Ndɛ Nga Nyanmiɛn I Nuan Ijɔfuɛ Oze Kannin'n 14 - NYANMIƐN NDƐ'N 1998

¹ Samarifuɛ'm be jasoli be Nyanmiɛn'n i wun, be wa fɛ i su afɛ'n. Alɛ'n wa di be, be ´wie be mma'm be nunkun, be ´kpaci be yi'm bɔ be ti wunnzɛfuɛ'm be klun nun.

Izraɛlfuɛ mun, an `kaci amun nzuɛn tɛ nan Nyanmiɛn jaso amun

² Izraɛlfuɛ mun, amun sa amun sin bla Anannganman amun Nyanmiɛn'n i wun, afin tɔlɛ nga amun tɔli'n, ɔ fin amún sa tɛ nga amun yoli'n.

³ An `sa amun sin bla Anannganman'n i wun. An `se i kɛ yoo: «Yaci é sa tɛ'm be kwlaa cɛ ye, manmanlɛ nga e manman wɔ'n, man ɔ yo wɔ fɛ! Nán yi ɔ́ nyin é wun, tɛ nga e ko yi e ko man wɔ'n, yɛlɛ wɔ ayɛ yilɛ nga e ´yi i yɛ'n.

⁴ Nán Asirifuɛ'm be yɛ be kwla de ye-ɔ. Nnɛn kpanngɔ nga be fa be kun alɛ'n, e su lafi-man bé su kun. E amuɛn nga e yoli be nin e sa'n, e su flɛ-man be kɛ e Nyanmiɛn kun, afin ɔ kunngba cɛ yɛ a si aika ba'n i aunnvuɛ-ɔ.»

⁵ «N ´yo man Izraɛlfuɛ'm be ´yaci bé nyin nyɔnnyɔn siesielɛ. N wa klo be klolɛ kpa, n su fa-man bé wun ya tɛ kun.

⁶ N wa yo kɛ bɔlɛ ufue ng'ɔ yo like ye'n sa Izraɛl nvle'n nun. Ɔ man Izraɛl wa bo nnyrɛ kɛ lis sa. Ɔ wa tra ndin kɛ Liban lɔ waka'm be sa.

⁷ Izraɛlfuɛ'm be wa yo mlanmlan, be ´yo klanman kɛ olivie sa, sɛ n ´kwla se'n, be ´bɔn fannin kɛ Liban bo'n fa bɔn fannin'n sa.

⁸ Be nga be ti min liɛ'n, sɛ n ´kwla se'n be wa tran min fɔnvɔ'n bo, be wa lua ble mma, be ´nyin kɛ vinyi sa, be dunman'n ´fu kɛ Liban nzan'n sa.

⁹ ?Efraimfuɛ mun, nguɛ ti yɛ man amun ko bua amuɛn ndɛ nun-ɔn? M bɔbɔ min n ´tɛ amun srɛlɛ'n su, n ´nian amun su. M bɔbɔ n ti kɛ siprɛs waka bɔ blɛ kwlaa nun i nnya'm be ti ble mlanmlan klanman'n sa. Min fanngan nun ti yɛ amun ninnge'm be ´yo ye-ɔ.»

*

¹⁰ Oze i ndɛ nga be o yɛ'n, sran ng'ɔ si ngwlɛlɛ'n, yɛ ɔ ´wun be wlɛ-ɔ. Sran ng'ɔ lɛ akunndan'n, yɛ ɔ ´si bé bo-ɔ. Nyanmiɛn'n i atin liɛ'n ɔ blibli-man klɛklɛ, ɔ ti seiin. Be nga be ti sran kpa'm be sin nun, kɛ be su sin atin nun sa, sanngɛ nyin keklefuɛ'm be sin nun-ɔn, be ja yaci-man seli lɛ .