Ndɛ Nga Nyanmiɛn I Nuan Ijɔfuɛ Oze Kannin'n 13 - NYANMIƐN NDƐ'N 1998

Izraɛlfuɛ'm be Nyanmiɛn wun jasolɛ b'ɔ man be wuli'n

¹ Laa'n, kɛ Efraimfuɛ'm be ijɔ sa'n, srɛ kun sran'm be kwlaa. Izraɛl mɛn'n nun'n, be yɛ be ti Izraɛlfuɛ'm be su kpɛnngbɛn-ɔn, be yɛ be sie be-ɔ. Kpɛkuun be wa yoli sa tɛ, be sɔli Baal, yɛlɛ wulɛ bɔ be wuli'n.

² Sran sɔ'm be tɛ yo sa tɛ'n be tɛ kɔ be nyrun, be fa jɛtɛ ufue be klo i kaci amuɛn. Be kpɛ bé ti nun yɛ be yi amuɛn sɔ mun-ɔn, i sɔ amuɛn liɛ'n be kwlaa be ti ajuin difuɛ kun sa nuan like. Sanngɛ kpɛkuun be ko se kɛ yoo: «Man be yi tɛ be man be.» ?Kɛ sran'm be tɔ nannin nun liɛ'n, amu'an wun i sɔ'n wie le?

³ I sɔ'n ti'n be wa sin kɛ nglɛmun nun nyanmiɛn ble bɔ be wun i kan kpɛkuun ɔ'a titi'n sa. Be wa wie kɛ nyansue b'ɔ wie kpɛ kunngba'n sa. Be wa yo kɛ ble wla bɔ aunngban'n fitɛ i kɔ kple nga be bo ble'n su i wun mmua'n sa. Be wa yo kɛ sin wɛnsrɛn b'ɔ fin sua ti nun fite'n sa.

⁴ «Izraɛlfuɛ mun, kɛ amun ´fin Ezipt lɔ ´ba, m bɔbɔ min Anannganman yɛ n ti amun Nyanmiɛn-ɔn. Amun si-man Nyanmiɛn uflɛ kun san min kunngba cɛ. Defuɛ uflɛ fi nun-man lɛ san min.

⁵ Blɛ bɔ amun o aawlɛ flɛnnɛn'n nun lɔ'n, bɔ amun o mɛn bɔ be nyan-man nzue nun'n nun lɔ'n, min yɛ n trali amun sa-a.

⁶ Kɛ amun nyannin aliɛ dili bɔ amun ku yili'n, yɛ amun boli amún wun tulɛ'n bo-ɔ.

⁷ I sɔ'n ti yɛ amun wla fili min-ɔn. Ɔ man n kusu m'an kaci kɛ asɔmɔli sa, m'an kaci kɛ kangale sa, n sa atin'n nun yɛ m minndɛ amun-ɔn.

⁸ M'an kaci kɛ nnɛn sroesroe bɔ be flɛ i urs bɔ b'a fɛ i wa sa, m'an sa, n ´tra amun n ´titi amun wue nun. Alua'm be wa di amun. Blo nnɛn'm be wa titi amun nnɛn'n nun.

⁹ Izraɛlfuɛ mun, amun nunnunlɛ'n ɔ fin min wun bɔ amun jasoli'n. ?Wan yɛ ɔ wa uka amun-ɔn?

¹⁰ ?Amun famiɛn'n bɔ i li yɛ ɔ fata kɛ ɔ ´de amun'n ɔ wo nin? ?Amun klɔ kpɛnngbɛn'm be li? ?Nán be osu ti yɛ amun jin mín wun kɛ: ‹Man ye famiɛn, sie i awlo lɔ sran dan e su nin-ɔn ?›

¹¹ Yɛ min kusu m mannin amun famiɛn klunngbɔ su, kpɛkuun kɛ n fali min ya dan'n, n deli amun sa nun.

¹² Efraimfuɛ'm be fɔnlɛ nga be fɔnnin'n, mín wla o su. Sa tɛ nga be yoli'n, ɔ mlin min klun-ɔn ɔ yo-man ye.

¹³ Nyrɛnnɛn b'ɔ ti kɛ wunnzɛfuɛ bɔ ɔ'a koto awuliɛ'n i aklunya sa'n, ´tɔ i su'n. Ɔ ´yo kɛ wunnzɛfuɛ wie bɔ sɛ i ba wulɛ ju-ɔ, ba'n i sinnzin ti ɔ kle i yalɛ bɔ nán balɛ yɛ ɔ kɔ ba'n sa.

¹⁴ N ´de be, ɔ man be su kɔ-man blɔlɔ. N ´to bé ti wie'n i sa nun. ?Nja wie, wɔ alɛ ninnge'm be o nin? ?Nja wie, ɔ duwlɛ'n wo nin? N si-man sran aunnvuɛ .

¹⁵ Efraimfuɛ'm b'a yo kpa be lika'n nun lɛ, sanngɛ aunngban klakla'n kusu i ja o atin nun ɔ su ba, Anannganman yo man aunngban sɔ'n ɔ fin aawlɛ flɛnnɛn'n nun lɔ yɛ ɔ ba-a. Ɔ man be nzue ti'n ɔ wu kee, ɔ man be nzue gbo'n ɔ ´wie nun. Be kpɔfuɛ'm be wa fɛn be trɔ'n nun ninnge kpakpa mun weiin.»