, kpɛkuun n ´se Aofuɛ kɛ: ‹Min sran yɛlɛ wɔ.› Kpɛkuun ɔ ´tɛ min su kɛ: ‹A ti min Nyanmiɛn !› »